Sâm 102
102
Nshwam mú Kyisat ńkyí nkyi ké Afaníkong
1Ô Óburúkpâbí, fwôo atông a-jwo nshwam ejí,
a-jwo bukyû ejí ḿbú mu n-tii ng n/fu, chwáp mě.
2*Da mě ebírî esim ké nkéré n/firi ké afaníkong*.
Fwôo atông a-jwo mě,
a-faa mě ojá babap ké nkéré nn/kó ǒ.
3Dyikpen ejí ndyi dyi-man n dyi-câ wǎ arúkwâ.
Enyam-byiko ejí nyi e-sóng ng wǎ okwâ.
4Mbe ba-cím m mě ba-fâ kyísí wǎ biǐkpúkpú-biǐbyâa.
Okabe mú byiryíng eryí o*fí mě to*.
5Me mu m-byâ kakânkakân.
Enyam-byiko ejí ee/jwóm e/firi byikúú byíkuu.
6Me n/firi kǎnchí wǎ kanurung ńké nke ké kyikim-dyikán,
ne wǎ kiikong ńkyí nkyi ké biǐbwô-byise.
7Me mu n-waa ng achi fúú.
Me n/firi kǎnchí wǎ ncen-kanurung mú mu kyíbóng-kyise.
8Banet-bushwôn ejí mbe ba-dángê e mě kyirim-dyicí kángkáng.
Banet ḿbé mbe ba-fát ng mě kiikuku mbe ba-kúng ng dyizîn ejí wǎ chwǒm-kyishû.
9-10Ké bubwô ḿbú kiikuku ne kafâ esa eyên,
atông nké a/firi mě byiryíng,
ne batíí ejí ba-kú ba-róngê e ké ńkyí mu n-jwáp ng.
Wo a/nwam mě a-twóp kú.
11Dyikpen ejí dyi/firi wǎ busun-dyikurúku.
Me n/firi wǎ biǐkpúkpú-biǐbyâa.
12Nké Óburúkpâbí, wo nké amu Otu mú ne banyá.
Kángkáng bwǎn eten ba/chi ba-zîim ǒ.
13Wo a/chi a-bûu a-ri Záyon bafip.
Nkéré oo/fyi mú adari kámú bafip,
ochíchí-nkéré něen.
14Záyon o-jê ng bǎmgbán eyên,
nang banet baa/bên kámú.
Mbé ba/ri kámú bafip nang ké mu bênbên.
15Eshê kángkáng e/chi e-shî Óburúkpâbí.
Kángkáng batu ḿbé ké ejíí ba/chi ba-shî busa emen.
16Óburúkpâbí o/chi o-tông eringe nyǐ o/rêe
ké nkéré oo/bwât Záyon o-bi.
17Nyǐ o/chi o-jwo banet emen ḿbé o/mû o/né,
o-fwôo atông ké nshwam ebe.
18Sáng kyísí a-tî bwǎn ḿbé mbe ba-bâ kashú,
ńkyí Óburúkpâbí oo/chi,
eringe nyí bwǎn ḿbé ba*da/fwon ne kámbé* ba/chi ba-kpee ǎ,
19ba-nyît ba/fu, Óburúkpâbí o/mû ké kyikit emen kyíbóng ńkyí ociring o-tún n kyísí.
Nyǐ o/mû kyíbóng o-tún n ké ejíí.
20Nyǐ o/jwo dyibyê ńdyí banet-bamgbokobá,
o-chi banet ḿbé ba/mû ba/fu,
baju kámbé, ba-fem.
21Ké bubwô ámbu, ba/chi ba-sét kyi-kim ne dyizîn emen ké Záyon,
ne ba/chi ba-kpee ǎ ké Jerúsélem,
22ké nkéré eshê ne batu baa/cibi kyikit kyibónge
ba-kye Óburúkpâbí ofê.
23Óburúkpâbí oo/chi mě n-firi kyeekyee ne bubwásíng ké byiko,
ne oo/chi dyikpen ejí dyi-firi kaǎkím.
24Ô Osówo, me mu n-sét ng ǒ n/fu,
*da mě ekoo dyikpen ejí kántîk*
mú n*da/kâa ne*.
Ô Óburúkpâbí, wo amu ne banyá.
25Wo a/chi ejíí ké aje nyí a/shwôm ké esim chwóó,
ne wo a/chi bubóng ké abwô eyên wo oyén.
26Mbyí byi/chi byi-rím,
nké wo a/chi a-waa.
Mbyí kángkáng byi/chi byi-kâa wǎ kyídí.
Wo a/chi a-yángê kámbyí wǎ byídí,
ne mbyí byi/chi byi-rím.
27Nké wo amu eringe ebónge kángkáng nkéré,
ne dyikpen eyên dii*man ne banyá*.
28Chwǒm kii*ba/chi kyi-ta bwǎn eten*
ne ké bushú eyên, bwǎn ebe ba-kyú u kerededet.
Currently Selected:
Sâm 102: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
