ZIA YÃ 22

1Akũ malaikaa pì swa'i wɛ̃̀ndide kũ àtɛn bo Luda kũ Sãnɛ Bɔ̀rɔɔo gbà kĩnaa mɔ̀mɛnɛ, àtɛn tɛ́ kɛ lán gbɛ̀digi bà. 2Àtɛn bàa lɛ́ wɛ́ra zɛ́da guragura. Lí wɛ̃̀ndide kú a bara dire kũ a bara lao, àdi nɛ́ i wɛ̃̀ do gɛ̃̀n kuri awɛɛpla, mɔ kũ mɔo gɛ̃̀n dodo. Lí pì lánɔ bi burinɔ aafialekiamɛ. 3Pɔ kũ Luda lɛ́ kɛ̀nɛ ke nigɔ̃ kun doro. Luda kũ Sãnɛ Bɔ̀rɔɔo gbà nigɔ̃ kú wɛ́ra pìi gũn, a zɔ̀blerinɔ sɔ̃ oni doi. 4Oni a e wɛ́dewɛ, akũsɔ̃ a tɔ́ nigɔ̃ kú ń mì'arɛa. 5Gwã nigɔ̃ kun doro, gbɛ̃ke bàka nigɔ̃ kú kũ fitila ke ifãntɛ̃ gupuraoro, kũ Dikiri Luda ni gu puńnɛ yãi. Onigɔ̃ kí ble ari gɔrɔ sĩnda pínki. 6Akũ à òmɛnɛ: Yã birenɔ náani vĩ, akũsɔ̃ yãpuramɛ. Dikiri Luda kũ àdi do annabinɔnɛ arɛ mɛ́ à a malaikaa zĩ̀, de a zɔ̀blerinɔ yã kũ ani su tera dɔ̃.

Yesu ni su tera

7Ǹ gwa, mani su tera. Arubarikaden gbɛ̃ kũ à zia yã takada díkĩna yã kũna ũ.

8Makũ Yuhana makũmɛ ma yã birenɔ mà, ma è. Kũ ma mà, akũsɔ̃ ma è, ma kutɛ malaika kũ à yã pìnɔ mɔ̀mɛnɛ gbá sarɛ mà donyĩ kɛnɛ. 9Akũ à òmɛnɛ: Ǹ abire tó. Ǹ donyĩ kɛ Ludanɛ. N zɔ̀bleri daken ma ũ kũ n annabi gbɛ̃dakenɔ kũ gbɛ̃ kũ ò takada díkĩna yã kũnanɔ. 10Akũ à òmɛnɛ: Ǹsun pɔ́ kútɛ zia yã kũ à kú takada díkĩna gũnwaro, zaakũ a gɔrɔ kà kãni. 11Gbɛ̃ vãni wɛ́ tã àgɔ̃ a vãni kɛ. Gbãsĩde wɛ́ tã àgɔ̃ gbãsĩ. Gbɛ̃ mana wɛ́ tã àgɔ̃ a mana kɛ. Gbɛ̃ kũ à kú adona wɛ́ tã àgɔ̃ kú adona.

12Ǹ gwa, mani su tera, manigɔ̃ láada kũna, de mà fĩna bo baadinɛ a yãkɛnaaa. 13Alafa kũ Omɛgaon ma ũ, Arɛde kũ Kpɛdeo, Naana kũ Lakanaao. 14Arubarikadenɔn gbɛ̃ kũ ò ń utagyaba pìpinɔ ũ. Onigɔ̃ zɛ́ vĩ ò gɛ̃ wɛ́ra pì gãnunɔ gũn, ò lí wɛ̃̀ndide nɛ́ ble. 15Ama kifirinɔ nigɔ̃ kũ gwero, ɛzɛdenɔ kũ pãpãkɛrinɔ kũ gbɛ̃dɛrinɔ kũ tãnagbagbarinɔ kũ gbɛ̃ kũ ò ye manafiki yãkɛnaainɔ.

16Makũ Yesu ma a malaikaa zĩ̀ àgɔ̃ deárɛ yã pìnɔ sèedade ũ sɔsinɛ. Makũmɛ Dauda buri kpata kũ à bɔ̀tɔɔ pà Kína ũ, gudɔna susunɛ i nna ũ. 17Luda Nini kũ Sãnɛ Bɔ̀rɔ nɔ dufuo dì pi, ǹ mɔ́. Gbɛ̃ kũ à yã pìi mà sɔ̃, à pi, ǹ mɔ́. Gbɛ̃ kũ ími tɛn dɛ, à mɔ́. Gbɛ̃ kũ à ye í wɛ̃̀ndidei, à sí gba ũ.

18Matɛn pi gbɛ̃ kũ ò annabikɛtakada díkĩna yã mànɔnɛ ń pínki, tó gbɛ̃ yãke kàra a gũn, Luda ni kisira kũ ń yã kú takada díkĩna gũnnɔ kara adenɛ. 19Tó gbɛ̃ yãke bò takada díkĩna gũn sɔ̃, Luda ni ade baka bo a wɛ́ran kũ lí wɛ̃̀ndide kũ a yã kú takada díkĩna gũnwo.

20Gbɛ̃ kũ à de yã pìnɔ sèedade ũ pì: Yãpuramɛ, mani su tera.

Aami! Dikiri Yesu, ǹ mɔ́!

21Dikiri Yesu gɔ̃ gbɛ̃kɛ vĩ kũ a gbɛ̃nɔ ń pínki. Aami!

Currently Selected:

ZIA YÃ 22: BB2005

Highlight

Copy

Compare