Sâm 104
104
Byikpee Osówo mú o/chi Bě
1Kyirim ejí, kpee Óburúkpâbí.
Osówo Óburúkpâbí ejí,
wo a/rêe kanong kanong.
Wo aa/sú ne baryên ne busa.
2Wo amu a-fâ kiinwángé ké byiko wǎ byídí.
Wo a/paam bubóng éné wǎ mpyep mú badabi ké kyídí.
3Ne a/bi byise eyên kyíbóng-omu mú mu kyíbóng.
Wo amu a-yú u éfíbí wǎ mútu,
a-yú u to bufú wǎ mbu ne abyibabang.
4Bufú nké mbu mbánge kyitwóm eyên
ne kasabang nké nke ḿgbán eyên.
5Wo aa/tî esí ké byikwap emen kíngkíng
ne baa*man enáng kányí*.
6Wo a/chi omu a-cít kányí wǎ byídí,
ne omu o/cít eku kángkáng.
7Omu o/rim ké nkéré aa/raa ne mú.
Mǔ o/chêe ké nkéré oo/jwo ényân eyên.
8Mǔ o/sen ké eku o-nung ké ewo,
o-ribi ké kyikit ńkyí a/chi a-tî kámú.
9Wo a/fé buti ḿbú mǔ oo*man eshwôm*
eringe mǔ oo*man echîcít ejíí*.
10Wo a/chi boǒbwán-buce bu-kûbyí ké ewo,
ne buce bu-kûsen ké afîm-eku.
11Mbú nké mbu bu-kyâ enyam-dyikán omu mú nyi e-jwáp ng.
Mbú nké enyam-dyikán nyi e-kune e kyijé-omu.
12Ké byichí ḿbyí mbyi fáráng ne buce nké bunurung mbu bu-chi i aju bu-raa ng to.
13Áku kyíbóng nké omu mu o-fím m ké abwô eyên o-bâ kyíbóng-eku,
ne ojware eyên o-sú ké esí.
14Wo amu a-chi i biǐbyâa byi-kán n
eringe nyí byitú byidaryí,
ne asín-byichí a-tî onet
eringe nyí onet odakwón byíkwôn emen,
15a-chi to bato eringe nyí odakyú ké bunyîn-dyityém,
a-chi bakút eringe nyí odajêe,
ne byiryíng eringe ada ǎ ekye busa.
16Byichí ḿbyí Óburúkpâbí o/kwón ké Lebánon mbyi byi-já ng omu chwóó.
17Ké mbyí nké bunurung mbu bu-chi i aju.
Ké mbyí nké bunurung mbu bu-bi ng byise ebe.
18Enyam-dyikán nyi e-kyú u kyíbóng-eku ne ké afít-ewo.
19Wo a/chi otukáku eringe nyí odatông kyifang ne burwom.
Óbyísû mu o-nyît ng nkéré mú odaríbî.
20Wo a/chi buchú,
ne enyam-dyikán kángkáng e-byí i kyíjí ké kyifip.
21Byisu-ekpang byi-fém m ké nkéré byi-kú byi-ryuu ng dyikán
byi-kyé ng byiryíng ḿbyí Osówo mu o-kyâ kámbyí.
22Mbyí byi-bwa ng esim byi-da-cít ké buríng ebe
ké nkéré esû ee/byí.
23Ne banet kâng ba-dim bǎmkpóngé ebe echi,
ba-chi kámbé tete dyikurúku.
24Óburúkpâbí, wo aa/chi byěm chwóó.
Wo a/chi kámbyí ké bubong ḿbú kiǐtí.
Ejíí ee/sú ne byěm eyên ḿbyí a/chi.
25Baya mbe kô ḿbé ba/rêe kyibé,
ḿbé mbe ne byěm ḿbyí byiryên ne ḿbyí boǒníng ḿbyí wo a/chi.
26Bǎnsukyíkang mbe ba-sen n ké baya ámbe,
ne [kiǐnyám-baya ńkyí wo a/chi nkyi kyi-chi i acáá ké mbé.]
27Mbyí kángkáng mbyi byi-jêem m busi ebe ké wo byi/fu,
wo akye kámbyí byiryíng
ké nkéré mbyí byi-kú byi-ryuu ng kámbyí.
28Wo amu a-kyâ kámbyí byiryíng
ne mbyí mbyi byi-ryí i kámbyí.
Wo amu a-tî ng byiryíng
ḿbyí mbyí mbyi byi-zût ng.
29Mbyí byi/firi ké bushî
ké nkéré wo aa/bírî kámbyí esim.
Mbyí byi-kpú u ké nkéré wo aa/koo kámbyí kiǐnjáng,
ne byi-bírî ecing nyí wo a/kúng ne a-chi kámbyí.
30Nké wo amu a-chi i kámbyí
ké nkéré mú amu a-chi i ejíí [e-chîjá dyikpen ńdyí dyifyîfî.]
31Kyi/bát akpee nyí Óburúkpâbí awaa ne banyá.
Kyi/bát Óburúkpâbí okyú ké bunyîn-dyityém
ké byěm ḿbyí nyǐ oo/chi.
32Esí e-náng ng, â nyǐ o/tún kányí achi.
Eku e-byí i arúkwâ, â nyǐ o/ta kányí.
33Me n/chi n-kwán ekwan n-kye Óburúkpâbí kángkáng dyikpen ejí.
Me n/chi n-kwán ekwan-akpee n-kye Osówo ejí tete m-kpú.
34Kyi/bát nyǐ okyú ké bunyîn-dyityém ké ekwan ejí,
ké nǎ, bunyîn-dyityém ejí mbu bu-fím m ne nyǐ.
35Kyi/bát nyǐ oman ne banet-byibî ké ejíí.
Kyi/bát bambên atyém baman.
Kyirim ejí, kye Óburúkpâbí akpee,
kpee Óburúkpâbí.
Currently Selected:
Sâm 104: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
