2 KƆRINTIDENƆ 5

1Ó dɔ̃ kũ tó ó sɔ̀ kũ ó kun kpɛ́ ũ andunia dí gũn yàka, Luda ni kpɛ́ kũ odi bo kũ ɔoro kpáwá a bɛa ari gɔrɔ sĩnda pínki. 2Tera sɔ̃ odì nda sɔ̀ɔ pìi gũn, ó ye ò ludambɛ pɔ́ pì da, 3zaakũ tó o bo sɔ̀n, ónigɔ̃ kun mɛ̀ɛ sariro. 4Gɔrɔ kũ ó kú sɔ̀ díkĩna gũn, odì nda lákũ ó aso sɛna bà. Adi kɛ ó ye ò bo a gũnnlo, ó ye ò ludambɛ pɔ́ damɛ, de wɛ̃̀ndi ó sɔ̀ kũ ani ga pì mɔ́. 5Abire yãin Luda ó soru kɛi, akũ à a Nini kpàwá pɔ́ kũ óni le zɛnkpɛkɛ ũ.

6Abire yãi ó swɛ̃̀ɛ dìgɔ̃ gbãna. Ó dɔ̃ gɔrɔ kũ ó kú mɛ̀ díkĩna gũn, ó kú Dikiri kĩnaaro. 7Zaakũ ludanaanikɛnaan ó kúo, adi kɛ wɛ́sinaalɛ yãnlo. 8Ó swɛ̃̀ɛ dìgɔ̃ gbãna. Bona sɔ̀ɔ pìn gɛna Dikiri kĩnaan ó yei. 9Kunna mɛ̀ɛ gũnn yá, bona a gũnn yá, odìgɔ̃ wɛtɛ ó yã káagu. 10Zaakũ Kirisi nigɔ̃ vutɛna a tìntinnwa, ó pínki óni bo ò zɛ a arɛ, ani fĩna bo ó baadinɛ a kunna mɛ̀ɛ gũn yãkɛnaa, a mana ke a vãni.

Bisãsirinɔ kɛna nna kũ Ludao zĩ

11Lákũ ótɛn vĩna kɛ Dikirinɛ lɛ nà, odì wɛtɛ gbɛ̃nɔ yã pì zɛ́ e. Luda ó dɔ̃ sãnsãn, akũsɔ̃ ó ye à ó dɔ̃ á swɛ̃̀n lɛ dɔ. 12Ótɛni ó zĩda sáabu kpáárɛ dɔnlo, ótɛni á gba zɛ́ à ĩa dã ó yã musumɛ, de à le à yã we gbɛ̃ kũ àdi ĩa dã kũ mɛ̀ yão, adi kɛ swɛ̃̀ yãnloa. 13Tó átɛn da ó mìi lìtɛ, Luda yãimɛ. Tó ó kú ó dɔ̀rɔɔa, á yãimɛ. 14Zaakũ Kirisi yenyĩ mɛ́ àtɛn tɛ́ káógu. O è tó gbɛ̃ mɛ̀n do gà gbɛ̃ sĩnda pínki yãi, ò gà ń pínkin gwe. 15À gà gbɛ̃ sĩnda pínki yãi, de gbɛ̃ kũ ò gɔ̃̀nɔ súngɔ̃ kun ń zĩda pɔ́ ũ doro, séde gbɛ̃ kũ à gà ń yãi à vù pɔ́.

16Abire yãi odì gbɛ̃ke gwa lákũ andunia gbɛ̃nɔ dì gwa nà tera doro. Bee kũ ó Kirisi dɔ̃ lákũ andunia gbɛ̃nɔ a dɔ̃ nà yã, ó a dɔ̃ lɛ tera doro. 17Zaakũ tó gbɛ̃ kú Kirisi gũn, à gɔ̃̀ gbɛ̃ dufu ũ. A kunna zĩ gɛ̃̀tɛ, kunna dufu mɛ́ à gɔ̃̀nɛ. 18Abire bò Luda kĩnaamɛ pínki. À ó kɛ́ kãao nna Kirisi gãi, akũ à gbɛ̃nɔ kɛna nna kãao zĩ dàwɛrɛ. 19Kirisi gũn Luda andunia kɛ̀ kãao nna gbɛ̃nɔ taarinɔ yã danaa sari, akũ à gbɛ̃nɔ kɛna kãao nna pì yã nàwɛrɛ ó ɔĩ. 20Abire yãi Kirisi gɛ̃nɛnɔn ó ũ. Luda tɛn gbɛ̃nɔ sísi ó gãi. O kútɛ kɛ̀árɛ Kirisi gbɛ̀n, à kɛ nna kũ Ludao. 21Luda tò durunnasaride gɔ̃̀ durunna kútɛkɛbɔ ũ ó yãi, de kunna a gũn Luda tó yã bo kũoo nna.

Currently Selected:

2 KƆRINTIDENƆ 5: BB2005

Highlight

Copy

Compare