Azáya 66
66
Óburúkpâbí nké o/chi Ejíí Emúmú
1Óburúkpâbí o/raa o/fu, bubóng bu-chi i kakyúng-butu ejí, esí e-chi i kiincincîm-byiká ejí. Ebóng dyizong-kyise ńkyí ben badaman ebi ba-fé mě. Ebóng dyizong-kyikit ńkyí me ndakyú ké nkyí. 2Me oyén nké n/chi ejíí emúmú. Nkyi kyi-nyîn n mě ne banet ḿbé mbe ba-kúng ng byiko ebe kyísí kyísí ne ḿbé byiko mbyi byi-kpú u kámbé ké byibî ebe, ḿbé mbe ba-shî ng mě, ba-chi i ńkyí me n/sét.
3Banet mbe ba-chi i ńkyí kyi/nyîn kámbé. Onet mú mu o-ju ng otyép-mpong o-chi kyifen mu wǎ mú mu o-ju ng onet ké kyifen echi. Mú mu o-yip ng wǎn-etám-ebû o-chi kyifen mu wǎ mú mu o-bún n kabyî kyitông ké kyifen echi. Mú mu o-chi i kyifen ké esang-byichí mu wǎ mú mu o-chi i ké baróng-akûk. Mú mu o-shí i burwan mu wǎ mú mu o-jware ng orím-bukye. Atyém ebe nyi a-jêe ng ké biinunut-akwóp ḿbyí mbe ba-kyâ erím-bakye ofê. 4Me kâng n/chi n-kye kámbé busông, m-bâ kámbé ne byěm ḿbyí mbe ba-shî ng, ké nǎ, ké nkéré mú n/kó, onet o*fí mú o/faa ojá*. Ké nkéré mú n/raa, onet o*fí mú o/fwôo atông*. Nké mbé ba/chi ńkyí kyi/mû kyibî ké achi ejí, ba-cá ńkyí kyi*da mě enyîn*.
5Jwo n̂g ejá nyí Óburúkpâbí, ben mú bamu ba-tím m banê ké ejá emen. Bwǎn-bané enen ḿbé bamu ba-sa ng kámbé kafâ ne mbe ba-ró ng běn ké bubwô ḿbú dyizîn ejí baa/raa ba/fu, mîng n̂g Óburúkpâbí o-tông busa emen eringe nyí be byi/chi byi-ri bunyîn-dyityém enen. Nké mbé nké ba/chi ba-wuri kámbé éshwân. 6Fwôo n̂g atông ba-jwo dyiwonge ńdyí ndyi dyi-fím m ké oshê. Ejá nyi e-fím m ké kiǐtí-kyise-kyifen-Osówo echi. Ejá nyí Óburúkpâbí mu o-kyâ banet-bushwôn emen busông.
7Oshê ejí mú onong mu wǎ onyinyi mú o/fwon wǎn, bufwon bu*da ǎ enwa*. Wǎn-onyinchéng o/byí ǎ, nang byiko o*da/kpá*. 8Yeě oo/jwo dyizong-chwǒm ándyi. Yeě oo/ri dyizong-chwǒm ándyi. Ba-fwon n oshê ké dyicí dyibónge dí. Kyire-oshê kyimúmú kyi-byí i ké abe abónge dí. Ké nǎ, bufwon bu-kám m Záyon bu-bâ, o-fwon bwǎn-banyinchéng emen. 9Óburúkpâbí o/raa o/fu, me m-bâ ne bufwon m-bwa n-fu n/fu, ba*dachîfwon dí*. Osówo enen o/raa o/fu, me mú n/fu, bafwon nké ndabwa n-cít dyifít dí. 10Jêe n̂g ne Jerúsélem, ba-kyú ké bunyîn-dyityém ké bubwô emen, ben kángkáng mú mǔ mu o-jêe ng běn. Ben kángkáng mú ba/mû ba-tii ng ǎ, jêe n̂g ne mǔ ne bunyîn-dyityém. 11Ben ba/chi ba-kyú ké bunyîn-dyityém ké kanong emen wǎ wǎn-ojújwô mú mu o-nyám m abî nyí boné.
