Azáya 65
65
Osówo o/tî Busông ḿbú Banet ḿbé ba/bírî Bunwa ne Nyǐ
1Óburúkpâbí o/raa o/fu, me m/mû m/kpá byiko ḿbyí ndafaa banshwam ḿbé banet ejí, nké mbé ba*da/fé nshwam*. M/mû m/kpá byiko n/fu, bakyé mě, nké ba*da/kan nang okan ókan*. Oshê ejí ba*da/fé nshwam ba-kye mě* nang ké me kángkáng nkéré m/mû m/kpá byiko ḿbyí ndafaa kámbé n/fu, me mu nyín*. N/chi n-chwáp běn. 2Me mm/kpá byiko kángkáng nkéré n/fu, n-koo ng banet ejí ḿbé mbe ba-tigi ng ba-chi i ńkyí kii*nwa* ba-cen n ba-câ biǐfáng ebe. 3Mbé mbe ba-chi i mě n-sa ng kafâ n-câ kashú nang éshwân e*fí e-chi i kámbé*. Mbé mbe ba-chi i byifen ḿbyí banet ḿbé ba/bángê ké bakye esháng ké byifát-ociring, ba-shí i burwan ké byibî-byikit-byifen echi. 4Ne buchú ba-dim ké bacim ne ké akun ba-da-pem ne bakúsí. Mbe ba-ryí i enyam-akûk, ba-jwáp ng omu-enyam nyí ba/sháng bakye. 5Ne ba-waa ányi ba-raa ne banet bakíri ba/fu, *da n̂g bě eta*. Be byimu kanong kanong byi-shwôm mú ben bada bě eta. Me mm*man eri dyizong-banet ándyi*. Kafâ ńké nke ka-sa ng mě ne mbé nke wǎ okwâ mú oo*ríbî ne banyá*.
6Me nn/kabe n-tî dyishí kyi-kim ne busông ḿbú n/chi n-kye kámbé, ne nn/sáng ńkyí n/chi n-chi kámbé kyísí. Mm*ba/chi n-cíbî pyêp kyi-kim ne ńkyí baa/chi* nké n/chi n-só kámbé ewa 7ké bubwô ḿbú byibî ebe ne ké ḿbyí banchí ebe ḿbé kpákpá. Mbé baa/shí burwan ké eku nyí biinchéng-bakye esháng, ba-raa byibî-byiraa kyi-kim ne me. Ké bubwô ámbu, me n/chi n-kye kámbé busông ḿbú bu/chi bu-kwárê ne byibî ebe ḿbyí baa/chi.
8Óburúkpâbí o/raa o/fu, onet o*fí mú odabên byirim-byichí ḿbyí byinong*. Ba-yip ng kámbyí ba-chi bato. Nang me to nn*ju banet ejí kángkáng*. N/chi n-nyii banet ḿbé mbe ba-fâ mě. 9N/chi n-jware banet-Ézerel ḿbé ba/fím ké kyikû-banet ńkyí Júda, ne bwǎn ebe ba/chi ba-kúng esí-eku ejí. Banet ejí ḿbé n/cá kámbé, ḿbé mbe ba-fâ mě, ba/chi ba-kyú ké nyǐ. 10Mbé ba/chi ba-kye mě ofê, ne ba/chi ba-ca ne byitú ebe byi-da-ryí baryî ké ndege-esí nyí Sháron ké kyicê ńkyí esû edaríbî ne ké Owo-Afaníkong ké kyicê ńkyí esû edabyí.
