Azáya 59
59
Azáya o/bîn Byibî ḿbyí Banet-Ézerel
1*Da n̂g echi ba-kabe ba/fu, Óburúkpâbí o/jang ejap kyeekyee o-shwôm mú oda běn enyii* aa mu o-jang ng erwôm atông nyí oo*jwo dyikô ńdyí bamu ba-kó ng ba/fu, ochwáp běn*. 2Nkyi ké bubwô ḿbú byibî enen nké o*fí o-jwo ng běn*. Byibî enen nké mbyi byi-pap ng běn ne Osówo ké nkéré ba-kú ba-kan n ba/fu, ba-fâ ǎ. 3Ben bamu ba-sét ng byisédéng, ba-nwa ng anwa, ba-ju ng banet.
4Bamu ba-câ esuk, nké ba*fí ba-sét ng ntûntû*. Bamu ba-sét ng byisédéng eringe nyí mpan oda běn enwa. Bamu ba-chi i okabe enen mú ba/fu, ba-bên n banet bakíri. 5-6Byibî-dyinam ńdyí bamu ba-nam m dyi/bên jangjang wǎ ácě nyí kyibî-efyi. Â a/sé dyícě, efyi e-byí i. Nké byěm ḿbyí bamu ba-nam m bii*chwáp běn*. Byi*da/byí chwǒm* wǎ byídí ḿbyí badachi ké otíntáng-kaǎbú. 7Ben kángkáng nkéré ba-kabe ng chwǒm ńkyí kii*nwa* ne baa*man ebwom ba-chi kánkyí*. Ben banet ḿbé ba*da/chi kyibî* baa*zût běn eju*. Nang nyá nké ba/ce, ba-bên n byěm, 8ne â ben bamu ké kyikit, nang onet oo*fem*. Kángkáng byěm ḿbyí bamu ba-chi i mbyi ne acît eryí. Ba-cen n ké kiǐfáng ńkyí kyi*fí dángdáng* ne nang yeě mú o/cen ké kiǐfáng ánkyi oo*ri bunyîn-dyityém*.
Banet-Ézerel ba/sét Byibî Ebe.
9Banet-Ézerel ba/raa ba/fu, kántîk, bii/nyît ńkyí Osówo o*fí o-nyii ng bě ké abwô nyí banet ḿbé mbe ba-cít ng bě*. Be byimu byi-tî ng achi ké kiinwángé ńkyí byidacen, nké kyifip nké nke nkyi kô, 10ne byimu byi-jóp ng wǎ bansêe achi. Byimu byi-kpán n ácíring ne esû wǎ nkyi buchú, wǎ byimu ké oshê-bakúsí mú kyifip. 11Be byi/firi ké bushî ne bafip. Byimu byi-ryuu ng Osówo byi/fu, onyii bě ké ocît mú mbe ba-cít ng bě ne byibî ḿbyí mbe ba-chi i bě, nké chwǒm kyi*da/chi*.
12Óburúkpâbí, byibî ḿbyí bii/chi byi-bât ǒ bii/jê. Byibî eten byi-kú byi-bîn n bě. Be byimu byi-nyît ng kámbyí kángkáng. 13Be bii/bwom bunwa ne wo, byi-né ǒ, byi-né ebê ne wo ké kyikû. Be bii/cít banet bakíri, byi-bírî ǒ esim. Ekabe eten e*fí ké kafâ*. Byiraa eten mbyi byisédéng byísedeng. 14Bii/ró ntûntû, ne kanong ka*fí to ka-bâ bě fáráng*. Ntûntû o-kú o-kpán n ácíring ké ótíbingé, ntûntû esét o*fí o-ri ng mpât*. 15Ntûntû o/jang esîi o-shwôm mú nang yeě mú o/mîng kyibî echi ba-bwa ng esim ba-chi ǎ kyibî.
Óburúkpâbí o/kpá Byiko ḿbyí odanyii Banet Emen
Óburúkpâbí oo/ri ńkyín, ne kyi*fí kyi-nyîn n ǎ ńkyí ntûntû o*fí*. 16Byiko bii/kaa ǎ ńkyí onet o*fí mú odachwáp banet ḿbé banet mbe ba-cít ng kámbé*. Ké bubwô ámbu, o/chi o-yip busa ḿbú emen nyǐ oyén o-nyii kámbé, o-kpógê. 17O/chi o-fé ntûntû ké byiko wǎ nkyû-byití, o-cít dyikpóge wǎ etam. O/chi o-cít byiko emen ne okabe mú shwanshwan mú odari byěm byi-firi kanong ne mú odasó ewa ké byibî ḿbyí banet mbe ba-ri ng. 18O/chi o-kye banet-bushwôn emen busông ḿbú budakwárê ne ńkyí baa/chi, nang ḿbé mbe ba-kyú u ké eshê nyí tíbítíbí. 19Kyi-fím ké kyicê ńkyí esû nyi e-byí i kyi-ribi ké ńkyí nyi e-ríbî ng, nang yeě o/chi o-shî ǎ ne kiǐtí-busa emen. Nyǐ o/chi o-bâ wǎ kace ńké nke ka-sen n ochéé óchee, ne wǎ afú nyí aryên.
20Óburúkpâbí o/raa ne banet emen o/fu, me n/chi m-bâ ké Jerúsélem m-ba-nwa bunwa ké dyishí enen, n-nyii kángkáng burwám enen ḿbé baa/mîng byibî echi. 21Me mu n-ryí i ocím mún ne ben n/fu, me nn/kye běn busa ejí ne byiraa ejí ḿbyí mu n-tángê e n/fu, byikyú ḿbyí enen ne banyá, ne kyi-fím kyirún kyi-ca kashú, ben ba-man ba-chi ńkyí n/sét běn, ba-tángê bwǎn enen ne bwǎn ebe ba-kûchi ńkyí ndasét kámbé ké kángkáng bankéré ḿbé mbe ba-bâ.
Currently Selected:
Azáya 59: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
