Sâm 103
103
Kyijé ńkyí Osówo
1Kyirim ejí, kye Óburúkpâbí akpee.
Kyirim ejí kángkáng kyikpee dyizîn emen ńdyí dyinong.
2Kyirim ejí, kye Óburúkpâbí akpee.
*Dachi a-ráp eringe nyí nyǐ o/cángê dyityém*.
3Nyǐ mu o-pwoo ng mě ké kángkáng byibî ejí,
ne mu o-chi i to kángkáng byirwóm ejí byi-man.
4Nyǐ o*fí o-bángê e ba-fé mě ké dyikun*
ne mu o-jware ng mě to ne kyijé ne bafip eri.
5Nyǐ mu o-kyâ [dyikpen ejí] byěm ḿbyí byinong
eringe enyam-byiko ejí edawaa efyîfî
ne shwaneshwane wǎ nyí kiinkwa.
6Óburúkpâbí mu o-két ng mpan o-nwa banet ḿbé mbe ba-cít ng kámbé,
ne mu o-kyâ kámbé ńkyí kyi/já kámbé.
7Nyǐ o/sét Músis okabe emen wááng,
ne o/mîng banet ḿbé Ézerel ba-ri biǐtí-akat emen ḿbyí nyǐ o/chi.
8Óburúkpâbí mu o-ri ng banet bafip,
ne mu o-tông ng banet kyijé.
Nyǐ kaa*sa ǎ babap*
ne kyijé kii*man ǎ ké byiko*.
9Nyǐ oo*bîn banet o-ca kashú*
ne kafâ to kaa*sa ǎ ne banyá*.
10Nyǐ o*fí o-kyâ bě busông
wǎ eringe nyí byi/mû byi/chi byi-koo kámbú*
o-só bě nang osó ké byibî eten ne orông eten*.
11Kyijé emen ńkyí mu o-tông ng banet ḿbé mbe ba-kyâ ǎ ofê kyi/rêe
wǎ eringe nyí bubóng mbu kyíbóng nyáám bu-shwôm ejíí.
12Nyǐ mu o-kúng ng byibî eten o-câ ne mbyí tíbítíbí
wǎ eringe kyikit ńkyí óbyísû odabyí kyi/tíbî ne ńkyí odaríbî.
13Óburúkpâbí mu o-cángê e dyityém ne banet ḿbé mbe ba-kyâ ǎ ofê
wǎ eringe nyí bonchí-bwǎn mu o-cángê e dyityém ne bwǎn emen.
14Óburúkpâbí mu o-nyît ng ńkyí nyǐ o/kúng ne o-chi bě.
Nyǐ mu o-zîim m o/fu,
be byi-chi i ecing.
15Akpen eten nyi wǎ biǐbyâa.
Be byimu byi-kán n byi-kpen n wǎ ekong-biǐbyâa.
16Ne ké nkéré bufú boo/tugi ké nyǐ,
nyǐ kángkáng e-roo.
Onet oo*ri to kányí*.
17Nké kyijé ńkyí Óburúkpâbí kyi-waa ng ne banyá ne banet ḿbé mbe ba-kyâ ǎ ofê,
ne kanong emen ka/chi ka-ta kángkáng bwǎn-bafî ne ḿbé mbe ba-bâ.
18Ka-ta ng to banet ḿbé ba/fé dyityém ké ocím mú Osówo o/ryí,
ne mbe ba-chi i ńkyí byije emen byi/sét.
19Óburúkpâbí oo/tî kakyúng-butu emen kyíbóng,
ne nyǐ mu Otu mú kángkáng banet.
20Kpee n̂g Óburúkpâbí,
ǎ barím ḿbé banong ḿbé mbe kiǐtí ne busa,
ḿbé mbe ba-chi i ńkyí nyǐ o/sét,
ne mbe ba-jwo ng ńkyí nyǐ mu o-sét ng.
21Kángkáng barím emen ḿbé mbe kyíbóng,
ḿbé bǎmgbán emen,
ḿbé mbe ba-chi i ńkyí nyǐ o/sét,
kpee n̂g Óburúkpâbí.
22Kángkáng byěm ḿbyí Osówo o/chi ké butu emen kángkáng,
kpee n̂g Óburúkpâbí.
Kyirim ejí, kye Óburúkpâbí akpee.
Currently Selected:
Sâm 103: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
