1 YUHANA 2

1Ma nɛ́ yenyĩdenɔ, matɛn yã bire oárɛ de àsun durunna kɛro yãimɛ. Ama tó á gbɛ̃ke durunna kɛ̀, ó Zɛkũnwode vĩ De Luda kĩnaa, àkũmɛ taarisaride Yesu Kirisi ũ. 2Àkũmɛ ó durunnanɔ kútɛkɛbɔ ũ. Adi kɛ ó durunnanɔn adoro, kũ andunia pínki gbɛ̃nɔ pɔ́oomɛ.

3Tó ó yã kũ à dìtɛnɔ kũna, abirekũ mɔ̀wɛrɛ yãpura kũ ó a dɔ̃. 4Tó gbɛ̃ pì á a dɔ̃, akũ à a yã kũ à dìtɛnɔ kũnaro, ɛ́kɛdemɛ, yãpura kú a swɛ̃̀ɛ gũnlo. 5Gbɛ̃ kũ à a yã kũna sɔ̃, Luda yenyĩ papana a gũn yãpura. Pɔ́ kũ ani tó ò dɔ̃ kũ ó kú a gũnn dí: 6Gbɛ̃ kũ à pì á kú a gũn, séde àgɔ̃ kun lákũ Kirisi kun nà yã.

Yã dufu ditɛnaa

7Ma gbɛ̃ yenyĩdenɔ, adi kɛ yã dufun matɛn oárɛro, yã zĩ kũ ò dìtɛárɛ zaa káakumɛ. Yã zĩ pìimɛ yã kũ a mà ũ. 8Bee kũ abireo yã kũ matɛn oárɛ dufumɛ dɔ, òdi a yãpura e a kĩnaa kũ á kĩnaao, zaakũ gusira tɛn gɛ̃tɛ, akũ gupura yãpura tɛn pu sà.

9Gbɛ̃ kũ à pì a kú gupuran, akũ à zã a gbɛ̃dakegu, ade kú gusira gũmmɛ ari tera. 10Gbɛ̃ kũ à ye a gbɛ̃dakei kú gupuran, a yãke dì tó gbɛ̃ke furo. 11Gbɛ̃ kũ à zã a gbɛ̃dakegu kú gusiran, à tɛ́ gusiran, à dɔ̃ gu kũ àtɛn gɛ́nlo, kũ gusira a vĩ̀na kũ̀ yãi.

12Ma nɛ́ yenyĩdenɔ, matɛni abirekũ oárɛ

kũ á durunnanɔ kɛ̃̀áwa a tɔ́ gãi yãimɛ.

13Marenɔ, matɛni abirekũ oárɛ

kũ á gbɛ̃ kũ à kun zaa káaku dɔ̃ yãimɛ.

Kɛfɛnnanɔ, matɛni abirekũ oárɛ

kũ a zĩ̀i blè Setanwa yãimɛ.

Ma nɛ́ yenyĩdenɔ, ma òárɛ

kũ á De Luda dɔ̃ yãimɛ.

14Marenɔ, ma òárɛ

kũ á gbɛ̃ kũ à kun zaa káaku dɔ̃ yãimɛ.

Kɛfɛnnanɔ, ma òárɛ

kũ á gbãna vĩ, Luda yã kú á swɛ̃̀ɛ gũn dɔ,

akũsɔ̃ a zĩ̀i blè Setanwa yãimɛ.

15Àsungɔ̃ ye anduniairo, kesɔ̃ pɔ́ kũ ò kú a gũnnɔ. Tó gbɛ̃ ye anduniai, à ye De Ludairo. 16Zaakũ yã kũ à kú andunia gũn pínki, mɛ̀ pɔ́nidɛna kũ wɛ́pio kũ aruzɛkɛ ĩadãnaao, adi bo De Luda kĩnaaro, à bò andunia kĩnaamɛ. 17Andunia tɛn gɛ̃tɛ kũ a pɔ́nidɛnaao, ama ludapɔyenyĩnakɛri nigɔ̃ kun gɔrɔ sĩnda pínkimɛ.

Kirisi ibɛrɛɛ

18Ma nɛ́ yenyĩdenɔ, gɔrɔ kpɛden ó kun dí. Lákũ a mà kũ Kirisi ibɛrɛ tɛn su nà, a ibɛrɛnɔ gĩnakɛ ò kɛ̀ dasi. Abirekũ mɔ̀wɛrɛ kũ ó kú gɔrɔ kpɛde gũn. 19Gbɛ̃ pìnɔ bò ó kĩnaamɛ, ama ó gbɛ̃nɔnlo. Tó ó gbɛ̃nɔmɛ yã de ò kú kũoo. Ò bò de ò dɔ̃ kũ ń gbɛ̃ke de ó gbɛ̃ ũro yãimɛ.

20Ákɔ̃nɔ sɔ̃, Luda a Nini dìárɛ, akũ á yãpura dɔ̃ á pínki. 21Ma abire òárɛ, kũ á yãpura dɔ̃ yãimɛ, adi kɛ kũ á dɔ̃ro yãinlo. Á dɔ̃ kũ ɛ́kɛ ke dì bo yãpura gũnlo. 22Dín ɛ́kɛde ũu? Gbɛ̃ kũ à gì Yesu Arumasihukɛnaaimɛ. Gbɛ̃ bire takan Kirisi ibɛrɛ ũ, à gì De Ludai kũ a Nɛ́omɛ. 23Gbɛ̃ kũ à gì Luda Nɛ́i De Luda vĩro. Gbɛ̃ kũ à zɛ̀ kũ Luda Nɛ́o mɛ́ à De Luda vĩ dɔ.

24À tó yã kũ a mà zaa káaku gɔ̃ kú á swɛ̃̀ɛ gũn. Tó yã kũ a mà zaa káaku pì kú á swɛ̃̀ɛ gũn, ákɔ̃nɔ sɔ̃, anigɔ̃ kú Luda Nɛ́ gũn kũ a Deo. 25Pɔ́ kũ Kirisi a lɛ́ sɛ̀wɛrɛn wɛ̃̀ndi kũ àdi lákaro ũ.

26Ma yã bire òárɛ gbɛ̃ kũ òtɛni á sãtɛnɔ yã musu. 27Ákɔ̃nɔ sɔ̃, Nini kũ a lè Kirisia kú á gũn. Á bàka kú kũ gbɛ̃ke yã dadanaárɛoro, zaakũ a Nini tɛn yã sĩnda pínki dadaárɛ, à yãpura vĩ, ɛ́kɛ kú a gũnlo. Lákũ àtɛn dadaárɛ nà, àgɔ̃ kú Kirisi gũn lɛ.

28Tera sà ma nɛ́ yenyĩdenɔ, àgɔ̃ kú a gũn, de gɔrɔ kũ à bò gupuraa, ó swɛ̃̀ gɔ̃ ditɛna, wé'i sún ó kũ a sugɔrɔ zĩro.

29Zaakũ á dɔ̃ kũ Luda mana, àgɔ̃ dɔ̃ kũ yãmanakɛri sĩnda pínki bi a nɛ́mɛ.

Currently Selected:

1 YUHANA 2: BB2005

Highlight

Copy

Compare