Póróvep 23
23
- 6 -
1Ké nkéré a-kú a-ryí i byiryíng ne kiǐtí-onet, [kûkabe a-nyît dyizong-onet ńdyí nyǐ mu.] 2Kám byiko eyên â amu ne omiríng mú aryî eryí. 3*Damyii byiryíng ḿbyí byinong ḿbyí nyǐ o/tî* ké nǎ, kakíri nyǐ mu o-nîm m ǒ.
- 7 -
4Kyú ne bubong ḿbú aa*ju byiko eyên ké akpuga ekyé*. 5Akpuga eyên a-man n erím ké ochéé éné wǎ nyi ne abyibabang, ne aa/byí a-dim wǎ kiinkwa.
- 8 -
6*Daryí byiryíng ḿbyí onet mú oo*yárê byěm emen* a-myii nang byiryíng emen ḿbyí byinong ḿbyí nyǐ o/tî*. 7Nyǐ o-fu ng, chîryí kâng. Nké o*da/fu kánkyí ne dyityém emen*. Ńkyí nyǐ mu o-kabe ng nkyi eringe nyí nyǐ mu ké ntûntû. 8Wo a/chi a-fám ńkyí aa/ryí, ne bunyîn-ejá eyên bu/chi bu-waa kyísí dyikáá.
- 9 -
9*Dakan a/fu, wo a-sét ng enyam-onet byěm-bubong*. Bii*nyîn ǎ*.
- 10 -
10*Dachi a-yángê okúri-buti-esí* a-koo nang esí nyí e/já bwǎn-byibén*. 11Ké nǎ, Óburúkpâbí nké mu onet-onyii ebe mú mu ne busa ne o-pan n mpan ne wo ké bubwô ebe.
- 11 -
12Tî atông a-jwo ńkyí tyícha eyên mu o-tángê e ǒ, a-kwâa kángkáng byěm ḿbyí adaman ekwâa.
- 12 -
13*Dané wǎn eyên dyishí etángê*. Â a/mín ǎ ké kachí, oo*kpú*. 14Ké ntûntû, kyi-man n enyii dyikpen emen.
- 13 -
15Wǎn ejí, â dyityém eyên dyi/firi ne bubong, dyityém ejí to dyi-jêe ng. 16Dyityém ejí dyi/chi dyi-jêe ké nkéré a-kú a-sét ng ńkyí nkyi ntûntû.
- 14 -
17Orêm o*da ǒ echi ne banet-byibî* nké ca kashú ne ofê eyên mú amu a-kyâ Óburúkpâbí kángkáng nkéré, 18ne dyikpen eyên ne okabe eyên bii*ba/chi byi-bên*.
- 15 -
19Fwôo atông a-jwo, ǎ wǎn ejí. Kyú ne bubong, a-kabe kanong kanong kyi-kim ne eringe nyí amu a-kyú u dyikpen eyên. 20*Dacen ne banet ḿbé mbe ba-jwáp ng bato ba-shwôm* ba-wuri ng byiryíng ba-ryí i*. 21Ké nǎ, bambwôm bato ne banryî byiryíng ba-shwôm ba/chi ba-firi kyikpu. Â a*fí a-chi i chwǒm kyikíri* kyi-cibi ne byiryíng eryí ne burê erê* wo a/chi a-kpet ekâa-byídí ebwá abeabe.
- 16 -
22Jwo ńkyí ńchân mú o/fwon ǒ mu o-sét ng ǒ. *Dachi a-né boné eyên ké nkéré oo/kâa*.
23Ntûntû ne bubong ne byěm ekwâa ne byinyídíng byi/kwárê ḿbyí onet odaré kámbyí, nké mbyi biǐtí byi-shwôm ḿbyí onet odashee.
24Bonchí-onet mú mu o-chi i kanong mu ne bukwóp ḿbú odakyú ké bunyîn-dyityém. Wo a-man n eyip esim ké wǎn mú mu ne bubong.
25Chi ńchân ne ńnân ba-kûyip esim ké dyishí eyên. Kye ńnân bunyîn-dyityém.
- 17 -
26Wǎn ejí, tî dyityém eyên ké ńkyí mu n-chi i, a-leme dyikpen ejí ńdyí mu n-kyú u. 27Ké nǎ, banyinyi-akpara ne byibî-banyinyi mbe wǎ kyibî-kaǎtám. 28Mbé mbe ba-bám m ǒ wǎ bambam banet byěm ba-koo, ne mbe ba-chi i banyinchéng chwóó ba-né dyityém efé ne banyi ebe.
- 18 -
29-30Tông mě onet mú mu o-jwáp ng bato o-shwôm, mú mu o-kan n bato ḿbé bafyîfî ejwáp, ne me n/chi n-tông ǒ onet mú mu bafip báfip, bunyîn-dyityém bu*fí ǎ ne byiko emen*. Nyǐ o-cen n ne byiraa kángkáng nkéré ne o-shwôn n ashwôn kángkáng nkéré. Achi emen nyi baróng bárong, ne mu ne byinêm ḿbyí o/mû oo*ba/chi o-já*. 31*Damîng bato ba-nîm ǒ nang mbe ba-nyîn n nǎ* nang mbe ba-fyí i ké mmîk, nang mbe ba-shwôm m ké omiríng kanong kanong*. 32Byiko eyên byi-kyú u ké orî-dyicófóróng wǎ kyibî-efyi nké kyi/jwóm ǒ. 33Achi eyên a-kû ng eri byěm ḿbyí a*da/ri ne* ne aa*ba/chi a-chîman ekabe* a-chîman nang eraa kanong*. 34A-firi ng éné wǎ onet mú mu ké otyém-baya ḿbé baryên, mú dyifít emen dyi/bírî ǎ, ne a-firi ng to wǎ onet mú mu kyíbóng-ńsukyíkang mú mu o-náng ng kanong kanong. 35Wo a/chi a-raa a/fu, kakíri ba/díp mě. Kakíri ba/mín mě, nké n*fí to n-nyît ng kánkyí*. Ebóng ńkyí n*fí m-man n ebûu nensang. N/chi n-chîkyé bato bakíri n-jwáp.
Currently Selected:
Póróvep 23: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