12Óburúkpâbí o/raa o/fu, n/chi m-bâ běn ne kanong ńké kaa*man*. Esang nyí eshê nyí ee*nyît mě* e/chi e-sen e-kâm běn wǎ kace ńké kaa*núng*. Ben ba/chi ba-kyú wǎ wǎn mú boné mu o-nen n ǎ, o-yip ǎ ké abwô, o-tún ǎ ne kyijé. 13N/chi n-fé běn dyityém ké Jerúsélem wǎ eringe nyí boné odafé wǎn emen dyityém. 14Ké nkéré baa/ri ba/fu, ńkyín kyi-kú kyi-chi i, ben ba/chi ba-jêe. Kyi/chi kyi-chi běn ba-shwane, ba-firi kanong ké enyam-byiko. Nkéré ámu kâng nké ben ba/chi ba-nyît ba/fu, me Óburúkpâbí mu n-chwáp ng bǎmgbán ejí, ne mu n-tông ng kafâ esa ejí ne banet-bushwôn ejí.
15Ké nǎ, Óburúkpâbí o/chi o-bâ ké okwâ. O/chi o-bâ ne ochéé ké bamútu emen wǎ afú nyí aryên o-ba-kye banet ḿbé mu o-sa ng kafâ ne mbé busông. 16O/chi o-yip okwâ ne kashwám o-kye kángkáng banet ḿbé ké ejíí busông, ḿbé o/két mpan o/fu, ba/chi kyibî, ne o/chi o-ju bujê-banet chwóó.
17Óburúkpâbí o/raa o/fu, okuli-kyikû mú banet ḿbé mbe ba-soo ng byiko ebe ké bakye esháng oo/fárâng, banet ḿbé mbe ba-cen n ké otáng ba-câ ké byifát-ociring, ḿbé mbe ba-ryí i akûk ne efêp ne byiryíng byikíri ḿbyí byidanut. [ 18Me mu n-nyît ng] ekabe ebe ne byěm ebe ḿbyí mbe ba-chi i. [Me mu m-bâ] m-ba-cibi kángkáng banet ḿbé ké ejíí kyikit kyibónge. Ké nkéré mú baa/cibi kyikit kyibónge, ba/chi ba-ri ńkyí busa ejí budaman echi, 19ne ba/chi ba-nyît ba/fu, me nké mu n-kyâ kámbé busông.
Nké n/chi m-mîng kyicê-banet n-twóm kámbé ké eshê nyí tíbítíbí nyí e*da/jwo ne kyi-kim ne eringe nyí me mu kiǐtí* nang busa ejí to e*da/ri ne*. N-twóm m kámbé ba-jâ Syipîn ne [Lyíbya] ne Lyídya mú mu ne bamman eché abán, n-twóm to kámbé ba-jâ Túbal ne Girîs. Mbé ba/chi ba-sét eringe nyí me mu kiǐtí ké eshê ńnyín. 20Mbé ba/chi ba-kpî kángkáng banet-oshê enen ḿbé mbe ké eshê ńnyín ba-ba-kye mě wǎ eyáré. Ba/chi ba-bâ ne mbé ké kaku-ociring ejí, ké Jerúsélem, ké bubyî-orá ne boonyam-atû ne ké bamútu ḿbé bubyî-orá budatut, wǎ eringe nyí banet ḿbé Ézerel badabê ne esang-byichí nyí badachi kyifen ké kiǐtí-kyise-kyifen-Osówo echi, ké byiféng-kyifen echi ḿbyí ociring. 21N/chi n-chi kyicê-banet ebe ba-kyú banchi kyifen ejí, bakíri ba-kyú bǎmgbán-banchi kyifen ejí.
22Wǎ eringe nyí ejíí nyí efyîfî ne bubóng ḿbú bufyîfî byi/chi byi-waa ké busa ejí, éné to nké bwǎn enen ne dyizîn enen byi/chi byi-waa to byi-ca kashú. 23Ké kángkáng ajî-byifen ḿbyí otukáku odabyí ne ké kángkáng ací-ékwâbashi enen, kángkáng banet ḿbé ké ejíí ba/chi ba-bâ ba-ba-kye mě ofê ńnyín ké Jerúsélem. Óburúkpâbí nké o/raa. 24Â ba-kú ba-dim m, ba/chi ba-ri byikwóm-enyam-byiko-banet ḿbé ba/bwom bunwa ne me. Banyabang ḿbé ba/chi ba-ryí kámbé baa*kpú ne banyá* ne okwâ mú o/chi o-shí kámbé oo*nwa eríbî ne banyá*. Ba/chi ba-firi chwǒm ńkyí kyidanut kángkáng banet ḿbé ké ejíí.
Currently Selected:
Azáya 66: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
