Sâm 140
140
Nshwam-Onyii
1Óburúkpâbí, nyii mě ké abwô-byibî-banet.
Chi mě n-fem ké abwô nyí bannwa anwa.
2Mbé mbe ba-nam m byibî-byěm kángkáng nkéré,
ba-cen n ne ashwôn kángkáng nkéré.
3Bubyíbabang ebe mbu wǎ byibî-efyi.
Byiraa ebe mbyi wǎ dyífa ńdyí kyitáál.
4Óburúkpâbí, *dabángê bambên atyém ba-firi ne busa ne me*.
Chi mě n-fem ké abwô nyí bannwa anwa
ḿbé mbe ba-nam m ba/fu, me nróng.
5Bantông byiko baa/kuu kaǎtám ba-tî mě.
Baa/sím boǒtám ebe ba-fé kyísí,
ne baa/kuu boǒtám ké kiǐfáng ḿbú bada mě ekám.
6Me mu n-sét ng Óburúkpâbí n/fu,
wo a-chi i Osówo ejí.
Óburúkpâbí, jwo bukyû ejí ḿbú mu n-tii ng n/fu, chwáp mě.
7Osówo Óburúkpâbí ejí,
Onet-Onyii ejí mú shwanshwan,
wo aa/nyii mě ké byití.
8Óburúkpâbí, *dakye bambên atyém ńkyí mbe ba-ryuu ng*.
*Dabángê byibî-byěm ebe ḿbyí mbe ba-nam m byi-chi*.
[ 9*Damîng banet-bushwôn ejí ba-kpógê*.]
Chi byibî-byěm ebe ḿbyí mbe ba-nam m mě byi-róng kámbé ké byiko mbé bayén.
10Kyi/bát amánge-okwâ aróng kámbé ké byiko.
Kyi/bát batwóp kámbé ké dyibíng ńdyí baa*byí to ne banyá*.
11Kyi/bát banet ḿbé mbe ba-bât ng banet byěm ba*dakpógê*.
Kyi/bát byibî-byěm byikám bannwa anwa byi-ju kámbé.
12Óburúkpâbí, me mu n-nyît ng n/fu,
wo amu a-bwom m banet-kyikpu ké esim,
ne aa*bángê ba-ta byěm ḿbyí byi/já banet ḿbé ba*fí ne chwǒm*.
13Banet ḿbé mbe ba-chi i kanong ba/chi ba-kye ǒ akpee ké ntûntû.
Ba/chi ba-kpen ké bushú eyên.
Currently Selected:
Sâm 140: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
