ZIA YÃ 20

Kirisi kíblena andunia gũn wɛ̃̀ wàa sɔɔro

1Akũ ma malaikaa è bona ludambɛ, à Zĩngo wɛ̀ɛ lòkotoo mɔ̀nɛ kũna kũ mɔ̀kakɔ̃ana gbìgiriio. 2À kwã kũ à de mlɛ̃̀ zĩ ũ, kũ òdi pi Ibilisi ke Setan kũ̀, akũ à mɔ̀ɔ kàa ari wɛ̃̀ wàa sɔɔro. 3Malaikaa pì a zù Zĩngo wɛ̀ɛ lòkotoo pìi gũn, à zɛ́ tàrɛ à mɔ̀da kài à kã̀ de àsun burinɔ sãtɛro ari wɛ̃̀ wàa sɔɔro pì gɛ́ papao. Abire gbɛra oni a gbarɛ fíti.

4Akũ ma gbànɔ è kũ gbɛ̃ kũ ò vutɛnaanɔ. Ò ń gbá zɛ́ ò yãkpatɛ kɛ kũ gbɛ̃nɔo. Ma gbɛ̃ kũ ò ń mìi zɔ̃̀ Luda yã kũ Yesu de a sèedade ũ ona yãinɔ è. Odi kútɛ nɔ̀bɔ pãsĩ ke a takanɛro. Odi a sèeda kɛ ń mì'arɛ ke ń ɔaro. Ò vù gan, ò kí blè kũ Kirisio wɛ̃̀ wàa sɔɔro. 5Gɛ̀nɔ vuna káakupɔn gwe. Gɛ̀ kparanɔ dí vuro ari wɛ̃̀ wàa sɔɔro pìi gɛ̀ɛ à pàpao. 6Arubarikadenɔn gbɛ̃ kũ ń baka kú gɛ̀nɔ vuna káakupɔ gũnnɔ ũ, ò kú adona. Ga plade iko vĩḿmaro. Onigɔ̃ de Luda kũ Kirisio gbàgbarinɔ ũmɛ, onigɔ̃ kí ble kãao ari wɛ̃̀ wàa sɔɔro.

Setan zuna tɛ́n

7Tó wɛ̃̀ wàa sɔɔro pìi pàpa, oni Setan bo ò a gbarɛ. 8Ani gɛ́ buri kũ ò kú andunia kusuru siikɔ̃anɔ sãtɛ, Gɔgu kũ Magɔguo, ani ń kakara, de ò zĩ̀ ká. Ń dasi de lán ísiralɛ bùsu'atɛ̃ bà. 9Ò dà anduniala, ò lìka Luda gbɛ̃nɔ bùraai kũ wɛ́ra kũ Luda yeiio, ama tɛ́ bò ludambɛ à kũ̀ḿma. 10Ò Ibilisi kũ à ń sãtɛ sɛ̀ ò zù tɛ́ sɛ̀bɛ kũ àtɛn kũ kũ ifãntɛ̃gbɔ̃ɔo gũn, gu kũ ò nɔ̀bɔ pãsĩ kũ annabi ɛ́kɛo zùn. Onigɔ̃ wãwã ma fãnantɛ̃ kũ gwãanio gɔrɔ sĩnda pínki.

Yãkpatɛ kpɛde kɛnaa

11Akũ ma gbà pura zɔ̃kɔ̃ɔ è kũ gbɛ̃ kũ à vutɛnaaao. Zĩtɛ kũ musuo dibi lɛ̀ a arɛ, gu kunńnɛ doro. 12Akũ ma gyãwãndenɔ è, nɛ́ fíti gbɛ̃ zɔ̃kɔ̃, ò zɛna gbàa pì arɛ. Ò takadanɔ wɛ̃̀wɛ̃, akũ ò takada pãnde wɛ̃̀ dɔ wɛ̃̀ndi takada ũ. Ò yãkpatɛ kɛ̀ kũ gyãwãndenɔ ń yãkɛnaaa, lákũ a kɛ̃na takada pìnɔ gũn nà. 13Ísira gyãwãnde kũ ò kú a gũnnɔ kpà. Ga kũ Gyãwãnwo gyãwãnde kũ ò kú ń gũnnɔ kpà se. Akũ ò yãkpatɛ kɛ̀ kũ baadio a yãkɛnaaa. 14Ò ga kũ gyãwãnwo zù tɛ́ sɛ̀bɛɛ gũn. Tɛ́ sɛ̀bɛɛ pì bi ga plademɛ. 15Gbɛ̃ kũ odi ń tɔ́ le wɛ̃̀ndi takada gũnlonɔn ò ń zú tɛ́ sɛ̀bɛɛ pìi gũn.

Currently Selected:

ZIA YÃ 20: BB2005

Highlight

Copy

Compare