2 KƆRINTIDENƆ 4

Luda zĩ̀rinɔ zĩ

1Abire yãi lákũ Luda zĩ bire dàwɛrɛ a sùruu gũn nà, odì kpasaoro. 2O ɔ gbàrɛ asiri wé'isariyãnɔi, odì yã kɛ kũ manafikioro, akũsɔ̃ odì Luda yã kotiro. Odì yãpura ońnɛ súsu, de ò ó zĩda mɔ gbɛ̃ sĩnda pínkinɛ Luda arɛ. 3Tó baaru nna kũ ótɛn kpá utɛnamɛ, gbɛ̃ kũ ò sãtɛnanɔn à utɛnańnɛ. 4Zaakũ andunia díkĩna dikiri Yesusaridenɔ wɛ́ vĩ̀na kũ̀ńnɛ, de òsun baaru nna sí, Kirisi kũ à de Luda taka ũ gakuri gu puńnɛro yãimɛ. 5Ó zĩda kpàkpan ótɛn kɛro, Yesu Kirisi dikirikɛ kpàkpan ótɛn kɛ, akũsɔ̃ ótɛn zɔ̀ bleárɛ a yãi. 6Luda pì, gu pu gusiran, akũ à gu pù ó swɛ̃̀n lɛ dɔ. Gupura pì de a gakuri kũ àtɛn tɛ́ kɛ Kirisi ãnnwa dɔ̃na ũ.

7Ó aruzɛkɛ bire vĩ ó mɛ̀ kũ ò de lán ɛ̃ oro bànɔ gũn, de ò le ò dɔ̃ kũ gbãna zɔ̃kɔ̃ɔ pìi bò Luda kĩnaamɛ, adi kɛ ó kĩnaanlo. 8Òdigɔ̃ wari dɔwá kpa sĩnda pínkia, bee kũ abireo odì fuaro. Òdi bídi kɛ, ama ó tãmaa dì lákaro. 9Òdi wɛ́ tãwá, ama Luda dì ó tónlo. Òdi ó pãtɛ, ama odì garo. 10Gɔrɔ sĩnda pínki ó kú Yesu ga taka buri lɛ́i, de a kunna le à pisi ó mɛ̀ɛa yãi. 11Zaakũ ókɔ̃nɔ kũ ó bɛ̃nɛnɔ odìgɔ̃ kú ga lɛ́i Yesu yãi, de a kunna le à pisi ó mɛ̀ kũ ani gaa yãi. 12Lɛn ga pì tɛn zĩ kɛ ó gũn lɛ, akũsɔ̃ wɛ̃̀ndi tɛn zĩ kɛ á gũn. 13À kɛ̃na Luda takadan ò pì: Má Luda náani vĩ, akũ ma yã ò. Ókɔ̃nɔ sɔ̃, o Luda náani dokɔ̃nɔ pìi kɛ̀, akũ ótɛn yã o a yãi. 14Zaakũ ó dɔ̃ kũ lákũ Luda Dikiri Yesu vù gan nà, ani ó vu kãao gan se, ani ó kátɛ a arɛ lɛɛlɛ kũ ákɔ̃nɔ. 15Yã dínɔ pínki tɛni ó lé á yãi, de Luda gbɛ̃kɛ kũ àtɛn li gbɛ̃nɔi dasi le a sáabukpana kara a tɔ́bona yãi.

Wɛ́dɔna mɛ̀ dufui

16Abire yãi odì kpasaro. Bee tó ó mɛ̀ tɛn kakatɛ, ó nini dìgɔ̃ dufu kũ lákũ gu dìgɔ̃ dɔ nà. 17Ó wɛ́tãmma gɔrɔ do lɛɛkɛɛnle díkĩna tɛn gakuri zɔ̃kɔ̃ kũ àdi lákaro iwɛrɛ, kũ adi sí lɛkɔ̃aro. 18Ó wɛ́ pɛ́ pɔ́ kũ òdi wɛ́ sialɛaro, sé pɔ́ kũ òdi wɛ́ sialɛro. Zaakũ pɔ́ kũ òdi wɛ́ sialɛ bi gɔrɔ pla pɔ́mɛ. Pɔ́ kũ òdi wɛ́ sialɛro sɔ̃, àdigɔ̃ kun gɔrɔ sĩnda pínki.

Currently Selected:

2 KƆRINTIDENƆ 4: BB2005

Highlight

Copy

Compare