Póróvep 21
21
1Óburúkpâbí mu o-tî ng dyityém ńdyí otu nang osông kii*sóng ǎ* wǎ eringe nyí mu o-tông ng kiǐfáng ńkyí kace nke ka-sen n.
2Wo a-man n ekabe a/fu, nang ebóng chwǒm ńkyí amu a-chi i nkyi kanong, nké zîim a/fu, Óburúkpâbí nké mu o-pan n dyityém eyên mpan.
3Chi ńkyí nkyi kanong ne ńkyí kyi*fí ne acît eryí*. Ńkyí ányi kyi-nyîn n Óburúkpâbí kyi-shwôm byifen echi ba-kye ǎ.
4Bambên atyém mbe ké busa ḿbú akpee ekyé ne byiko etông. Ńkyín nkyi kyibî.
5Tóbê kanong kanong ne wo a/chi a-já chwóó. Aa*ba/chi a-já byěm byi-kwárê ǒ ne banyá* â amu a-chi i byěm ochéé óchee*.
6Esang ejá ké bukwóp ḿbú bu*fí kanong* e-rím m babap, ányi ee/tín ǒ efé ké bukyû.
7Bambên atyém mbe ba-tánê e ba-câ ké anwa ebe mbé bayén. Mbé mbe ba-né ng echi ńkyí nkyi kanong.
8Kiǐfáng ńkyí banet ḿbé ba/chi kyibî kyi*fí dángdáng*. Édúú nyí banet ḿbé mbe ne atyém kpárám nyi kanong.
9Nkyi kanong ńkyí adakyú kyíjí kyi-shwôm ńkyí adakyú kyise kyibónge ne onyi mú mu o-shwôn n ashwôn.
10Bambên atyém ba-ryuu ng byibî echi kángkáng nkéré. Mbé baa*ri onet nang obónge bafip*.
11Ké nkéré baa/kye nkyê akpee busông, nang onet mú o*da/nyît ne chwǒm* o-kwâa ng chwǒm. Onet mú mu ne bubong o-kwâa ng chwǒm ké ńkyí ba/tángê ǎ.
12Osówo mú mu nchi kanong mu o-nyît ng ńkyí nkyi kyi-chi i ké byise ḿbyí bambên atyém, ne nyǐ o/chi o-chi bambên atyém ba-kpú.
13Osówo oo*ba/chi o-jwo bukyû eyên ḿbú amu a-tî ng a/fu, ochwáp ǒ* â wo amu a-né ng ejwo ḿbú banet-kyikpu.
14Â onet mu o-sa ng kafâ ne wo, eyáré ekye ké esim e/chi e-chi ǎ dyityém dyi-chee.
15Mpan mú baa*ryí acît* o-chi i banet ḿbé mbe ba-chi i kanong ba-jêe, nké o-chi i banet-byibî asa a-jwâa kámbé.
16Bukyû mbu bu-bám m nang yeě mú mu o-fín n bukwóp ḿbú bubong.
17Dyikpen ekyé ké byěm ḿbyí byinong, wǎ bato ne byiryíng ḿbyí byidanyîn bii*chi ǒ a-já esang*.
18Bambên atyém mbe ba-kyâ byiko ebe busông ḿbú mbé mbe ba-kan n ekye banet ḿbé mbe ba-chi i kanong.
19Nkyi kanong ńkyí adakyú ké kyikim-dyikán kyi-shwôm ńkyí adakyú ne onyi mú odaraa kyiraa ne o-shwôn n ashwôn.
20Banet ḿbé mbe ne bubong ba-tî ng esang ne byiryíng ké kyise, nké enyam-banet ba-bên n byěm ebe ochéé óchee.
21Onet mú o/cángê dyityém ne mu o-chi i kanong o-já ng dyikpen ne ofê.
22Onet-súja mú mu ne bubong o-man n ekoo oshê mú bakân-banet mbe ba-bám m, ne o-man n ebú ekpe nyí e/wâng oshê ámu nyí mbé ba/fé dyityém.
23Â amu a-ryuu ng a/fu, afaníkong a*da ǒ eta* bám byiko eyên ké byiraa ḿbyí amu a-raa ng.
24Tông mě nkyê akpee, ne me n/chi n-tông ǒ onet mú mu o-yip ng esim, o-tông ng byiko ne oo*kérê kyi-kim ne orî-onet*.
25Onet-dyidare mú mu o-né ng bǎmkpóngé echi mu o-ju ng byiko emen nyǐ oyén.
26Ńkyí nyǐ mu o-chi i kyi*da/shwôm okabe kyi-kim ne ńkyí nkyi kyi-nyîn n ǎ ejá*. Nké onet mú mu o-chi i kanong o-yárê ng eyáré oo*kérê*.
27Kyi-sa ng Óburúkpâbí ké nkéré bambên atyém mbe ba-chi i kyifen ba-kye ǎ, aciringaciring â ba/chi kánkyí ne kyibî-okabe.
28Baa*bángê ké byiraa ḿbyí ntûesé mú mu o-sét ng kyisédéng* nké ba-koo ng ḿbyí onet mú mu o-sét ng ntûntû.
29Banet ḿbé mbe ba-chi i kanong ba-nyît ng byiko ebe. Bambên atyém ba-lángê e álángé.
30Bubong ne byinyídíng ne bacê bii*chwáp* â Óburúkpâbí o*da/bángê ne wo*.
31A-man n ekúng bubyî-orá a-kpá byiko byití, nké Óburúkpâbí nké oda ǒ echi a-kpógê.
Currently Selected:
Póróvep 21: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
