Tindinoowo 2
2
Filagol mbelirkaaji adunaaru
1Mbiimi e hoore am: «Meeɗaa mbelirkaaji, ndaaraa ɗume nafata.» Ammaa ɗum du fuu wo ɗum ɓolum! 2Mbiimi jaleeɗe wo puuyndam, de ɗume seyo le nafata?
3Mi waɗii anniya weltoraade njaram lamminaaɗam mi laatoo hono puuyɗo, tawaa le miɗo heddodii e hakkillo, faa mi faama ko nafata yimɓe soruɓe kammu ɓee haddi nyalakoy muɓɓen koy ngoodi kooy.
4Miin du, mi gollii golleeji mawɗi: mi nyiɓanii hoore am cuuɗi, mi remanii hoore am gese leɗɗe inabooje#2:4 inaboohi wo lekki ɗimoohi ɓiɓɓe nannduɗe e ɓiɓɓe cabiihi de wo aaweteeki lanyoohi. . 5Mi waɗanii hoore am sardiŋeeji e gese leɗɗe, de ndarnumi ley majje leɗɗe dimooje iri nyaameteeɗe fuu. 6Mi waɗanii hoore am beeli faa mi yarnira leɗɗe am puɗooje faa mawna.
7Mi heɓii maccuɓe e horɓe, soodaaɓe e rimaaɓe ley suudu am. Wooɗi du miɗo jogii cogge daabaaji mawɗi e pamari faa ɓuri ardinooɓe kam Urusaliiima ɓeen fuu. 8Mi ɓoɓtii kaŋŋe e cardi, e danyal kaanankooɓe e leyɗe korsungal. Mi hebbinii yimooɓe worɓe e rewɓe. Wooɗi rewɓe heewɓe du keɓumi – ko welnata ɓerɗe worɓe ɗuum.
9Mi laatake neɗɗo tedduɗo faa ɓurumi artinooɓe kam Urusaliima ɓeen fuu. Ɗuum fuu, miɗo heddodii e hakkillo am. 10Ko gite am njiɗi fuu mi waɗanii ɗe. Ko weli ɓernde am fuu, mi haɗaay nde. Ɓernde am seyorake golle am, ɗum laatii ngeɗu am e ley golleeji am tampiriiji ɗiin fuu.
11Ammaa ko ndaarumi golleeji ɗi ngollannoomi miɗo tampa ɗiin fuu, mi tawii fuu wo ɓolum, wo ɗum riiwude henndu. Nafaa fuu walaa e ko waɗetee ley sorndu naange ndu.
Fonndugol hakkillo e rafi hakkillo
12Caggal ɗuum mi miilake e dow hakkillo e puuyndam e kaanɗi. Ɗume loomtoowo kaananke waawi waɗude kesum si wanaa haddi ko waɗanoo?
13Mi ndaarii, tawumi hakkillo na ɓurdi puuyndam no annoora ɓurdi nimre noon. 14Hakkilante na woodi gite faa yiira, ammaa puuyɗo wo ley nimre yahata. De taykiimi, tawumi cakitte maɓɓe fuu wo gootum.
15Ndeen miiliimi e ɓernde am, mbiimi: «Cakitte am e cakitte puuyɗo, fuu wo gootum, ndelle ɗume hakkillo nafata kam?» De mbiimi e hoore am ɗuum du wo ɓolum. 16Sabo hakkilanteejo du yeggitete hono no puuyɗo miccitortaake noon. Nyalaaɗe paltoto de ɓe fuu ɓe njeggitee. Hakkilante e puuyɗo fuu wo maayde wootere.
17Ndeen mbanyumi nguurndam sabo ko golletee ley sorndu naange ndu ɗuum mettinanii kam. Fuu wo ɓolum, wo riiwude henndu. 18Mbanyumi golleeji am tampiriiji ɗi ngollannoomi ley naange ɗiin, sabo tilay mi yoppana ɗi loomtoowo kam. 19Moy anndi du yalla loomtoowo kam oon wo hakkilante naa wo puuyɗo? Ammaa o dawranan golleeji ɗi tampirannoomi hakkilantaaku e ciinal ley sorndu naange ɗiin fuu. Ɗum du tawumi fuu wo ɓolum. 20Ndelle mi mimsitii golleeji ɗi tampannoomi ley adunaaru sorndu naange ɗiin fuu. 21Si goonga fay si neɗɗo golliri hakkilantaaku e ŋeenyal e anndal, tilay keɓal muuɗum ngaal hokkee goɗɗo mo gollanaay ɗum. Ɗuum du fuu wo ɓolum, wo bonanda mawɗo.
Ƴamɗe dow joonde tomette ley adunaaru
22Ɗume neɗɗo heɓata ley golleeji muuɗum tampiriiji ɗi golliri e tinnitaare ley adunaaru sorndu naange ndu? 23Nyalaaɗe makko fuu wo naawalla, golle makko du wo mettorgal. Fay jemma du hakkillo makko waalaaki. Ɗum du fuu wo ɗum ɓolum.
24Walaa fuu ko ɓurani neɗɗo nyaamude e yarde e weltoraade golleeji muuɗum. De kanjum du, mi yi'ii ɗum ƴuuraanaa e junngo Laamɗo. 25Sabo noy nyaamirten naa du keɓen seyo si ƴuuraay to Laamɗo? 26Laamɗo na hokka ɗowtaniiɗo ɗum hakkillo e anndal e seyo, ammaa gaɗoowo ko boni oon o ronndii ɗum gollal ɓoɓtude jawdi faa hokka kuloowo Laamɗo. De ɗuum du fuu wo ɓolum, wo riiwude henndu.
Currently Selected:
Tindinoowo 2: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
