Azáya 60
60
Busan ḿbú Ragerage ḿbú Jerúsélem, ḿbú Nkéré mú mu o-bâ ké Kashú
1Bûu, ǎ Jerúsélem,
a-san wǎ óbyísû.
Busan ḿbú Óburúkpâbí ḿbú ragerage mbu bu-san n ǒ ké byiko.
2Kyifip kyi/chi kyi-cít eshê nyí ee*nyît Óburúkpâbí*.
Nké wo, kiinwángé ńkyí Óburúkpâbí kyi/chi kyi-san ǒ ké byiko.
Busan emen ḿbú ragerage bu/chi bu-kyú ne wo.
3Eshê ányi e/chi e-kûbê ké kiinwángé eyên,
batu to ba-kûbê ké dyicí eyên ńdyí dyidacé.
4Tún achi ké byiko eyên a-ri ńkyí nkyi kyi-chi i.
Banet eyên ba-kú ba-kpá ng byiko ḿbyí badafyi.
Bwǎn eyên ḿbé banyinchéng ba/chi ba-fím tíbítíbí ba-fyi.
Ba/chi ba-yip bwǎn-banyinyi eyên wǎ boǒbwásíng.
5Wo a/chi a-ri ńkyín a-jêe.
Wo a/chi a-kûjêe,
a-tím m banê.
Ba/chi ba-yip esang nyí ké eshê nyí ee*nyît Óburúkpâbí*
ba-bâ ǒ ne nyǐ.
Esang ebe e/chi e-nyáng baya ḿbé baryên e-bâ.
6Banet ba/chi ba-fím Médyan ne Éfa ne boonyam-atû chwóó ba-bâ.
Ba/chi ba-fím Shéba ba-bâ ne gûl ne burwan.
Banet ba/chi ba-sét bǎmpém ḿbé banong
kyi-kim ne ńkyí Óburúkpâbí oo/chi.
7Ba/chi ba-bâ ǒ ne kángkáng etyítǎm nyí Kéda ne Nebáyot
nyí ba/chi ba-ba-chi byifen ké kyikit-kyifen echi
eringe nyí kyidanyîn Óburúkpâbí.
Óburúkpâbí o/chi o-chi kiǐtí-kyise-kyifen emen echi kyi-kyú ne ofê.
8Nyín ebóng bǎnsukyíkang ḿbé mbe ba-cen n ba-bâ wǎ éfíbí,
wǎ bunurung ḿbú bu-kú bu-bwa ng esim dyijê.
9Ba-chi i bǎnsukyíkang ḿbé ba/fím eshê nyí tíbítíbí,
ḿbé mbe ba-fyi ng ne banet-Osówo.
Mbé mbe ba-bâ to ne gûl ne syílyíba ba-ba-kye dyizîn ńdyí Osówo Óburúkpâbí mú onong mú Ézerel ofê,
mú oo/chi kángkáng eshê e-kye banet emen ofê.
10Óburúkpâbí o/raa ne Jerúsélem o/fu,
bacinbánet ba/chi ba-bwât ekpe nyí e/wáp ǒ e-fé ké kafâ ba-bi,
ne batu ebe ba/chi ba-kyú bǎmgbán eyên.
Me n/kye ǒ busông ké kiikuku.
Nké kántîk, n-tông ǒ kanong ejí, n-ri ǒ bafip.
11Afyi eyên a/chi a-waa fúú buchú ne esû
eringe nyí batu ḿbé eshê nyí ee*nyît Óburúkpâbí* ba/chi ba-bâ ǒ ne esang ebe.
12Nké eshê nyí e*da ǒ ekye ofê* ba/chi ba-bên kányí kángkáng.
13Ba/chi ba-bâ ne byichí ḿbyí byi/nwa byi-shwôm
ké byizinge ḿbyí Lebánon ba-ba-bwât ǒ ba-bi, ǎ Jerúsélem,
ba-chi kiǐtí-kyise-kyifen ejí echi kyi-nwa,
ba-chi oshê ejí o-firi ne kiǐtí-ofê.
14Bwǎn-banyinchéng ḿbé banet ḿbé ba/mû ba-kyâ běn busông ba/chi ba-bâ ba-ba-tíngê kyísí ba-kye ǒ ofê ebe.
Kángkáng banet ḿbé ba/mû ba/ciring ǒ ba/chi ba-bwom ǒ ké byiká ba-fé ǒ.
Ba/chi ba-kó ǒ oshê mú Óburúkpâbí,
ba-kó ǒ Záyon mú mu oshê mú Osówo mú onong mú Ézerel.
15Wo aa*ba/chi a-chîsa banet kafâ* ba-né ǒ*.
Aa*kyú to oshê mú baa/dim ba-mîng kámú*.
Me n/chi n-chi ǒ a-kûnwa, a-firi kiǐtí,
ne kyikit ńkyí bunyîn-dyityém ḿbú ne banyá ne banyá.
16Eshê nyí ee*nyît Óburúkpâbí*
ne batu ebe ba/chi ba-tún ǒ wǎ eringe nyí boné odakye wǎn emen abî.
Wo a/chi a-nyît a/fu,
me Óburúkpâbí nn/nyii ǒ.
A-nyît to a/fu, Osówo mú kiǐtí mú Ézerel nké mu o-chi i běn ba-firi ké byiko enen.
17Ńkyí m/mû n/chi m-bâ ǒ ne borôn,
n/chi m-bâ ǒ ne gûl,
ne ńkyí m/mû n/chi m-bâ ne biǐré ne byichí,
n/chi m-bâ ǒ ne syílyíba ne borôn,
ne ńkyí m/mû n/chi m-bâ ǒ ne aká,
n/chi m-bâ ǒ ne biǐré.
Batu eyên baa*cít ǒ to*.
N/chi n-chi kámbé ba-tún ǒ ké bukwóp ḿbú acît a*fí*
ne ne bunyîn-dyityém.
18Banet baa*jwo to ejá nyí bunwa*.
Chwǒm kii*bên to oshê eyên*.
Me n/chi n-ku ǒ ké afaníkong,
m-bwom ǒ ké esim wǎ ekpe-kyise.
Wo a/chi a-kpee mě,
ké nǎ, me nn/nyii ǒ.
19Esû ee*kyú to kiinwángé eyên ńkyí esû*
nang otukáku oo*kyú to kiinwángé eyên ńkyí buchú*.
Me Óburúkpâbí n/chi n-kyú kiinwángé eyên ńkyí ne banyá.
Kiinwángé ńkyí busan ejí ḿbú ragerage kyi/chi kyi-san ǒ ké byiko.
20Ací eyên nyí bafip a/chi a-man.
Me Óburúkpâbí n/chi n-kyú kiinwángé eyên ńkyí ne banyá,
ńkyí kyi/chi kyi-rí kyi-shwôm óbyísû ne otukáku.
21Banet eyên kángkáng ba/chi ba-chi ńkyí nkyi kanong,
ne esí nyí n/ryí kámbé ocím e/chi e-já kámbé ne banyá.
Me nké n/kwón kámbé wǎ osu-kyichí,
n-chi kámbé n/fu, batông kángkáng banet eringe nyí me mu kiǐtí.
22Nang kyikû-banet eyên ńkyí kyi*da/jê* kyi/chi kyi-firi wǎ oshê mú mu ne busa.
Ké nkéré mú ochíchí-nkéré oo/fyi,
me n/chi n-chi ńkyín kyi-chi babap.
Me n-chi i Óburúkpâbí.
Currently Selected:
Azáya 60: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
