Sâm 139
139
Eringe nyí Osówo odatún Banet ne Byinyídíng Emen
1Óburúkpâbí, wo aa/pet mě a-ri,
ne wo amu a-nyît ng mě.
2Wo amu a-nyît ng kángkáng byěm ḿbyí me mu n-chi i.
Nang a/waa tete,
a-nyît ng kángkáng okabe ejí.
3Wo amu a-ri ng mě.
Nang me mu n-chi i bǎmkpóngé
nang mu n-jáng ng,
wo amu a-nyît ng kángkáng ńkyí mu n-chi i.
4Nang ne me n-kûraa,
wo aa/nyît kpáá ńkyí me n/chi n-raa.
5Wo amu mě byicê byimúmú.
Wo amu a-ku ng mě ne busa eyên.
6Onyît eyên mú amu a-nyît ng mě o/tíbî o-shwôm bubong ejí.
7Me n-jâ nyá ne n-fem ké abwô eyên.
Nyá nké me ndaman echêe ké bushú eyên.
8Â me n/ce ké bubóng, wo amu áku.
 me n/rí sáre ké oshê-bakúsí, wo amu áku.
9Â me m/byí wǎ kanurung
n-shwôm kyicê ńkyí óbyísû mu o-byí i,
nang n-kyú ké kyikit ńkyí kyi/tíbî kyi-shwôm
ké kyicê ńkyí óbyísû mu o-ríbî ng,
10wo amu áku mú ada mě etông bukwóp,
wo amu áku mú ada mě echwáp.
11Â me m-man n esét kyifip n/fu, kyirôo mě,
nang kiinwángé ńkyí kyi/wâng mě n/fu,
kyiyángê kyi-firi buchú,
12nké nang kyifip kyi*fí ǒ kyifip*
ne buchú mbu ǒ kpárám wǎ esû.
Kyifip ne kiinwángé mbyi ǒ eringe ebónge.
13Wo nké a/mee kángkáng byipang-enyam-byiko ejí.
Wo nké a/cibi mě kángkáng byipang-enyam-byiko ejí ké dyifít-boné ejí.
14Me mu m-kpee ng ǒ,
ké nǎ, wo nké bada ǒ eshî.
Kángkáng ḿbyí amu a-chi i mbyi ḿbyí ba*da/ri ne*
ne byi/rêe kanong kanong.
Me mu n-nyît ng kámbyí ne dyityém ejí kángkáng.
15Wo a/nyît a/fu, me m/mû ányi ké nkéré amu a-chi i byikúú ejí,
a-cibi ng kámbyí kanong kanong kyikit kyibónge
ké [dyifít-boné ejí]
ké nkéré m/mû n-kán n ányi ké kadip.
16Wo a/ri mě ne ba-kû mě efwon.
Wo a/sáng ací amúmú nyí a/kye mě ké nwet eyên
ne mbwôp kashú-dyicí o-kpet.
17Ô Osówo, [okabe eyên mu o-sóng ng mě ekyé.]
Okabe eyên o/jê kanong kanong.
18Mǔ o/jê o-shwôm éshíshě,
â n/fu, m-pan n kámú.
Me n/tôong ne wo [ké nkéré n/jwóbê.]
19Ô Osówo, â a/ri eringe nyí me mu n-ryuu ng n/fu,
ju banet ḿbé ba/bên atyém.
 a/ri eringe nyí me mu n-ryuu ng n/fu,
banet-bakân bamîng mě kǎnchí.
20Mbé mbe ba-raa ng byibî-byiraa byi-kim ne wo.
[Mbé mbe ba-raa ng byibî-byěm ba-bât ng dyizîn eyên.]
21Ô Óburúkpâbí, â a/ri eringe nyí banet ḿbé wo amu a-sa ng kámbé kafâ mbe ba-sa ng mě kafâ.
 a/ri eringe me mu n-né ng banet ḿbé mbe ba-bírî ng bunwa ne wo.
22Ba-sa ng mě kafâ ne dyityém ejí kángkáng.
Me mu n-yip ng kámbé wǎ banet-bushwôn ejí.
23Ô Osówo, pet mě a-nyît dyityém ejí.
Kan mě a-ri okabe ejí.
24Kyé a-ri â me mu nang ne kyibî kyibónge,
a-tông mě [kiǐfáng ńkyí ne banyá.]
Currently Selected:
Sâm 139: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
