ZIA YÃ 2

Ɛfesudenɔ yã

1Ǹ kɛ̃ Ɛfesu sɔsi zĩ̀riinɛ: Makũ kũ má susunɛ mɛ̀n supplanɔ kũna ma ɔplan, matɛn kure wura fitiladibɔ mɛ̀n supplanɔ tɛ́, makũ mɛ́ ma yã díkĩna ò. 2Má n yãkɛnanɔ dɔ̃ kũ zĩ kũ ntɛn kɛo kũ n mɛnakɛnaao. Ndì we ǹ gbɛ̃ bɛ̃̀nɛnɔ ditɛro. Gbɛ̃ kũ òdi ń zĩda ditɛ Luda zĩ̀rinɔ ũ, akũsɔ̃ ò de a ũro, n ń lɛ́ n gwà n è ɛ́kɛdenɔmɛ ń ũ. 3N mɛna fɔ̃̀, n wari kɛ̀ ma tɔ́ yãi, ńdi kpasaro. 4Ama má yã vĩ kũnwo. Yenyĩ kũ ń vĩmɛnɛ káaku bùsa. 5Ǹ tó n kunna zĩ zaa gɔrɔ kũ ńdi busaro yã dɔngu. Ǹ nɛ̀sɛ litɛ, ǹgɔ̃ yã kũ ndì kɛ yãnɔ kɛ. Tó ńdi kɛ lɛro, mani sunyĩ, mà n fitiladibɔ go. 6Bee kũ abireo ń yã díkĩna vĩ, ń zã Nikolaitãnɔ yãkɛnanɔn lákũ ma zã̀ńgu nà. 7Gbɛ̃ kũ à sã vĩ, à yã kũ Luda Nini tɛn o sɔsi gbɛ̃nɔnɛ ma: Mani gbɛ̃ kũ à zĩ̀i blè gba zɛ́ à lí wɛ̃̀ndide kũ à kú Luda aruzennaa gũn nɛ́ ble.

Simiinadenɔ yã

8Ǹ kɛ̃ Simiina sɔsi zĩ̀riinɛ: Makũ kũ má de Arɛde kũ Kpɛdeo ũ, ma ga ma ɛra ma vu, makũ mɛ́ ma yã díkĩna ò. 9Má wɛ́tãmma kũ òtɛn mɔnnɛ dɔ̃ kũ n takasikɛnaao. Bee kũ abireo aruzɛkɛdemɛ n ũ. Gbɛ̃ kũ òdi pi Yudanɔmɛ ń ũ akũsɔ̃ ò de a ũronɔ, kũ ń aduakɛkpɛ de Setan pɔ́ ũ, má dɔ̃ lákũ òdi yã dimma nà. 10Ǹsun vĩna kɛ wari kũ ĩni kɛnɛro. Ǹ ma, Ibilisi ni á gbɛ̃kenɔ ká kpɛ́siran de à á yɔ̃ à gwa, ani wɛ́ tãáwa ari gɔrɔ kuri. Ǹgɔ̃ náani vĩ ari ǹgɔ̃ gɛ́ gao, mani aruzenna kɛnnɛ yàri ũ. 11Gbɛ̃ kũ à sã vĩ, à yã kũ Luda Nini tɛn o sɔsi gbɛ̃nɔnɛ ma: Ga plade ni wari dɔ gbɛ̃ kũ à zĩ̀i blèearo.

