Póróvep 22
22
1Kyi-nwa ng ńkyí adakyú ne dyizîn ńdyí dyinong kyi-shwôm ńkyí adakyú ne biǐzú-akpuga.
2Onet-esang ne onet-kyikpu mbe eringe ebónge, ké nǎ, mbé kángkáng Óburúkpâbí nké o/chi kámbé.
3Onet mú mu ne byinyídíng o-chêe ng afaníkong â o/ri kányí a-kú a-bâ, nké onet mú o*da/nyît ne chwǒm* o-cen n o-kâm kányí ne o-chi ájângmé ké nkéré oo/róng ké nyǐ.
4Esang ne ofê ne dyikpen, ányi eyáré nyí budegere ekyú ne Óburúkpâbí ofê ekye.
5Â dyikpen eyên ndyi dyi-jê ng ǒ, *dachi a-cen kiǐfáng ńkyí bambên atyém mbe ba-cen n* ńkyí boǒtám mbu bu-kám m kámbé ké nkyí*.
6Tángê wǎsíng bukwóp ḿbú odakyú dyikpen emen, ne nyǐ o/chi o-kûzîim kánkyí ké dyikpen emen kángkáng.
7Banet-kyikpu ba-chi i básóng ḿbé onet-esang. Pwoo akpuga ne wo a/chi a-firi ósóng mú onet mú o/pwoo ǒ akpuga.
8Onet mú mu o-cen n ne byěm-acît eryí o/chi o-já busông ne oo*ba/chi o-chîcít banet*.
9Osówo o-jware ng onet mú o/cángê dyityém, ké nǎ, onet ámu mu o-kyii ng byiryíng emen o-kye banet-kyikpu.
10Ró ntông byiko, ne okân ké dyishí ne ashwôn ne byishû bii*ba/chi byi-chîchi*.
11Onet mú dyityém ńdyí kpárám ne byiraa ḿbyí byinong byida ǎ enyîn o-ryí i bucín ne otu.
12Óburúkpâbí mu o-bám m bubong eringe nyí chwǒm kii*ta kámbú* ké nǎ, nyǐ mu o-tông ng o/fu, byiraa ḿbyí bansêt byisédéng byi*fí ké kafâ*.
13Onet-dyidare mu o-waa ng ké byise o-sét ng o/fu, â nyǐ o/byí kyíjí ekpang e-kám ǎ.
14Kyinam echi ányi kaǎtám. Nke ka-kám m onet mú Óburúkpâbí mu o-sa ng kafâ ne nyǐ.
15Bwǎsíng mbe ne dyityém ńdyí badachi enyam-byěm, nké byimirî byi-tángê e kámbé dyishí.
16Wo oyén a/chi a-firi onet-kyikpu, â amu a-kyâ banet-esang eyáré ne â amu a-cít ng banet-kyikpu eringe nyí adajá esang.
Atím-Ekan Bujam Esim Diǐkpú
17Tî atông a-jwo, me n/chi n-tángê ǒ atím-ekan nyí banet ḿbé mbe ne bubong. Kwâa byěm ebe ḿbyí mbé mbe ba-tángê e 18ne wo a/chi a-kyú ké bunyîn-dyityém â wo amu a-zîim m kámbyí ne â mbyi ǒ ké byibî-ocím dédé. 19Me mu n-ryuu ng ǒ n/fu, tî dyityém eyên ké Óburúkpâbí, ké bubwô ámbu nké me n-kú m-bâ ǒ esét kámbyí kántîk. 20Me nn/sáng ǒ atím-ekan bujam esim diǐkpú, nyí bubong ne bacê ḿbé banong 21ne a-tángê e ǒ eringe ntûntû mu. Ké nkéré ba/fu, wo ada-kyé eringe ntûntû mu, wo a/chi a-já ntûntû mú adasét banet ḿbé ba/twóm ǒ. Nyǐ nyi něen.
- 1 -
22*Daryí onet-kyikpu mpún* ké nǎ, nyǐ mu kyikpu* a-cít nang banet ḿbé ba*fí ne ochwâp* ké esuk*. 23Óburúkpâbí o/chi o-bwom mpan ké bubwô ebe o-bên akpen nyí banet ḿbé mbe ba-bên n nyí banet-kyikpu.
- 2 -
24*Daryí bucín ne banet ḿbé mbe ne kiikuku ne kafâ esa*. 25Ké nǎ, a-man n ekwâa édúú ebe, aa*man to eyángê*.
- 3 -
26*Daryí ocím a/fu, wo a-ré ng dyifwá ńdyí onet okíri*. 27Â wo a*da/man eré kándyí* ba/chi ba-kúng nang karíng eyên.
- 4 -
28*Dayángê buti-esí ne banyá* ḿbú banchí eyên ḿbé kpákpá ba/tî*.
- 5 -
29Amu a-ri ng onet mú mu o-chi i bǎmkpóngé emen kanong? Nyǐ o/chi o-bwom ké bushú-batu, oo*ba/chi o-bwom ké ḿbú boǒdángé-banet*.
Currently Selected:
Póróvep 22: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
