Tindinoowo 3

Huunde fuu e wakkati muuɗum

1Huunde fuu na woodi wakkati muuɗum, ko sori kammu fuu na woodi nde waɗata:

2Rimeede e wakkatim,

maayde du e wakkatim,

aawre e wakkatim,

tayri du e wakkatim,

3ittude yonki e wakkatim,

dannude du e wakkatim,

liɓude e wakkatim,

nyiɓude du e wakkatim,

4wullude e wakkatim,

jalude du e wakkatim,

cunu e wakkatim,

bami du e wakkatim,

5sankitinde kaaƴe e wakkatim,

hawrondirde ɗe du e wakkatim,

ɓadondirde e wakkatim,

woɗɗondirde du e wakkatim,

6tewtude e wakkatim,

mursude du e wakkatim,

resude e wakkatim,

faɗɗude du e wakkatim,

7seekude e wakkatim,

nyootude du e wakkatim,

deƴƴude e wakkatim,

haalude du e wakkatim,

8yiɗude e wakkatim,

wanyude du e wakkatim,

wolde e wakkatim,

jam du e wakkatim.

9Nafaa oye golloowo heɓata ley golleeji muuɗum? 10Mi yi'ii donngal ngal Laamɗo ronndi ɓiɓɓe-Aadama. 11Laamɗo waɗirii huunde fuu no wooɗiri e wakkati muuɗum. O wattii ley ɓernde ɓii-Aadama miilaade ko duumotoo, de fay e noon waawataa faamidinde golleeji ɗi Laamɗo waɗi gilla fuɗɗoode faa timmoode. 12Mi faamii walaa ko ɓurani neɗɗo wuurdude seyo e weltaare haddi balɗe muuɗum. 13Neɗɗo heɓa nyaama, yara, de weltoroo golleeji muuɗum ɗi tampani, wo dokkal Laamɗo.

14Miɗo anndi ko Laamɗo waɗi fuu tabitan faa abada.

Walaa fuu ko ɓeydee,

walaa du ko ɓuytee.

Noon Laamɗo waɗiri faa hulee.

15Ko woni hannden fuu waɗiino arande,

ko waɗoyta jaango du waɗiino,

Laamɗo wartiran ko waɗunoo faltii du.

Haala neɗɗo e mardi

16Inan ko taykiimi katin ley sorndu naange ndu:

Ley suudu sariya wo bonde yonki won toon,

to kiite taƴetee du bonde yonki heewi toon.

17Mbiitiimi Laamɗo hiitoto ponnditiiɗo e bonɗo fuu sabo huunde fuu na woodi wakkati muuɗum, gollal du fuu wakkati sariya muuɗum. 18Mbiitiimi e dow ɓiɓɓe-Aadama, Laamɗo na ndaartindoo ɗum'en faa paama ko ɓuraa daabaaji. 19Cakitte ɓiɓɓe-Aadama e ɗe daabaaji ceedaay, ko ɓe podanaa ɗuum ina heɗii ɓe. No ɓee ɗo maayrata noon, ɓee to du maayrata. Mono e maɓɓe fuu foofaango wooto woodi. Walaa fuu ko ɓii-Aadama ɓurdi daaba. Ɗum fuu wo ɗum ɓolum. 20Fuu wo nokkuure wootere ponndii, fuu e sollaare ƴuuri e sollaare du coƴƴoto. 21Moy anndi yalla ruuhu ɓiɓɓe-Aadama ƴeenyataanaa dow kammu de mo daabaaji jippoo ley leydi?

22Mi faamii walaa fuu ko ɓurani ɓii-Aadama weltoraade golleeji muuɗum sabo ɗuum woni ngeɗu mum. Sabo moy waawi wartiroyde mo faa o yi'a ko waɗata caggal makko?

Currently Selected:

Tindinoowo 3: FBF

Highlight

Copy

Compare