Azáya 55
55
Osówo o/fu, Nyǐ o-ri ng Bě Bafip
1Óburúkpâbí o/raa o/fu,
nang yeě mú omu mu o-jê ng ǎ obâ,
omu mu nyín.
Bâ n̂g, ben mú ba*fí ne akpuga*
ba-ré byiryíng ba-ryí.
Bâ n̂g ba-ba-ré bato ne abî-mpong,
nang kóbo baa*kye*.
2Ebóng bamu ba-bên n akpuga ké byěm ḿbyí baa*zût*.
Ebóng bamu ba-bên n akpuga enen esong e-bwa e-chî běn ekpet enwa.
Fwôo n̂g atông ba-jwo mě,
ba-chi ńkyí mu n-sét ng
ne ba/chi ba-ryí byiryíng ḿbyí byi/nwa byi-shwôm.
3Kántîk, fwôo n̂g atông, ǎ banet ejí,
ba-bâ ba-kâm mě.
Bâ n̂g ba-kâm mě ne ba/chi ba-já dyikpen.
N/chi n-ryí ocím n-sem byiko ejí mú odawaa ne banyá ne ben,
n-kye běn banjware ḿbé n/ryí Otu Dívit ocím.
4Me n/chi ǎ onet-dyishí
ne mú odasét eshê ńkyí badachi,
ne n/tông kámbé busa ejí bu-cen ké abwô enen.
5Kántîk, ben ba/chi ba-kó eshê nyí bacinbánet.
Ké nkéré obónge, mbé ba*da běn enyît*.
Nké kántîk, ba/chi ba-zóngê ochéé ba-ba-kâm běn.
Me Osówo Óburúkpâbí enen mú onong mú Ézerel n/chi n-chi ńkyín kángkáng kyi-chi.
N/chi n-kye běn ofê ne akpee.
6Kántîk mú Óburúkpâbí mu fáráng,
bírî n̂g ba-kâm ǎ,
ba-fé nshwam ba-kye ǎ.
7Byibî-banet byimîng akwóp-dyikpen ebe,
ba-yángê bukwóp ḿbú mbe ba-kabe ng byěm.
Babírî ba-kâm Óburúkpâbí mú mu Osówo eten.
Nyǐ o-ri ng banet bafip,
ne kyibî kii*sóng ǎ epwoo*.
8Óburúkpâbí o/raa o/fu,
ekabe nyí emen e*fí wǎ nyí enen*
ne akwóp nyí emen a/yángê ne nyí enen.
9Eringe nyí bubóng bu/nyâam bu-shwôm esí,
éné to nké ekabe ne akwóp nyí emen byi/nyâam byi-shwôm ḿbyí enen.
10Ejá ejí nyi wǎ abíp ne omu
ḿbyí mbyi byi-fím m kyíbóng byi-bâ ng ecok esí.
Byi-chi i byíkwôn byi-kán,
byi-chi esang-byichí nyí badakwón ne byiryíng ḿbyí badaryí.
11Éné to nké ejá ejí nyí ndaraa edakyú,
ee*mîng echi ńkyí me ndasét n/fu, echi*
e-chi i kángkáng byěm ḿbyí ndatwóm kányí n/fu, echi.
12Ben ba/chi ba-kûjêe ké nkéré baa/mîng Bábyílon.
Ba/chi ba-kpî běn ba-byí ké oshê ámu ne bunyîn-dyityém.
Eku nyí nyáám ne nyí kyísí kyísí e/chi e-kûkwán ekwan,
ne byichí byi/chi byi-kwán ekwan ké bunyîn-dyityém.
13Byichí ḿbyí byiryên byiryên ne ḿbyí byinong byinong byi/chi byi-byí
ké byikit ḿbyí biǐbyâa ne byiwong mbyi kántîk.
Nyín ekap nyí e/chi e-byí,
nyí e/chi e-waa ne banyá,
nyí e/chi e-zîim banet ńkyí Óburúkpâbí oo/chi.
Currently Selected:
Azáya 55: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
