Sâm 31
31
Nshwam-Dyityém etî ké Osówo
1Mu m-bâ n-kâm ǒ n/fu, ku mě.
*Dabángê ne banyá ba-kpógê mě*.
Wo amu Osówo mú mu o-chi i kanong.
Me mu n-fâ nshwam n/fu, nyii mě.
2Jwo mě, nyii mě kántîk.
Kyú mě kyikit-dyirem eringe nyí aa*bángê chwǒm kyi-ta mě*
a-kyú mě onet mú mu o-ku ng mě eringe nyí ada mě enyii.
3Wo amu kyikit-dyirem ne onet mú mu o-ku ng mě.
Bám mě a-tông mě kiǐfáng
wǎ eringe nyí a/ryí ocím.
4*Dabángê n-róng ké kaǎtám ńké baa/kuu ba-tî mě*.
Fîm mě ké ofene.
5Me n/yip byiko ejí n-kye ǒ n/fu, tún mě.
Óburúkpâbí, wo a/chi a-nyii mě.
Wo Osówo mú mu o-tî ng ocím mú o/ryí.
6Banet ḿbé mbe ba-kyâ esówo nyí e*fí ké kafâ* ofê [ba-sa ng ǒ kafâ.]
Nké me n/tî dyityém ké wo.
7Me n/chi n-kyú ké bunyîn-dyityém
n-jêe ké bubwô ḿbú kyijé eyên ńkyí kii*man*.
Wo amu a-ri ng busông ejí
ne amu a-nyît ng afaníkong ejí.
8Wo a*da/bángê ne banet-bushwôn ejí ba-kám mě*.
Wo aa/chi mě n-firi ké byiko ejí
ḿbyí ndace kyikit ńkyí mu n-ryuu ng.
9Óburúkpâbí, ri mě bafip,
ké nǎ, me mu ké afaníkong.
Achi ejí aa/kyee ké bukyû ḿbú nn/jang etii.
Me nn/kyee kanong kanong.
10Bafip baa/man mě asa,
ne bukyû etii boo/chi dyikpen ejí dyi-firi kaǎkím.
Me nn/kyee ké kángkáng [afaníkong] ejí,
nang byikúú ejí mbyi byi-kyee ng byi-câ.
11Kángkáng banet-bushwôn ejí,
aciringaciring barî-banet ejí,
mbe ba-tún n mě ne edángé.
Banet ḿbé mbe ba-nyît ng mě ba-kú ba-shî ng mě.
Mbé mbe ba-chêe ng ké nkéré baa/ri mě ké kyiká-oshê.
12Nang yeě oo/ráp mě éné wǎ mm/kpú.
Me n/firi éné wǎ chwǒm ńkyí baa/twóp.
13Me mu n-jwo ng ké banet-bushwôn ejí mbe ba-raa ng ké booju.
Bushî boo/wâng mě kángkáng.
Mbé mbe ba-kabe ng kyibî ba-bât ng mě,
ba-nam m ba/fu, mbé ba-ju ng mě.
14Nké me n/tî dyityém ké wo, ǎ Óburúkpâbí.
Wo nké amu Osówo ejí.
15Me mu ké bubwô eyên kángkáng nkéré.
Nyii mě ké abwô nyí banet-bushwôn ejí,
ne nyí banet ḿbé mbe ba-kyâ mě busông.
16Tún ḿgbán eyên ne dyityém ecángê.
Nyii mě ké bubwô-kyijé eyên ńkyí kii*man*.
17Óburúkpâbí, me mu n-kó ng ǒ.
*Damîng ba-fé mě éshwân*.
Kyi/bát bafé bambên atyém éshwân.
Kyi/bát bajâ oshê-bakúsí pyêppyêp.
18Kyi/bát bansêt byisédéng ne bantông byiko
ḿbé mbe ba-raa ng byibî-byiraa ba-bât banet ḿbé mbe ba-chi i kanong bafiri biǐmyímé.
19Byěm ḿbyí byinong ḿbyí a/tî banet ḿbé mbe ba-kyâ ǒ ofê bii*nwa eri*.
Nang yeě mu o-nyît ng eringe nyí wo a/nwa,
ne eringe nyí wo amu a-ku ng banet ḿbé ba/tî dyityém ké wo.
20Wo amu a-rôo ng kámbé ké kyikit ńkyí chwǒm kii*ta kámbé*
ké bushú eyên,
ké abwô nyí banet ḿbé mbe ba-nam m kámbé.
Wo amu a-rôo ng kámbé ké busi
eringe byishû ḿbyí banet-bushwôn ebe bii*ta kámbé*.
21Kye n̂g Óburúkpâbí akpee.
Kyijé emen ńkyí nyǐ o/tông mě kii*nwa eri*
ké nkéré ba/wâng mě ne bunwa.
22Me m/mû n-shî ng, ne m/mû n/kabe n/fu,
Óburúkpâbí oo/ró mě ké bushú emen.
Nké nyǐ o/jwo bukyû ejí ḿbú mu n-tii ng
ké nkéré n/kó ǎ n/fu, ochwáp mě.
23Óburúkpâbí ojê běn ben kángkáng banet emen
ḿbé ba/fé dyityém ké nyǐ.
Óburúkpâbí mu o-ku ng banet ḿbé ba/fé dyityém ké nyǐ.
Nké nyǐ mu o-kyâ bantông byiko busông ḿbú bu/kwárê ne mbé.
24Kángkáng banet ḿbé mbe ba-tî ng okabe ké Óburúkpâbí,
kyú n̂g shwanshwan, ba-cíp dyityém.
Currently Selected:
Sâm 31: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
