1 PITA 4

Bona kunna zĩn

1Lákũ Kirisi wari kɛ̀ a mɛ̀n nà, ákɔ̃nɔ se à nɛ̀sɛ bire buri sɛ́, zaakũ gbɛ̃ kũ à wari kɛ̀ a mɛ̀n, ade mìi kɛ̃̀ durunnaamɛ. 2Gɔrɔ kũ à gɔ̃̀árɛ á kunnaa gũn, á dà vãni súngɔ̃ doárɛ arɛ doro, séde Luda pɔyenyĩnaa. 3Á kunna kifirinɔ yãkɛnaa gũn yã mɔ̀ lɛ. Yã á kú wé'isariyãkɛnaa gũn kũ dàvãninidɛnaao kũ wɛ̃dɛkɛnaao kũ pãpã kɔ̃kɔ̃o kũ wɛ̃mikɔ̃kɔ̃ bɛ̃̀nɛɛo kũ tãnagbagbana kũ Luda zã̀aguo. 4Kũ adì kakara kũńwo ń pãpã zɔ̃kɔ̃ɔ pì kɛnaa gũn doro, àdi kɛńnɛ yãbonsarɛ ũ, akũ òdi á tɔ́ vãni sí. 5Oni ń yãkɛnanɔ baba Ludanɛ, kũ à yãkpatɛkɛna kũ gbɛ̃ bɛ̃nɛnɔ kũ gyãwãndenɔ soru kɛ̀. 6Ò baaru nna kpà bee gyãwãnde pìnɔnɛ se, de ò le ògɔ̃ kú ninikɛ gũn lán Luda bà, bee kũ yã vùtɛḿma mɛ̀ɛ gũn lán gbɛ̃ sĩnda pínki bà.

Ludayãmarinɔ

7Pɔ́ sĩnda pínki lakanaa kà kãni. Abire yãi àgɔ̃ de laakaridenɔ ũ, àgɔ̃ á zĩda kũna dɔ̃ de àgɔ̃ adua kɛ yãi. 8Yã kũ à de a pínkilan dí: Àgɔ̃ yekɔ̃i kũ nɛ̀sɛ mɛ̀n doo, zaakũ yenyĩ dì pɔ́ kútɛ durunnanɔa dasi. 9À yàri kɛkɔ̃nɛ yãketekanaa sari. 10Lákũ Luda gba dà á baadinɛ nà, à kpákɔ̃i kũ gba pìnɔ Luda gba buri donadona zĩkɛri mananɔ ũ. 11Gbɛ̃ kũ à de waazikɛri ũ, à Luda yã ońnɛ. Gbɛ̃ kũ à de kpanyĩri ũ, à kpáńyĩ kũ gbãna kũ Luda a gbào, de à Luda tɔ́ kpá yã sĩnda pínki gũn Yesu Kirisi gãi. Àkũ mɛ́ à gakuri vĩ kũ gbãnao gɔrɔ sĩnda pínki! Aami.

Warikɛna Yesudekɛ yãi

12Ma gbɛ̃ yenyĩdenɔ, àsun tó yɔ̃ogwana pãsĩ kũ àtɛni á le bo á sarɛ lákũ yã dufu mɛ́ à á lé bàro. 13Lákũ á bàka kú Kirisi warikɛnaa gũn nà, à pɔnna kɛo de à le àgɔ̃ pɔnna zɔ̃kɔ̃ vĩ gɔrɔ kũ Kirisi pì ni bo gupuraa kũ gakurio. 14Tó ò á sɔ̃sɔ̃ Kirisi tɔ́ kũ à kúáwa yãi, á arubarika vĩ, zaakũ Luda Nini gakuride kúáwa. 15Á gbɛ̃ke sún wari kɛ gbɛ̃dɛna ke kpãni'ona ke yãbɛ̃nɛkɛna ke gudɛ yãiro. 16Tó a wari kɛ̀ á Yesudekɛ yãi, àsun kɛárɛ wé'iyã ũro. À Luda sáabu kpá kũ Yesu tɔ́ kúáwa yãi. 17Zaakũ wɛ́tãmmagɔrɔ kà, Luda gbɛ̃nɔn à nàa kũńwo. Lákũ ókɔ̃nɔmɛ à nàa kũoo káaku nà, ani láka kũ gbɛ̃ kũ ò gì Luda baaru nna mainɔo deramɛɛ?

18Zaakũ gbɛ̃ mananɔ surabana zĩ'ũ,

yã ni bo kũ ludayãdarisarinɔ kũ durunnakɛrinɔo deramɛɛ?

19Abire yãi gbɛ̃ kũ òtɛn wari kɛ Luda pɔyenyĩnaa gũnnɔ ń zĩda na ń Kɛ̀ri náanidenɛ a ɔĩ, ò kpɛ́ ògɔ̃ yã mana kɛ.

Currently Selected:

1 PITA 4: BB2005

Highlight

Copy

Compare