Azáya 56
56
Óburúkpâbí o-koo ng nang Bacinbánet wǎ Banet Emen
1Óburúkpâbí o/raa ne banet emen o/fu, chi n̂g ńkyí kyi*fí ne acît eryí* ne nkyi to kanong, ké nǎ, kaa*rí to ne n-nyii běn*. 2Me n/chi n-jware banet ḿbé kángkáng nkéré mbe ba-tî ng dyicí-ékwâbashi kanong, ba*fí ba-bên n kándyí*. N/chi n-jware banet ḿbé ba*fí ba-chi i kyibî*.
3Ocinónet mú oo/cibi ne banet ḿbé Óburúkpâbí o*dachi o-fu o/fu, Óburúkpâbí oo*ba/chi o-bángê mě n-cibi ne banet emen n-fé ǎ*.
Onet mú baa/pê ǎ o*dachi o-kabe o/fu, ké nǎ, nyǐ oo*ba/chi o-man efwon wǎn* nyǐ oo*ba/chi o-kyú ké burwám-banet ḿbé Osówo*. 4Óburúkpâbí mu o-sét ng dyizong-onet ándyi o/fu, â wo amu o-kyâ mě ofê ké dyicí-ékwâbashi etî kanong, ne â wo amu a-chi i ńkyí nkyi kyi-nyîn n mě, a-tî ng ocím mú a/ryí mě a-sem dyizîn ejí kerededet, 5me n/chi n-chi banet ejí ba-zîim dyizîn eyên kâng ké kiǐtí-kyise-kyifen ejí echi, kyi-bwon kyi-shwôm ńkyí â wo amu ne bwǎn. Ne mbé baa*ba/chi ba-ráp ǒ*.
6Ne Óburúkpâbí mu o-raa ng ne bacinbánet ḿbé ba/firi ké burwám-banet emen, ḿbé nyǐ mu o-jê ng kámbé, ba-fâ ǎ, ḿbé mbe ba-tî ng dyicí-ékwâbashi kanong, ba-tî ocím mú ba/ryí ǎ, o/fu, 7me n/chi m-bâ ne ben ké Záyon mú mu kaku-ociring ejí, n-kye běn bunyîn-dyityém ké kyise ejí ńkyí badafé nshwam, n-koo byifen ḿbyí ben ba/chi ba-chi ba-kye mě ké kyikit-kyifen echi ejí. Ba/chi ba-kûkó kiǐtí-kyise-kyifen ejí echi kyi-kûbángê kyise ńkyí kángkáng banet ḿbé ké ejíí badafé nshwam.
8Óburúkpâbí mú mu Otu Kyítá mú o/rêe o-shwôm, mú oo/kpî banet emen ké oshê okíri o-fyi ne mbé ké byise, oo/ryí ocím o/fu, nyǐ o/chi o-chîbê ne banet bakíri o-ba-cibi ne mbé.
Óburúkpâbí o/bîn Banet-Ashí ḿbé Ézerel
9Óburúkpâbí oo/sét eshê nyí áku o/fu, ebâ wǎ byibî-enyam e-ba-ryí banet emen. 10Mu o-raa ng o/fu, kángkáng banet-ashí, ḿbé ba/mû ba/chi ba-kuri banet ejí ekó, mbe bansêe achi. Ba*fí ba-nyît ng chwǒm*. Mbe wǎ bubyî ḿbú budabám byikit, ḿbú boo*gbó*. Ba-rí i sáre ba-ri ng barê nké nke. Burê bu-nyîn n kámbé erê! 11Mbe wǎ bubyî ḿbú boo*ryí bu-zût*. Banet-ashí ḿbén baa*nyît chwǒm*. Nang yeě nang yeě mu o-chi i ńkyí kyi/nyîn ǎ ne ńkyí kyi/chi kyi-chi ǎ nyǐ kanong. 12Bambwôm bato ḿbén ba-raa ng ba/fu, bâ n̂g byi-ré bato, byi-jwáp eringe nyí byidaman ejwáp. Dyicí ńdyí nencí dyi/chi dyi-nwa dyi-shwôm ńdyí kurún.
Currently Selected:
Azáya 56: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
