Fuɗɗoode 49
49
1Yaakuuba noddi ɓiɓɓe muuɗum, wi'i ɗum'en:
— Kawritee faa mi haalana on ko hewtotoo on ley duuɓi garooji:
2Kawritee onon ɓiɓɓe Yaakuuba,
kettindanee Israa'iila baabii on oon.
3Ruben, aan woni afo am,
aan woni semmbe am,
ɓiyam mo artiimi keɓumi ley njokollaaku am.
Aan woni ɓurɗo teddeengal e baawɗe fuu.
4Aɗa nanndi e ndiyam iloojam,
a walaa nanngitaare,
a heɓataa ardaade,
sabo a fukkake dow daɗɗo bammaa de tuuninɗaa ngo.
5Simeyon e Lewi wo sakiraaɓe,
kaafaaje maɓɓe wo nyannguɗe.
6Mi naatataa ley anniyaaji maɓɓe.
Ɓernde am seyortaako kawrital maɓɓe.
Sabo ley tikkere maɓɓe ɓe mbarii worɓe.
Ley dukkuru maɓɓe, ɓe taƴii codduli ga'i.
7Tikkere maɓɓe nyanngunde ndeen huɗaama
Kuddi ndiin saama dow dukkuru maɓɓe bonndu nduun.
Mi senndan ɓe hakkunde ɓiɓɓe Yaakuuba,
de mi sankita ɓe ley Israa'iila.
8Aan Yahuuda, sakiraaɓe maa manete.
Junngo maa teddan dow koƴƴuli wayɓe maaɗa,
Sakiraaɓe maa cujidante.
9Aan Yahuuda wo a laddeeru jokoldu.
Aan ɓiyam, a wartii e loohagol maaɗa semmbewol ngool.
A dikkinake de pukkoriɗaa hono laddeeru noon.
De moy suusi umminde laddeeru rewru hono ndu?
10Sawru laamu heddoto e lenyol Yahuuda,
laamu dillataa ley ƴuwdi makko,
faa nde podanaaɗo#49:10 podanaaɗo ƴuurii e Geresankoore. E Ibraninkoore wo «Siloo» ammaa anndaaka ko ɗuum fiirtata pay. teddeengal oon warowi.
Lenyi adunaaru ɗowtanto mo.
11O haɓɓan araawa makko e inaboohi.
O gorfa mola makko e liccal ɓurngal wooɗude.
O lonnira kaddule makko inaboojam
de o suuwa forgo makko ley mboɗejam ɗaam.
12Inaboojam wojjinan gite makko,
de ɓiraaɗam rawnina nyiiƴe makko.
13Jabulon jooɗoto daande maayo,
Kanko jeyi laanaaji dariiɗi daande maayo ɗiin.
Leydi makko hewtan faa ndi Sidon.
14Isakar wo araawa cemmbiɗinnga,
pukkiinga ley hoggo ngo kokuuji ɗiɗi.
15Nde nga tawnoo hoɗorde ndeen na wooɗi,
leydi ndiin du na weli fu,
nga turni balaaje magga nga ronndii donngal,
nga laatii maccuɗo golleeji tiiɗuɗi.
16Dan du saroto lenyol muuɗum
hono gootol e lenyi Israa'iila ɗiin.
17O laatoto hono mboddi dow laawol,
hono foosikere soppoore teppe pucci
de waɗɗiiɓe ɗi caamira gaɗa gaɗalde dow laawol.
18Miɗo doomi kisindam ƴuuroojam to maaɗa, aan Joomiraaɗo!
19Konunkooɓe piiloto Gad,
ammaa o jaaloto ɓe, o riiwa ɓe.
20Aser jogoto neema gooduɗo nebam.
O waɗanan laamiiɓe neemaaji belɗi.
21Naftali wo lewla njoofaanga,
ndimoowa ɓiɓɓe fonnditiiɓe.
22Yuusufi wo liccal lekki dimoowal,
lekki ndimoowi ngonki dow ildude ndiyam,
ki licce muuɗum mbeɗɗitii dow kokuwol.
23Fiɗooɓe kure koni mo, piɗi mo, torri mo.
24Ammaa imo tiigii ɓaaru makko faa teeŋi,
juuɗe makko na celli saabe ballal Laamɗo,
junngo Jom Semmbe balloowo Yaakuuba oon,
Duroowo laatiiɗo tefaare Israa'iila oon.
25Laamɗo bammaa oon wallete,
Jom Baawɗe oon barkinante huunde fuu,
barkeeji ƴuurooji dow kammu,
barkeeji ilam mbaaliiɗam e leydi,
barkeeji enndu e enɗam.
26Barkeeji bammaa ɓuri barkeeji baamle ɓooyɗe
e moƴƴereeji nokkuuje toowɗe duumiiɗe.
Ɗi ngona dow hoore maaɗa,
ɗi ndekoo dow ngaasa maaɗa, aan Yuusufi
cenndaaɗo hakkunde sakiraaɓe muuɗum oon.
27Benyamin wo suundu seekooru,
nyaamooru wanyuɓe ɗum gilla subaka,
peccoowo ko heɓi du wakkati kiiral naange.
28Ɓee ngoni lenyi Israa'iila 12 ɗiin. Ɗuum woni ko baaba maɓɓe wi'i nde barkinannoo ɓe ndeen. Gooto fuu fodde barke mo o barkiniri ɗum.
Haala maayde Yaakuuba
29Yaakuuba tindini ɓe, wi'i:
— Joonin mi maayan, mi hawritowan e maamiraaɓe am. Mooɓaa kam ɗakkol baabiraaɓe am ley loho wonko ngesa Eforon Hittiyanke. 30Koon woni loho wonko ley ngesa Makpela, lettugal Mamre ley leydi Kanaana. Loho koon, wo Ibrahiima soodi ko kanko e ngesa ngaan fuu e junngo Eforon faa nokku oon laatoo nokku caabeeje. 31Toon Ibrahiima e jom suudu muuɗum Saaratu mooɓaa. Toon Isiyaaka e jom suudu muuɗum Rebeka du mooɓaa. Toon mooɓumi Leya du. 32Ngesa ngaan e loho wonko e magga koon fuu e juuɗe Hittiyankooɓe soodaa.
33Nde Yaakuuba tilinoo tindinde ɓiɓɓe muuɗum ndeen, hawrini koyɗe muuɗum dow daɗɗo, foofi foofaango sakitiingo, de dilli adunaaru, hawritowi e maamiraaɓe muuɗum.
Currently Selected:
Fuɗɗoode 49: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
