1 PITA 5
5
Luda sã kpàsa gwanaa
1Matɛn lɛ́ da ákɔ̃nɔ gbɛ̃ zɔ̃kɔ̃nɔa sà. Gbɛ̃ zɔ̃kɔ̃ɔn ma ũ se. Má de wari kũ Kirisi kɛ̀ɛ sèedade ũ, akũsɔ̃ ma bàka nigɔ̃ kú kũ gakuri kũ ani bo gupuraaao se. 2Àgɔ̃ de kpàsa kũ Luda kàtɛárɛ dã̀rinɔ ũ. À ɔ likai kũ pɔyeinaao, adi kɛ tilasinlo, lákũ Luda yei nàmɛ. Adi kɛ ɔgɔwɛtɛna yãinlo. À kɛ kũ nɛ̀sɛ mɛ̀n doo dé. 3Àsungɔ̃ gbãna mɔ gbɛ̃ kũ ò ń náárɛ á ɔĩ pìnɔaro. À tó á kunna gɔ̃ á sã pìnɔ da a zɛ́a, 4áni kífura kũ a gakuri dì lákaro le gɔrɔ kũ Sãdãriki ni su.
5Ákɔ̃nɔ kɛfɛnnanɔ sɔ̃, à á zĩda kpá gbɛ̃ zɔ̃kɔ̃nɔa. Á pínki à á zĩda busakɔ̃nɛ à kpákɔ̃i, zaakũ
Luda dì ibɛrɛ sɛ́ kũ zĩdabirinɔ,
ama à gbɛ̃kɛ vĩ kũ zĩdabusarinɔ.
6Abire yãi à á zĩda busa Luda gbãnadenɛ, ani á kara gɔrɔ kũ à dìtɛa. 7À á yã'ũmmananɔ tónɛ pínki, zaakũ àdi laakari dɔáwa.
8Á wɛ́ gɔ̃ dɔ, àgɔ̃ kú á laakariia. Á ibɛrɛ Ibilisi de lán músu ɔ́ɔdɔrii bàmɛ. Àtɛn kpátɛ kɛái, àtɛn gbɛ̃ wɛtɛ à kũ. 9À gínɛ, à zɛ gbãna ludanaanikɛnaa gũn, zaakũ á dɔ̃ kũ á Yesude dake kũ ò kú andunia gũnnɔ ń pínki tɛn wari dokɔ̃nɔ pì kɛmɛ se. 10Luda Arubarikasĩndapinkide á sisi a gakuri kũ àdi lákaroa Kirisi gũn. Tó a wari kɛ̀ fíti, ani á bo mana, ani á zɛ gíngin, ani á gba gbãna, ani á zĩni pɛ́tɛ. 11Àkũ mɛ́ à gbãna vĩ ari gɔrɔ sĩnda pínki! Aami.
Lɛ́zammanaa
12Ma takada fíti dí kɛ̃̀árɛ kũ ó gbɛ̃ndo Silasi ɔomɛ. À demɛnɛ gbɛ̃ náanide ũ. Ma lɛ́ dàáwa, má de a sèedade ũ kũ yã kũ ma ò de Luda gbɛ̃kɛ yãpura ũ. À zɛo gíngin. 13Babilɔnu gbɛ̃ kũ Luda ń sɛ́ lán á bànɔ fɔ kpàáwa. Ma nɛ́ Maaku fɔ kpàáwa dɔ. 14À fɔ kpákɔ̃a kũ lɛ́pɛmmanaao yenyĩ gũn. Luda ákɔ̃nɔ kũ á kú Kirisi gũnnɔ gba aafia á pínki.
Currently Selected:
1 PITA 5: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
