ZIA YÃ 21

Zĩtɛ dufu kũ musu dufuo

1Akũ ma zĩtɛ dufu kũ musu dufuo è, zaakũ zĩtɛ káakupɔ kũ musu káakupɔo gɛ̃̀tɛ, akũsɔ̃ ísira kun doro. 2Akũ ma Luda wɛ́ra Yurusalɛmu dufu è bona musu Luda kĩnaa, àtɛn kipa. Ò a kɛ̀kɛ lán nɔgbɛ̃ kũ a zãkɛ sorumii màa bà. 3Akũ ma kòto gbãna mà bona gbà kĩnaa à pì: Luda vùtɛ kũ bisãsirinɔ sà, anigɔ̃ kú kũńwo, onigɔ̃ de a gbɛ̃nɔ ũ. Luda pì nigɔ̃ kú kũńwo a zĩda ń Luda ũ. 4Ani ń wɛ́tɛ̃ warawarańnɛ pínki. Ga nigɔ̃ kun doro ke wɛ̃nda ke ɔ́ɔdɔna ke wãwã, zaakũ yã zĩnɔ gɛ̃̀tɛ.

5Akũ Gbɛ̃ kũ à vutɛna gbàaa pì: Ǹ ma! Matɛn pɔ́ sĩnda pínki kɛ dufu. Akũ à òmɛnɛ: Ǹ kɛ̃, zaakũ yã dínɔ náani vĩ, akũsɔ̃ yãpuramɛ. 6Akũ à òmɛnɛ: À kɛ̀n gwe. Makũmɛ Alafa kũ Omɛgao, Naana kũ Lakanaao ũ. Gbɛ̃ kũ ími tɛn dɛ, mani a gba ísɛ̃ wɛ̃̀ndide boki. 7Gbɛ̃ kũ à zĩ̀i blè mɛ́ anigɔ̃ pɔ́ dínɔ vĩ pínki. Manigɔ̃ de a Luda ũ, anigɔ̃ de ma nɛ́ ũ. 8Ama vĩnadenɔ kũ náanisaridenɔ kũ yãvãnikɛrinɔ kũ gbɛ̃dɛrinɔ kũ zinakɛrinɔ kũ ɛzɛdenɔ kũ tãnagbagbarinɔ kũ manafikidenɔ pínki, ń baka nigɔ̃ de tɛ́ sɛ̀bɛ kũ àtɛn kũ kũ ifãntɛ̃gbɔ̃ɔo ũmɛ. Ga pladen gwe.

Yurusalɛmu dufu

9Malaika gbɛ̃nɔn suppla kũ ò kɛrɛ mɛ̀n suppla kũna, kisira kpɛde mɛ̀n suppla kán à pà pìnɔ doke sù à òmɛnɛ: Ǹ mɔ́ mà Sãnɛ Bɔ̀rɔ nɔ dufu mɔnnɛ. 10Luda Nini dinama pìi gũn malaikaa pì ma sɛ à gɛ̀ɛ kũmao kpi lei zɔ̃kɔ̃ɔa. À Luda wɛ́ra Yurusalɛmu mɔ̀mɛnɛ bona musu Luda kĩnaa, àtɛn kipa. 11Àtɛn tɛ́ kɛ kũ Luda gakurio, àtɛn pí lán gbɛ̀ bɛ̀ɛrɛde bà, lán diamɔɔ bà. 12À bĩni lei zɔ̃kɔ̃ vĩ. À gãnu mɛ̀n kuri awɛɛplamɛ, malaika gbɛ̃nɔn kuri awɛɛplanɔn zɛzɛnan. Isaraila buri mɛ̀n kuri awɛɛplanɔ tɔ́ kɛ̃na gãnu pìnɔa. 13Gãnu mɛ̀n aakɔ̃ kú ifãboki kpa, mɛ̀n aakɔ̃ kú gugbãnduru kpa, mɛ̀n aakɔ̃ kú gɛ̀nɔmidɔki kpa, mɛ̀n aakɔ̃ kú ifãlɛtɛ kpa. 14Ò bĩni pì ɛ̃ pɛ̀tɛ gbɛ̀ mɛ̀n kuri awɛɛplanɔa. Sãnɛ Bɔ̀rɔɔ zĩ̀ri gbɛ̃nɔn kuri awɛɛplanɔ tɔ́ kɛ̃na gbɛ̀ɛ pìnɔa.

