Esaaya 43
43
Haala Ceniiɗo Israa'iila, kisinoowo lenyol muuɗum oon
1Ammaa joonin, inan ko Joomiraaɗo
taguɗo ma, aan Yaakuuba,
gaɗuɗo ma, aan Israa'iila wi'i:
Taa hulu, sabo mi rimɗinii ma,
mi noddirii ma e innde maaɗa,
wo a jeyal am.
2Nde peccitataa diyeele, miɗo wondi e maaɗa.
Nde peƴƴataa gooruuji mawɗi, ɗi njoolataa ma.
Fay si aɗa yaha nder yiite nge wulataa ma,
ɗemle magge nyaamataa ma.
3Sabo wo miin woni Joomiraaɗo, Laamɗo maaɗa,
Ceniiɗo Israa'iila, kisinoowo ma.
Mi hokkii Misira faa keɓtaa hoore maaɗa.
Kuus e Seba du loomtante,
4saabe aɗa laatanii kam korsuɗo,
a teddinaaɗo, wooɗi du miɗo yiɗi ma,
mi waɗan yimɓe loomta jukkungo maaɗa
mi hokkan lenyi faa yonki maaɗa daɗa.
5Taa hulu, sabo miɗo wondi e maaɗa.
Mi wartiran ƴuwdi maa gilla lettugal,
mi hawrondinan suudu maaɗa gilla gorgal.
6Mi wi'an soɓɓirre: Yoofu ɓe!
Mi wi'a horɗoore: Taa fadda ɓe!
Wartir ɓiɓɓe am worɓe wonnooɓe to woɗɗi
e ɓiɓɓe am rewɓe wonnooɓe faa keerol leydi,
7noddirteeɓe innde am,
ɓe tagumi saabe teddeengal am,
ɓe ngaɗumi de moƴƴinmi ɓeen.
Kisinoowo walaa si wanaa Joomiraaɗo.
8Mburtinee yimɓe wumɓe ɓeen
fay ko tawi na ngoodi gite,
e yimɓe faaɗuɓe ɓeen,
fay ko tawi na ngoodi noppi.
9Lenyi ɗiin fuu kawrita,
yimɓe ɓeen fuu kawrita.
Moy e maɓɓe haali haala majjum?
Moy faamini en ko waɗunoo arande?
Ɓe ngadda seedeeɓe maɓɓe faa ɓeen ceedoo wo ɓe dartiiɓe.
Ɓe kettinanee faa wi'ee: Wo ɗum goonga!
10Wo on seedeeɓe am.
Noon Joomiraaɗo wi'i.
Wo on maccuɓe am ɓe cuɓiimi,
faa anndon de ngoonɗinon kam
de paamon wo miin woni Laamɗo.
Caggal am alla fay gooto tagaakano,
wooɗi yeeso am du, fay gooto waɗataa.
11Wo miin, miin tan woni Joomiraaɗo,
kisinoowo goɗɗo walaa si wanaa miin.
12Wo miin haali, miin hisini de gooyni.
Wanaa alla janano hakkunde mooɗon.
Oɗon laatii seedeeɓe am.
Wo miin woni Laamɗo.
Konngol Joomiraaɗo!
13Goonga, gilla ndeen wo noon ngoorumi,
wooɗi fay gooto waawaa hisinde goɗɗo e junngo am.
Si mi waɗii goɗɗum, moy waawi haɗude ɗum?
Haala laawol kesol ley ladde yoornde
14Inan ko Joomiraaɗo,
dimɗinoowo on, Ceniiɗo Israa'iila oon wi'i:
Wo saabe mooɗon de umminanmi Baabiila ganyo.
Mi waɗan doggooɓe ɓeen fuu njooloo,
ɗum woni Kaldiyankooɓe wonɓe ley laanaaji joolooji ɗum'en
ɗi mawnitortoo ɗiin.
15Miin woni Joomiraaɗo, Ceniiɗo mooɗon,
taguɗo Israa'iila, kaananke mooɗon.
16Inan ko Joomiraaɗo, diiduɗo balangol hakkunde maayo,
peccuɗo laawol hakkunde diyeele cemmbiɗinɗe,
17nelduɗo torkooji e pucci,
jom konunkooɓe semmbiɗinɓe,
e sordaasiiɓe ɗuuɗɓe, hawritinɓe oon wi'i:
Ɓe pukkake de ɓe ummitataako katin,
Ɓe nyifii hono ɓoggol fitilla.
18O wi'i:
Taa miccitoɗon ko faltii,
taa taykoɗon ko wittii.
19Inan miɗo waɗa huunde heyre.
Nde fuɗɗan gilla joonin.
Yalla on anndaa ɗum naa?
Mi waɗan laawol ley ladde yoornde
e gooruuji dow leydi njoorndi.
20Kulle ladde teddinan kam.
Baagaaji e ndawuuji fuu manan kam,
sabo mi waɗii ndiyam wubbii ley ladde yoornde.
Gooruuji du, na ila dow leydi njoorndi,
faa mi yarna yimɓe am ɓe cuɓiimi ɓeen.
21Lenyol ngol taganmi hoore am ngool manan kam.
Joomiraaɗo hiitoto yimɓe muuɗum
22Ammaa aan Yaakuuba, wanaa miin nodduɗaa!
Aan Israa'iila, a sawtii kam!
23A waɗanay kam jawgel maa damngel sadaka buleteeɗo.
Sadakaaji maaɗa ɗiin teddintaano innde am.
Mi doolɗay ma ngaddanaa kam dokke.
Mi tampiniray ma waddude sadakaaji ure.
24A soodiranay kam kuɗi ure e cardi.
A haarniray kam e ɓelle kirsamaaji maaɗa.
Ammaa a torririi kam e hakkeeji maaɗa.
A tampinirii kam e lutti maaɗa.
25Wo miin, ayyo miin tan,
miin e hoore am woni mooytoowo lutti maaɗa.
Mi miccitataako hakkeeji maaɗa katin.
26Miccintinam ko ngaɗumi,
faa njaaden sariya.
Kaalaa faa laaɓinaa hoore maaɗa.
27Maamii on arandeejo oon waɗiino hakke,
de nantinannooɓe on ɓeen muurtanii kam.
28Mi bonkake mawɓe nokkuure seniinde.
Mi wattii Yaakuuba e halkere.
Israa'iila du laatake jalnorteeɗo.
Currently Selected:
Esaaya 43: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
