ZIA YÃ 1

Takada díkĩna boki

1Luda yã kũ àtɛn su kɛ mɔ̀ Yesu Kirisinɛ de à biri a zɔ̀blerinɔnɛ, akũ à a malaikaa zĩ̀ makũ Yuhana a zɔ̀bleriia, à tò ma yã pìi dɔ̃̀. 2Luda yã kũ Yesu Kirisi de a sèedade ũn ma è, akũ matɛn o. 3Arubarikadenɔn gbɛ̃ kũ à zia yã díkĩna kyó kɛ̀ ũ kũ gbɛ̃ kũ ò a yã mà ò kũnanɔ, zaakũ a gɔrɔ kà kãni.

4Makũ Yuhana makũ mɛ́ ma takada díkĩna kɛ̃̀ sɔsi mɛ̀n suppla kũ ò kú Asia bùsuu gũnnɔnɛ. Luda kũ à kun yã, à kun tera, akũsɔ̃ àtɛn su kũ a Nini mɛ̀n suppla kũ ò kú a gbà arɛnɔ 5kũ Yesu Kirisi kũ à de sèedade yãpura ũo ò gbɛ̃kɛ kɛárɛ, ò á gba aafia. Yesu pìimɛ gàavu káaku ũ, àkũmɛ andunia kínanɔ gbãnade ũ. À yewái, à ó bo ó durunnanɔn kũ a aru gbãnao, 6à ó ká kpatan Luda a de gbàgbarinɔ ũ. Àkũ mɛ́ à gakuri kũ gbãnao vĩ gɔrɔ sĩnda pínki! Aami. 7Ǹ gwa, àtɛn su ludambɛ lukun. Gbɛ̃ sĩnda pínki ni a e, bee gbɛ̃ kũ ò a zɔ̃̀nɔ, andunia buri sĩnda pínki ni wɛ̃nda ɔ́ɔ dɔ a yã musu. Lɛmɛ! Aami.

8Dikiri Luda pì: Makũmɛ Alafa kũ Omɛgao ũ, Gbãnasĩndapinkide kũ má kun yã, ma kun tera, akũsɔ̃ matɛn su.

Yesu Kirisi bo à suna Yuhanaa

9Makũ Yuhana á gbɛ̃ do kunna Yesu gũn kɔ̃ gbɛ̃nɔn ó ũ wari gũn, kíblenaa gũn, mɛnakɛ gũn. Ma kú ísira luan kũ òdi pi Patamɔ Luda yã kũ Yesu de a sèedade ũ yãi. 10Dikiri gɔrɔ zĩ Luda Nini sùma, akũ ma kòto gbãna mà ma kpɛ lán kãkãki'ũ bà 11à pì: Ǹ pɔ́ kũ n è kɛ̃ takada gũn, ń kpãzã sɔsi mɛ̀n suppla kũ ò kú wɛ̃tɛ dínɔ gũnnɔnɛ: Ɛfesu, Simiina, Pɛɛgamumu, Tiatira, Saadi, Filadɛlɛfia kũ Laodiseao.

12Akũ ma litɛ, de mà gbɛ̃ kũ àtɛn yã o kũmaoo pì e. Kũ ma litɛ lɛ, ma wura fitiladibɔɔ è mɛ̀n suppla. 13Ma gbɛ̃ke è fitiladibɔɔ pìnɔ tɛ́ lán bisãsiri nɛ́ bà. À utagyaba dana, àtɛn gátɛ a gbá lɛ́a, à wura asa dɔ a gbãn. 14A mìkã de púu táitai lán sãkã ke buu bà, a wɛ́ de lán tɛ́nɛnɛ bà. 15A gbá tɛn tɛ́ kɛ lán mɔ̀gotɛ̃ kũ òtɛn baasa tɛ́vura gũn bà. A kòto de lán ísɔ̃kɛna kĩni bà. 16À susunɛnɔ kũna a ɔplan mɛ̀n suppla, fɛ̃nɛda lɛ́nna kpa plapla tɛn bo a lɛ́n. A ãn tɛn tɛ́ kɛ lán ifãntɛ̃ gbãna bà.

17Kũ ma a è, ma lɛtɛ a gbá sarɛ, ma gɔ̃ sã̀ii. Akũ à a ɔpla nàma à pì: Ǹsun tó vĩna n kũro. Makũmɛ Arɛde kũ Kpɛdeo ũ, 18gbɛ̃ kũ àdigɔ̃ kun ũ. Ma ga, akũ má kun, akũsɔ̃ manigɔ̃ kun ari gɔrɔ sĩnda pínki. Má ga kũ gyãwãnwo mɔ̀nɛnɔ kũna. 19Ǹ pɔ́ kũ n è kɛ̃, pɔ́ kũ ò kunnɔ kũ pɔ́ kũ oni su a kpɛnɔ pínki. 20Susunɛ mɛ̀n suppla kũ n è ma ɔplan pìnɔ kũ wura fitiladibɔ mɛ̀n suppla pìnɔ asirin dí: Susunɛ mɛ̀n suppla pìnɔ bi sɔsi mɛ̀n suppla pìnɔ zĩ̀rinɔmɛ, fitiladibɔ mɛ̀n suppla pìnɔ bi sɔsi mɛ̀n suppla pìnɔmɛ.

Currently Selected:

ZIA YÃ 1: BB2005

Highlight

Copy

Compare