Pɛɛgamumudenɔ yã

12Ǹ kɛ̃ Pɛɛgamumu sɔsi zĩ̀riinɛ: Makũ kũ má fɛ̃nɛda lɛ́nna kpa plapla kũna, makũ mɛ́ ma yã díkĩna ò. 13Má n kúki dɔ̃, gu kũ Setan gbà kummɛ. Ń ma yã kũna, ńdi ledi kpámairo, bee gɔrɔ kũ ò ma sèeda yãpurade Antipa dɛ̀ n wɛ̃tɛn, gu kũ Setan kunn pìi. 14Ama má yã vĩ kũnwo fíti. Ń gbɛ̃nɔ vĩ gwe kũ ò Balamu yã kũna. Balaamu pì mɛ́ à dà Balakinɛ à Isarailanɔ gàtɛ à ń dá tãna pɔ́blen kũ pãpãkɛnaao. 15Lɛmɛ dɔ ń gbɛ̃nɔ vĩ gwe, ò Nikolaitãnɔ yã kũna. 16Abire yãi ǹ nɛ̀sɛ litɛ. Tó ńdi kɛ lɛro, mani sunyĩ tera mà zĩ̀ ká kũńwo kũ fɛ̃nɛda kũ à kú ma lɛ́nwo. 17Gbɛ̃ kũ à sã vĩ, à yã kũ Luda Nini tɛn o sɔsi gbɛ̃nɔnɛ ma. Mani gbɛ̃ kũ à zĩ̀i blè gba mana kũ à utɛnaa, mani a gba gbɛ̀ pura kũ ò tɔ́ dufu kɛ̃̀a dɔ. Gbɛ̃ke tɔ́ pì dɔ̃ro, séde gbɛ̃ kũ ma kpàaa pìi.

Tiatiradenɔ yã

18Ǹ kɛ̃ Tiatira sɔsi zĩ̀riinɛ: Makũ Luda Nɛ́ kũ ma wɛ́ de lán tɛ́nɛnɛ bà akũsɔ̃ ma gbá de lán mɔ̀gotɛ̃ bà, makũ mɛ́ ma yã díkĩna ò. 19Má n yãkɛnanɔ dɔ̃, n yenyĩ, n ludanaanikɛnaa, n zĩkɛna kũ n mɛnakɛnaao. Má dɔ̃ dɔ kũ yã kũ ntɛn kɛ kpɛkpɛ mana de a káakupɔla. 20Ama má yã vĩ kũnwo. N nɔgbɛ̃ Yɛzɛbɛli kũ à a zĩda dìtɛ annabi ũ gbà zɛ́. Àtɛni ma zɔ̀blerinɔ sãtɛ, àtɛn dańnɛ ò pãpã kɛ ò tãna pɔ́ ble. 21Ma a gbà zɛ́ à nɛ̀sɛ litɛ, ama à ye à a nɛ̀sɛ litɛ à pãpãkɛna tóro. 22Ǹ ma, mani a wútɛ gyãn, mani tó gbɛ̃ kũ ò pãpã kɛ̀ kãaonɔ wari zɔ̃kɔ̃ kɛ, tó odi nɛ̀sɛ litɛ ò a yã tòro. 23Mani a ìbanɔ dɛdɛ kũ gagagyão, sɔsi gbɛ̃ sĩnda pínki ni dɔ̃ kũ makũ mɛ́ madì gbɛ̃nɔ laasun kũ ń swɛ̃̀ɛo gwa, mani fĩna bo á baadinɛ a yãkɛnaaa. 24Á Tiatira gbɛ̃ kpara kũ á yã pì kũnaro, akũsɔ̃ á yã kũ òdi pi Setan asiri zɔ̃kɔ̃ dɔ̃ronɔ, mani aso pãnde diárɛro. 25À ɔ didi yã kũ á kũnaa ari màgɔ̃ gɛ́ su. 26Gbɛ̃ kũ à zĩ̀i blè, akũsɔ̃ à yã kũ má yeinɔ kũna ari a lɛ́a, mani a gba zɛ́ à gbãna ble burinɔa. 27Ani kí bleḿma kũ mɔ̀ gòoo à ń wíwi lákũ òdi ɛ̃ oro wíwi nà, lán ma De ma gba zɛ́ nà. 28Mani a gba gudɔna susunɛ dɔ. 29Gbɛ̃ kũ à sã vĩ, à yã kũ Luda Nini tɛn o sɔsi gbɛ̃nɔnɛ ma.

Currently Selected:

ZIA YÃ 2: BB2005

Highlight

Copy

Compare