11Nké kyi/chi kyi-yángê ne ben mú bamu ba-ráp ng mě, mú bamu ba-né ng Záyon mú mu kaku-ociring ejí, ba-fâ erím-bakye nyí badakó Gât ne Ményi nyí ba/fu, ekye běn bufa ne dyikpen. 12Ńkyín kyi/chi kyi-chi běn ba-ju běn ké bushwám, ne ba/chi ba-ju běn ashí kángkáng, ké nǎ, ké nkéré mú n/kó běn, ba*da mě efaa ojá*. Ké nkéré mú n/raa ne ben, ba*da/fwôo atông ba-jwo mě* nké ba/chi ńkyí kyi/mû kyibî ké achi ejí, ba-fîm ńkyí kyi*fí kyi-nyîn n mě*. 13Ké bubwô ámbu, me Óburúkpâbí mú mu Otu Kyítá n/raa n/fu, bǎmgbán ejí ba/chi ba-ryí byiryíng, nké ben ba/chi ba-waa esong. Bǎmgbán ejí ba/chi ba-jwáp omu, nké ben omu o-kû ng běn ejê. Bǎmgbán ejí ba/chi ba-jêe, nké ben ba/chi ba-fé běn éshwân. 14Bǎmgbán ejí ba/chi ba-kwán ekwan nyí bunyîn-dyityém, nké ben ba/chi ba-tii bubân ḿbú mbu běn ké dyityém, ne ba/chi ba-tii bafip ḿbé mbe běn ké kafâ-dyityém. 15Banet ejí ḿbé n/cá kámbé ba/chi ba-kúng dyizîn enen wǎ kyishû, me Óburúkpâbí mú mu Otu Kyítá n/chi n-ju běn, nké n/chi n-kye banet ḿbé mbe ba-fâ mě dyizîn ńdyí dyifyîfî. 16Nang yeě mú mu o-ryuu ng ojware ké esí ńnyín o/chi o-bí Osówo mú oo*bên ocím emen mú o/ryí* o-jware ǎ. Nang yeě mú mu o-ryí i ocím o/chi o-sem Osówo mú oo*bên ocím emen mú o/ryí*. Afaníkong nyí ké esim a/chi a-shwôm, ba-ráp kányí.
Bubóng ne Esí ḿbyí Byifyîfî
17Óburúkpâbí o/raa o/fu, me mu n-chi i esí nyí efyîfî ne bubóng ḿbú bufyîfî. Ba/chi ba-ráp byěm ḿbyí bii/shwôm ké esim kángkáng. 18Jêe n̂g, bakyú ké bunyîn-dyityém ne banyá ké ńkyí mu n-chi i. Jerúsélem mú ofyîfî mú mu m-bi ng o/chi o-sú ne bunyîn-dyityém ne banet emen ba/chi ba-kyú ké bunyîn-dyityém. 19Me oyén bunyîn-dyityém bu/chi bu-sú mě ké bubwô ḿbú Jerúsélem ne banet emen. Bukyû etii boo*kyú ké mǔ*. Onet oo*kó o/fu, bachwáp ǎ*. 20Bwǎsíng baa*kpú to ne dyikwá* ne kángkáng banet ba/chi ba-kán ba-kâa ne ba-kpú. Banet ḿbé baa/rí bajam-aje batánge ba/chi ba-fu kámbé ba/fu, ba/tôong byisat. Â banet ba/kpú ne aje ányi a-fyi kyi/chi kyi-tông kyi/fu, me nké n/kye kámbé busông. 21-22Banet ba/chi ba-bi byise ba-kyú ké mbyí mbé bayén. Onet o*fí mú o/chi o-koo kámbé kámbyí*. Ba/chi ba-kwón byichí ba-jwáp bato ebe. Banet bakíri baa*jwáp*. Banet ejí ba/chi ba-kyú akpen nyí badarí wǎ byichí. Mbé ba/chi ba-ryí byěm ḿbyí baa/chi ba-tî kanong kanong. 23Bǎmkpóngé ḿbé mbe ba-chi i ba/chi ba-byí dyishí, ne bwǎn ebe baa*ba/chi ba-kâm afaníkong*. Me n/chi n-jware kámbé ne bwǎn ebe ké kángkáng nkéré mú mu o-bâ. 24Ne ba-kûman nshwam mú mbe ba-fâ ba-kyâ mě, me n/chi n-kye kámbé ńkyí mbe ba-ryuu ng. 25Ekpang ne bwǎn-ebû e/chi e-kûryí baryî kyikit kyibónge. Ekpang e/chi e-ryí biǐbyâa wǎ eringe nyí bampong mbe ba-ryí i. Ne efyi ee*ba/chi e-chînémê onet*. Chwǒm kyi*fí ńkyí kyi/chi kyi-chi onet chwǒm ké kaku-ociring ejí ńké Záyon*.
Currently Selected:
Azáya 65: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
