1 YUHANA 3

Luda nɛ́nɔ

1À gwa lákũ De Luda yewái à kɛ̀ zɔ̃kɔ̃ nà ari àdi ó sísi a nɛ́nɔ. Ó a ũ sɔ̃! Andunia ó dɔ̃ro, kũ adi a dɔ̃ro yãi. 2Ma gbɛ̃ yenyĩdenɔ, Luda nɛ́nɔn ó ũ tera, lákũ ónigɔ̃ de nà dí bo gupuraa kɔ̀ro. Ó dɔ̃ kũ gɔrɔ kũ ani bo gupuraa, ónigɔ̃ de lán a bà, zaakũ óni a e lákũ à de nà. 3Gbɛ̃ kũ à wɛ́ dɔi lɛ dì a swɛ̃̀ pu, lákũ Kirisi swɛ̃̀ punaa nà.

4Gbɛ̃ kũ à durunna kɛ̀ɛ bò doka kpɛmɛ, zaakũ durunnakɛna bi bona doka kpɛmɛ. 5Á dɔ̃ kũ Kirisi sù durunnakɛ̃mmana yãimɛ, durunna sɔ̃ à kú a swɛ̃̀ɛ gũnlo. 6Gbɛ̃ kũ à kú a gũn dìgɔ̃ kpɛ́ àgɔ̃ durunna kɛro. Durunnakɛri ke dí a ero, adi a dɔ̃ro.

7Ma nɛ́nɔ, àsun tó gbɛ̃ke á sãtɛro, yãmanakɛri mɛ́ à mana, lákũ Kirisi mana nà. 8Gbɛ̃ kũ àdi durunna kɛ bi Ibilisi pɔ́mɛ, zaakũ Ibilisi durunna kɛ̀ zaa káakumɛ. Ibilisi yãnɔ kakatɛna yãimɛ Luda Nɛ́ sù. 9Gbɛ̃ kũ Luda a ì dìgɔ̃ kpɛ́ àgɔ̃ durunna kɛro, zaakũ Luda buri mɛ́ à kú a gũn. Ani fɔ̃ àgɔ̃ kpɛ́ gɔ̃ durunna kɛro, kũ Luda a ì yãi. 10Lákũ ó Luda nɛ́nɔ dɔ̃kɔ̃nɛ kũ Ibilisi nɛ́nɔon dí: Gbɛ̃ kũ àdi yã mana kɛro kesɔ̃ gbɛ̃ kũ à ye a gbɛ̃dakeiro bi Luda nɛ́nlo.

Yekɔ̃inaa

11Yã kũ a mà zaa káakun dí: Ògɔ̃ yekɔ̃i. 12Àsungɔ̃ de lán Kainu bàro. À de Setan pɔ́ ũmɛ, akũ à a dakũna dɛ̀. Bɔ́ yã mɛ́ à tò à a dɛ̀ɛ? Kũ a yãkɛna bɛ̃̀nɛ, akũsɔ̃ a dakũna pɔ́ mana yãimɛ. 13Ma gbɛ̃nɔ, tó andunia zã̀águ, àsun tó à bo á sarɛro. 14Ó dɔ̃ kũ o bo gan o gɛ̃ wɛ̃̀ndii gũn, kũ ó ye ó Yesude dakenɔi yãi. Gbɛ̃ kũ à ye gbɛ̃iro bi gɛ̀ɛmɛ ari tera. 15Gbɛ̃ kũ à zã̀ a gbɛ̃dakegu bi gbɛ̃dɛriimɛ. Á dɔ̃ kũ gbɛ̃dɛri ke dìgɔ̃ wɛ̃̀ndi kũ àdi lákaro vĩ a gũnlo.

16Yã kũ ó yenyĩ pì dɔ̃̀aan dí: Kirisi a zĩda kpà ó yãi. Ókɔ̃nɔ sɔ̃, séde ò ó zĩda kpá ó Yesude dakenɔa. 17Tó gbɛ̃ andunia pɔ́ vĩ, akũ à è a Yesude dake kú pɔ́nidɛnaa gũn, tó adi a wɛ̃nda gwaro, Luda yenyĩ kú a swɛ̃̀ɛ gũn yá? 18Ma nɛ́ yenyĩdenɔ, òsungɔ̃ yekɔ̃i kũ lɛ́oro. Ògɔ̃ yekɔ̃i yãpura gũn kũ ó yãkɛnaao. 19Abire mɔ̀wɛrɛ kũ yãpura gbɛ̃nɔn ó ũ, gbasa ó swɛ̃̀ le àgɔ̃ ditɛna Luda arɛ. 20Tó ó laasun tɛni ó kù vĩ sɔ̃, ó dɔ̃ kũ Luda zɔ̃kɔ̃ de ó laasunla, à yã sĩnda pínki dɔ̃.

21Ma gbɛ̃ yenyĩdenɔ, tó ó laasun tɛni ó kù vĩro, ó swɛ̃̀ nigɔ̃ ditɛna Luda arɛ, 22kũ ó yã kũ à dìtɛnɔ kũna, akũ ótɛn yã kũ àdi kɛnɛ nna kɛ yãi, óni pɔ́ kũ o gbɛ̀kaa e. 23Yã kũ à dìtɛwɛrɛn dí: Ò a Nɛ́ Yesu Kirisi náani kɛ, ógɔ̃ yekɔ̃i lákũ à dìtɛwɛrɛ nà. 24Gbɛ̃ kũ à yã kũ à dìtɛnɔ kũna kú a gũn, Luda pì kú ade gũn se. Ó dɔ̃ kũ à kú ó gũn a Nini kũ à kpàwá yãi.

Currently Selected:

1 YUHANA 3: BB2005

Highlight

Copy

Compare