Esaaya 41
41
Haala Laamɗo Toowɗo e haala tooruuji
1Joomiraaɗo wi'i:
Onon leyɗe hakkunde maayooji, accee duko de kettinanoɗon kam!
Lenyi keyɗintina semmbe muɓɓen,
de ɓattoo kaala!
En njaada sariya.
2Moy ƴuurni gorko jaadoowo e fonnditaare faro lettugal?
Moy watti lenyi e juuɗe makko de leeƴini kaanankooɓe?
Kaafaahi makko waɗan ɓe laatoo sollaare.
Ɓaaru makko du waɗan ɓe hono nyaande nde henndu ruuyni.
3O riiwii ɓe de o wittii e jam.
O rewi laawol ngol koyɗe makko njaaɓayno abada.
4Moy waɗi ɗum, moy tagi ɗum?
Wo noddoowo jamaanuuji gilla fuɗɗoode oon.
Miin Joomiraaɗo, wo miin woni arandeejo.
Sakitotooɓe du mi wondiran e muɓɓen hono noon.
5Leyɗe hakkunde maayooji nji'ii ɗum de kuli.
Wonɓe faa keerol leydi fuu na ndiwna.
Ɓe fuu iɓe ɓattoo, iɓe ngara.
6Mono e maɓɓe fuu na gonngina banndum,
na wi'a: semmbinɗin ɓernde maaɗa!
7Cehoowo leɗɗe na semmbinɗina bahillo.
Nyokkaajo du na semmbinɗina tafoowo.
Imo wi'a ko takkaa ɗuum na wooɗi.
O tontiran tooru nduun e tonteeje taa ndu dimmboo.
Laamɗo waran walla yimɓe muuɗum
8Ammaa aan Israa'iila, maccuɗo am,
aan Yaakuuba, mo cuɓiimi,
ƴuwdi Ibrahiima, yigoo am.
9Aan mo umminmi gilla keerol leydi,
mo noddumi faa to ɓuri woɗɗude,
mo mbi'umi:
Wo a maccuɗo am,
mi suɓake ma
mi yoppataama ma.
10Taa hulu,
sabo miɗo wondi e maaɗa.
Taa ye'e-ye'enin e kulol,
sabo miin woni Laamɗo maaɗa.
Mi semmbinɗinte,
mi dannete.
Mi wallitirte e junngo am semmbiɗingo ngoon.
11Inan tikkanɓe ma ɓeen fuu,
semteende e wemmbere moɗan ɗum'en.
Filantooɓe ma fitina ɓeen fuu kalkan faa lalla.
12A filoyto haɓdiiɓe ma ɓeen de a yi'ataa ɓe.
Wayɓe ma ɓeen laatoto ɓolum,
13sabo miin Joomiraaɗo, Laamɗo maaɗa oon,
wo miin tiigii junngo maa nyaamo,
miɗo wi'e: Taa hulu,
mi dannete!
14Taa hulu, aan Yaakuuba,
laatiiɗo hono njilngu.
Aan Israa'iila, jilngel,
mi dannete.
Noon Joomiraaɗo wi'i.
Miin dimɗinoowo ma, Ceniiɗo Israa'iila oon.
15Inan mi waɗii ma cokkirgal ceeɓungal,
kesal pul, gaɗanaangal tonteeje.
A sorɓan baamle de niisaa ɗe,
ngaɗaa tile laatoo hono nyaande.
16A ƴaroto ɗe de henndu ruuyna ɗe,
kenkenam sankita ɗe.
Ammaa aan kaa, a seyorto Joomiraaɗo.
A mantorto Ceniiɗo Israa'iila oon.
17Lo'uɓe e tampuɓe na piloo ndiyam ammaa keɓataa.
Ɗemle maɓɓe na njoori saabe ɗomka.
Miin Joomiraaɗo, mi jaaboto ɓe!
Miin Laamɗo Israa'iila, mi yoppataa ɓe.
18Mi waɗan gooruuji mbubba dow tile joorɗe.
Ilduɗe ilan hakkunde naɗɗi.
Mi waɗan ladde yoornde laatoo weendu
de leydi njoorndi du laatoo mamasiiji.
19Mi tiiroto leɗɗe seddere e gawde
e miiri e jaytun ley ladde yoornde.
Mi tiiroto du leɗɗe sipire
e sii leɗɗe feere feere fuu ley nokkuure wootere.
20Noon waɗata faa ɓe fuu ɓe nji'a, ɓe annda,
ɓe taykoo, ɓe paama faa laaɓa
wo junngo Joomiraaɗo kam waɗi ɗum,
wo Ceniiɗo Israa'iila oon tagi ɗum.
Tooruuji ngalaa nafaa
21Joomiraaɗo wi'i:
Ngaddee ka mooɗon,
kollee ko seedotoo ɗum!
Noon kaananke Yaakuuba oon wi'i:
22Ɓe ɓattoo, ɓe kolla en ko waroyta.
Ɓe kolla en noy ko faltii wa'anoo,
faa miiloɗen wooɗa de annden ko warata.
Maa du, kollee min ko waroyta.
23Pillanee min ko waroyta,
faa min paama wo on alla'en!
Ngaɗee ko wooɗi maa ko boni,
faa min peerta gite amin de nji'en ɗum en fuu.
24Ammaa on nganaa faa'e,
golleeji mooɗon du na njaasi ɓolum.
Suɓaade on na laatii ko nyiddinii sanne.
25Mi umminii ganyo gilla soɓɓirre,
inan o yottake!
Gilla puɗal naange, imo nodda innde am.
Imo yaaɓa ardiiɓe lenyi hono no loope njaaɓirtee noon.
Imo dampa ɓe hono no mahoowo dampirta loope noon.
26Moy haali haala majjum gilla fuɗɗoode,
faa paamen ɗum gilla ko ɓooyi,
de mbi'en wo ɗum goonga?
Fay gooto humpitay kabaaru oon.
Fay gooto haalay haala majjum.
Fay gooto nanataa haalaaji mooɗon.
27Miin Joomiraaɗo miin artii haali,
mbi'umi yimɓe Siyona:
Inani ɓe ɗo!
Wo Urusaliima kokkanmi jottinoowo kabaaru lobbo.
28Mi ndaarii, ammaa fay gooto,
fay gooto hakkunde maɓɓe walaa baawɗo tindinde kam.
Si wanaa noon fu, mi ƴamanno ɓe,
de ɓe njaaboo kam.
29Ɓe fuu wo ɓe ɓolum,
golleeji maɓɓe fuu wo ɓoli.
Tooruuji maɓɓe ɗiin du wo henndu ɓoldu tan.
Currently Selected:
Esaaya 41: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
