ZIA YÃ 3

Saadidenɔ yã

1Ǹ kɛ̃ Saadi sɔsi zĩ̀riinɛ: Makũ kũ má Luda Nini mɛ̀n supplanɔ kũna kũ susunɛ mɛ̀n supplanɔ, makũ mɛ́ ma yã díkĩna ò. Má n yãkɛnanɔ dɔ̃. Kunna bɛ̃nɛ tɔ́ mɛ́ à dɔmma, ama gɛ̀ɛmɛ n ũ. 2Ǹ vu, ǹ gbɛ̃ kũ ò gɔ̃̀nnɛnɔ lɛ́ kũ flã̀ao ari ògɔ̃ gɛ́ ga, zaakũ ma è n yãke papana ma Ludanɛro. 3Abire yã mɛ́ à tò yã kũ n mà akũ n sì, ǹ tó àgɔ̃ dɔngu, ǹgɔ̃ kũna, ǹ nɛ̀sɛ litɛ. Tó ńdi vuro, mani sunyĩ lán kpãni bà, ĩnigɔ̃ gɔrɔ zaka kũ mani su dɔ̃ro. 4Bee kũ abireo ń gbɛ̃nɔ vĩ Saadi gwe fíti kũ odi ń pɔ́kasanɔ gbãsĩ kpáro. Óni kure lɛɛlɛ kũ pɔ́ purao dana, zaakũ ò kà a lɛ́i. 5Lɛn gbɛ̃ kũ à zĩ̀i blè nigɔ̃ pɔ́kasa pura dana lɛ. Mani a tɔ́ dɛdɛ wɛ̃̀ndi takadan zikiro. Mani zɛ kãao ma De kũ a malaikanɔ arɛ. 6Gbɛ̃ kũ à sã vĩ, à yã kũ Luda Nini tɛn o sɔsi gbɛ̃nɔnɛ ma.

Filadɛlɛfiadenɔ yã

7Ǹ kɛ̃ Filadɛlɛfia sɔsi zĩ̀riinɛ: Makũ kũ má kú madona yãpurade ũ, má Dauda mɔ̀nɛ kũna, madì zɛ́ wɛ̃ gbɛ̃ke dì fɔ̃ à a tataro, madì zɛ́ tata gbɛ̃ke dì fɔ̃ à a wɛ̃ro, makũ mɛ́ ma yã díkĩna ò. 8Má n yãkɛnanɔ dɔ̃. Ǹ ma, ma zɛ́ wɛ̃̀nnɛ n arɛ, gbɛ̃ke ni fɔ̃ à a tataro. Bee kũ n gbãna fíti, ń ma yã kũna, ńdi ledi kpámairo. 9Setan aduakɛkpɛ gbɛ̃ kũ òdi ń zĩda ditɛ Yudanɔ ũ, akũsɔ̃ ò de a ũronɔ, mani tó ɛ́kɛde pìnɔ su ò kútɛnnɛ, oni dɔ̃ kũ má yenyĩ. 10Zaakũ ń yã kũ ma dìtɛnnɛ kũna n fɔ̃ n mɛna, mani n sí wari kũ àtɛni su andunia pínki gũnwa, de à gbɛ̃ kũ ò kú zĩtɛnɔ yɔ̃ à ń gwa. 11Mani su tera. Ǹgɔ̃ pɔ́ kũ ń vĩ kũna gbãna, de gbɛ̃ke sún n láada símmaro yãi. 12Mani gbɛ̃ kũ à zĩ̀i blè kɛ ma Luda kpɛ́ gbɛ̀gba ũ. Ani bo zikiro. Mani ma Luda tɔ́ kɛ̃a kũ ma Luda wɛ̃tɛ Yurusalɛmu dufu kũ ani kipa bona a kĩnaa zaa musu tɔ́o kũ ma tɔ́ dufuo. 13Gbɛ̃ kũ à sã vĩ, à yã kũ Luda Nini tɛn o sɔsi gbɛ̃nɔnɛ ma.

Laodiseadenɔ yã

14Ǹ kɛ̃ Laodisea sɔsi zĩ̀riinɛ: Makũ Aami, sèeda náanide yãpura kũ má de pɔ́ kũ Luda kɛ̀nɔ mìde ũ, makũ mɛ́ ma yã díkĩna ò. 15Má n yãkɛnanɔ dɔ̃. Ń yĩdaro, akũsɔ̃ ń wãnaro. Má ye ǹgɔ̃ yĩda kesɔ̃ wãna. 16Lákũ ń lɔ́gɔlɔgɔ nà, ń wãnaro akũsɔ̃ ń yĩdaro, mani n pisimɛ. 17Ndì pi ɔgɔde aruzɛkɛde kũ ń pɔ́ke ni vĩromɛ n ũ. Ń dɔ̃ kũ gbɛ̃ pã pótompo barakɛri wɛ̃ndade takaside vĩ̀naamɛ n ũro. 18Matɛn lɛ́ damma, ǹ wura baasana lú ma kĩnaa, de ǹ kɛ ɔgɔde ũ. Ǹ pɔ́kasa pura lú ǹ da, de ǹ n pótompokɛ utɛ ǹ bo wé'in. Ǹ wɛ́ ɛzɛ lú ǹ ká n wɛ́n, de ǹ gu e. 19Madì kpãkɛ̃ gbɛ̃ kũ má yeńyĩnɔi mà ń toto. Abire yã mɛ́ à tò, ǹ wɛ́ tã ǹ nɛ̀sɛ litɛ. 20Ǹ gwa, má zɛna kpɛ́lɛlɛa, matɛn gbà lɛ́. Tó gbɛ̃ ma kòtoo mà, akũ à zɛ́ wɛ̃̀mɛnɛ, mani gɛ̃ mà pɔ́ ble kãao, ani ble kũmao. 21Mani gbɛ̃ kũ à zĩ̀i blè gba zɛ́ à vutɛ kũmao ma gbàaa, lákũ makũ ma zĩ̀i blè ma vutɛ kũ ma Deo a gbàaa nà. 22Gbɛ̃ kũ à sã vĩ, à yã kũ Luda Nini tɛn o sɔsi gbɛ̃nɔnɛ ma.

Currently Selected:

ZIA YÃ 3: BB2005

Highlight

Copy

Compare