Fuɗɗoode 50
50
1Yuusufi hippii dow bammum, woyi ɗum, muccii ɗum. 2Yuusufi yamiri sawrooɓe muuɗum ngatta bammum ure taa nyola. Sawrooɓe ɓeen ngatti Israa'iila ure. 3Ɓe ngolliri ɗum balɗe 40, ɗum woni balɗe ɗe maayɓe mbujirtee ure taa nyola. Misirankooɓe mboyi mo balɗe 70 sabo ɗeen ngoni balɗe ɗe maayɗo woyetenoo.
4Nde nyalaaɗe woyeede Yaakuuba ɗeen kiɓɓunoo ndeen, Yuusufi wi'i mawɓe ɓattiiɓe Fira'awna ɓeen:
— Si on njardake fu, miɗo ŋaaroo on, nyaaganoɗon kam Fira'awna, mbi'on: 5«Nde baaba am ɓadinoo maayde ndeen, waɗii kuniimi mi mooɓan ɗum ley saabeere nde wasani hoore muuɗum ley leydi Kanaana. Joonin o accaa kam mi mooɓowa baaba am de mi warta.»
6Fira'awna jaabii, wi'i:
— Yahu, mooɓowaa bammaa hono no o waɗunoo kunoriɗaa noon.
7Yuusufi yehi mooɓowi bammum. Gollooɓe Fira'awna e mawɓe suudu muuɗum e mawɓe leydi Misira fuu njaadi e makko. 8Noon du suudu Yuusufi e sakiraaɓe muuɗum e suudu bammum fuu njehiri. Wo sukaaɓe e na'i e dammuuli maɓɓe tan ɓe mbayri Goosan. 9Torkooji pucci sordaasiiɓe e waɗɗiiɓe pucci njaadi e Yuusufi. Jamaa oon heewi sanne.
10Nde ɓe njottinoo ƴarorde Atat lettugal gooruwol Urdun ndeen, ɓe mboyi toon bojji cattuɗi. Yuusufi woyiri bammum balɗe jeɗɗi. 11Jooɗiiɓe ley leydi Kanaana ɓeen nani bojji maɓɓe ley ƴarorde Atat ndeen de mbi'i: «Ɗii bojji Misira, wo ɗi cattuɗi.» Ɗum waɗi de ɓe inndiri nokku oon Awil-Misirayim (ɗum na fiirta «Bojji Misirankooɓe»). Iɗum tawaa faro too Urdun. 12Ɓiɓɓe Yaakuuba ngaɗani ɗum hono no yamirnoo ɗum'en noon. 13Ɓe ndonndii mo faa e leydi Kanaana, de ɓe mooɓi mo ley loho wonko ngesa Makpela. Loho koon woni ley ngesa ngonnga yeeso Mamre nga Ibrahiima soodunoo to Eforon, Hittiyanke faa laatanoo ɗum nokku caabeeje. 14Nde ɓe mooɓidinnoo o fu, Yuusufi yeccii Misira kam e sakiraaɓe muuɗum e ɗowtirnooɓe ɓe mooɓoyde baabiiɓe ɓeen fuu.
No Yuusufi deƴƴiniri sakiraaɓe muuɗum
15Nde sakiraaɓe Yuusufi nji'unoo baaba muɓɓen maayii ndeen, mbi'i:
— Ina waawi taweede Yuusufi wanyan en de yomnitoo en torraaji ɗi ngaɗunoɗen ɗum ɗiin.
16Saabe ɗuum ɓe neli to Yuusufi, ɓe mbi'i ɗum:
— Fadde bammaa e maayde hokkii tindinoore ndee wi'ii: 17«Mbi'ee Yuusufi nii: ‹Miɗo nyaage, yaafa sakiraaɓe maa hakke mo ngaɗi ma, njaafoɗaa bone mo ɓe ngaɗi ma oon› ». Joonin le si goonga, miɗen ŋaare, yaafa luttal amin, minen maccuɓe Laamɗo bammaa ɓeen.
Nde Yuusufi nannoo haalaaji ɗiin ndeen, woyi.
18Sakiraaɓe makko ɓeen ngari cujidi yeeso makko, mbi'i:
— Inani min, wo min maccuɓe maaɗa!
19Ammaa Yuusufi wi'i ɓe:
— Taa kulee! Yalla miin wo mi Laamɗo naa? 20Onon le, on muuyiino waɗude kam ko boni, ammaa Laamɗo kaa muuyrii ɗum moƴƴere, faa danna yimɓe heewɓe hono no ɗum laatorii hannden nii. 21Ndelle joonin, taa kulee. Mi jogoto on, onon e koreeji mooɗon fuu.
Noon o deƴƴiniri ɓe, o waaltinii ɓerɗe maɓɓe.
Maayde Yuusufi
22Yuusufi jooɗii Misira, kam e suudu bammum fuu. O wuurii duuɓi 110. 23Yuusufi yi'i ɓiɓɓe Efrayim e taaniraaɓe muuɗum. Ɓiɓɓe Makir, ɓii Manasa oon du, ndimaama dow koyɗe Yuusufi. 24Yuusufi wi'i sakiraaɓe muuɗum:
— Mi ɓadake maayde. Ammaa Laamɗo wallan on. O wurtinan on e leydi ndi, o yaaran on ley leydi ndi o huninoo o hokkan Ibrahiima e Isiyaaka e Yaakuuba ndiin.
25Yuusufi waɗi ɓiɓɓe Israa'iila kunii. O wi'i:
— Laamɗo wallan on. Si oɗon ndilla ɗo fu, ndillidon e ƴi'e am.
26Caggal ɗuum, Yuusufi maayi, duuɓi muuɗum wo 110. Ɓe mbuji mo ure heɓa taa o nyola, ɓe ndesi mo ley keesuwal ley leydi Misira.
Currently Selected:
Fuɗɗoode 50: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
