Azáya 61
61
Óburúkpâbí o/chi o-nyii Banet Emen
1Óburúkpâbí mú mu Otu Kyítá oo/fé mě busa ḿbú Busun emen ké byiko.
Nyǐ oo/cá mě, o-twóm mě o/fu,
me nsét banet-byikpu bǎmpém ḿbé banong,
me n-chi banet ḿbé asa a*fí to kámbé ké byěm* ba-nyange,
me n-sét n/fu, bazú banet ḿbé ba/kám kámbé abwô,
ba-fîm banet ba-byí ké bamgbokobá.
2Nyǐ oo/twóm mě o/fu, me nsét n/fu,
nkéré oo/fyi mú Óburúkpâbí o/chi o-nyii banet emen,
o-kpógê banet-bushwôn ebe.
Nyǐ oo/twóm mě o/fu,
me nfé kángkáng banet ḿbé mbe ba-ta ng dyikán dyityém.
3O/fu, me nkye banet ḿbé mbe ba-ta ng dyikán ké Záyon bunyîn-dyityém ba-mîng bafip,
n-kye kámbé okwan mú akpee ba-mîng mú bafip.
Mbé ba/chi ba-kyú wǎ byichí ḿbyí Óburúkpâbí oo/kwón.
Mbé kángkáng ba/chi ba-chi ńkyí nkyi kanong,
ne banet ba/chi ba-kpee Osówo ké ńkyí nyǐ oo/chi.
4Mbé ba/chi ba-bwât eshê nyí e/mû ee/bûu kaa/rí ba-bi.
5Banet ejí, bacinbánet ba/chi ba-kyú bǎmgbán enen.
Ba/chi ba-kûtún byitú enen,
ba-kpang byifát enen,
ba-tún byíkwôn enen.
6Ne ben ba/chi ba-kû běn enyît wǎ banchi kyifen-Óburúkpâbí
ḿbé mbe bǎmgbán ḿbé Osówo eten.
Ba/chi ba-jwo bunyîn-esang nyí eshê nyí ee*nyît Óburúkpâbí*
ba-kûtông byiko ba/fu, e/firi nyí enen.
7Éshwân nyí ba/fé běn ee/man.
Ben ba/chi ba-kyú ké esí nyí enen,
ne esang enen e/chi e-jê e-shwôm eringe nyí e/mû.
Bunyîn-dyityém enen bu/chi bu-waa ne banyá.
8Óburúkpâbí o/raa o/fu,
mpan mú ntûntû o-jê ng mě,
banet ecít ne byibî echi byi-sa ng mě kafâ.
Me n/chi m-kpêe banet ejí abwô
wǎ eringe nyí me n/ryí ocím n-sem byiko ejí.
Me n-ryí i ocím ne mbé mú o/chi o-waa ne banyá.
9Mbé ba/chi ba-kyú kiǐtí ké burwám-eshê.
Nang yeě nké o/ri kámbé o/chi o-nyît o/fu,
mbé ba-chi i banet ḿbé nyǐ oo/jware kámbé.
10Oshê mú Jerúsélem mu o-jêe ng
ké bubwô ḿbú ńkyí Óburúkpâbí oo/chi.
Mu wǎ onyinyi mú oo/bwá byídí ḿbyí odabé dyibé.
Osówo oo/nyii ǎ, o-chi ǎ o-kpógê.
11Wǎ eringe nyí byimu byi-nyît ng byi/fu,
esang-byichí e/chi e-byí e-kán,
Osówo Óburúkpâbí to o/chi o-nyii banet emen,
ne eshê kángkáng e/chi e-kpee ǎ.
Currently Selected:
Azáya 61: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