15Malaika kũ àtɛn yã omɛnɛ pɔ́yɔ̃bɔ kũ ò pì kũ wuraao kũna, de à wɛ́ra pì yɔ̃o kũ a gãnunɔ kũ a bĩnio. 16Wɛ́ra pì kusuru siikɔ̃mɛ, a gbã̀na kũ a yàasaao lɛɛlɛmɛ. Akũ à wɛ́ra pìi yɔ̃̀ kũ pɔ́yɔ̃bɔɔ pìio. A gbã̀na bi kiloo wàa kuri awɛɛplamɛ. A gbã̀na kũ a yàasaao kũ a leio pínki lɛɛlɛmɛ. 17À a bĩni yɔ̃̀ dɔ, a lei gã̀sãkuru basuppla awɛɛsiikɔ̃. Malaikaa pì a yɔ̃̀ bisãsiri gã̀sãkuru gbã̀na lɛ́mmɛ. 18Ò bĩni pìi kɛ̀ kũ diamɔɔo. Wɛ́ra pì bi wuraamɛ atɛ̃nɛ swáswa lán dígi bà. 19Ò gbɛ̀ kũ ò wɛ́ra pì bĩni pɛ̀tɛaa kɛ̀kɛ kũ gbɛ̀ bɛ̀ɛrɛde buri sĩnda pínkio.

Ò gbɛ̀ káakupɔ kɛ̀kɛ kũ diamɔɔo,

a plade kũ safiaao,

a aakɔ̃de kũ agataao,

a siikɔ̃de kũ ɛmɛradiio,

20a sɔɔrode kũ onisiio,

a suddode kũ kaanɛliaao,

a supplade kũ kisolitiio,

a sɔraakɔ̃de kũ bɛriliio,

a kɛ̃ndode kũ topazaao,

a kuride kũ kisopazaao,

a kuri awɛɛdode kũ yasintiio,

a kuri awɛɛplade kũ amɛtisiio.

21Gãnu mɛ̀n kuri awɛɛpla pìnɔ bi òso mɛ̀n kuri awɛɛplanɔmɛ. Ò ń pínki kɛ̀ kũ òsooo mɛ̀n dodo. Wɛ́ra pì zɛ́da bi wuraamɛ atɛ̃nɛ, òdi gu en lán dígi bà.

22Mádi Luda kpɛ́ e wɛ́ra pìi gũnlo, zaakũ Dikiri Luda Gbãnasĩndapinkide kũ Sãnɛ Bɔ̀rɔɔoomɛ kpɛ́ pì ũ. 23Wɛ́ra pì bàka kú kũ ifãntɛ̃ ke mɔvura gupunaaoro. Luda gakuri mɛ́ àdi wɛ́ra pì pu, akũsɔ̃ Sãnɛ Bɔ̀rɔ de a fitila ũ. 24Burinɔ ni táa o a gupurai, andunia kínanɔ ni gɛ̃n kũ ń aruzɛkɛnɔ. 25A gãnunɔ nigɔ̃ tatana fãnantɛ̃ zikiro, gwãani nigɔ̃ kú gwe sɔ̃ro. 26Oni gɛ̃n kũ burinɔ aruzɛkɛnɔ kũ ń pɔ́ ɔgɔdenɔ. 27Ama pɔ́ gbãsĩ ke ni gɛ̃nlo ke wé'iyãkɛri ke manafikide, tó adi kɛ gbɛ̃ kũ Sãnɛ Bɔ̀rɔ ń tɔ́ kɛ̃̀ wɛ̃̀ndi takada gũnnɔ baasiro.

Currently Selected:

ZIA YÃ 21: BB2005

Highlight

Copy

Compare