Azáya 54
54
Kyijé ńkyí Óburúkpâbí mu ne Banet ḿbé Ézerel
1Oshê mú Jerúsélem,
wo a/mû wǎ onyinyi mú o*da/fwon wǎn*
nké kántîk, a-man n ekwán ekwan a-jêe ne bunyîn-dyityém.
Kántîk, wo a/chi a-fwon bwǎn ba-jê ba-shwôm onyinyi mú otyép emen o*da ǎ emîng*.
2Nere mpyep mú badabí ké byídí mú amu a-kyú u.
Fé byikwap ḿbyí byifyîfî, a-chi kámú o-shwane.
3A/chi a-nere bati-esí eyên byicê byimúmú.
Banet eyên ba/chi ba-koo esí ebe
nyí eshê ekíri nyi e-kyú u ké nyǐ kántîk.
Banet ba/chi ba-sú ké eshê
nyí ba/mû ba/dim ba-mîng kányí.
4*Dachi a-shî*.
Baa*fé ǒ to éshwân*.
Baa*tún ǒ to fúú*.
Wo a/chi a-ráp dyityém ńdyí a*da/fé ne otyép eyên*
wǎ onyi mú ofyîfî,
ne kyibî-dyikpen eyên ńdyí a/kyú kǎnchí wǎ onyǐnkú.
5Osówo mú o/chi ǒ, o/chi o-kyú otyép eyên.
Nyǐ o-bángê e Óburúkpâbí mú o/rêe o-shwôm.
Osówo mú onong mú Ézerel o/chi o-nyii ǒ.
Nyǐ nké mu Otu mú ejíí emúmú.
6Oshê mú Ézerel, wo amu wǎ onyi mú o/tôong wǎsíng,
mú otyép emen o/dim o-mîng ǎ,
o-waa ké bafip ḿbé baryên.
Nké Óburúkpâbí mu o-kó ng ǒ o/fu,
wo abwa esim, o-sét ng ǒ o/fu,
7me n/dim m-mîng ǒ ké kaǎnyín-nkéré,
nké n/chi n-chî ǒ ekoo ne kiǐtí-kyijé.
8Kafâ ka/sa mě m-bírî ǒ esim ké kaǎnyín-nkéré,
nké n/chi n-tông ǒ kyijé ejí ńkyí kyi/chi kyi-waa ne banyá.
Éné nké Óburúkpâbí mú mu o-nyii ng ǒ mu o-sét ng.
9Ké nkéré mú Núwa, n/ryí ocím n/fu,
nn*na to omu* buce bu-sú bu-cít ejíí*.
Kántîk, mu n-ryí i ocím n/fu,
nn*sa to kafâ ne wo*.
Mm*ba/chi m-bîn ǒ* n-kye ǒ nang busông*.
10Eku nyí nyáám ne nyí kyísí kyísí e-man n ebûu,
nké kyijé ńkyí mu ne nkyí ne wo kii*man ne banyá*.
N/chi n-tî ocím ejí mú n/fu,
wo a-kyú u ké bunyîn-dyityém ne banyá.
Éné nké Óburúkpâbí mú amu a-jê ng ǎ mu o-sét ng.
Oshê mú Jerúsélem mú mu o-bâ ké Kashú
11Óburúkpâbí o/raa o/fu,
ô Jerúsélem, wo amu oshê mú mu o-ri ng busông,
onet mú oda ǒ echwáp o*fí*.
Onet o*fí mú oda ǒ efé dyityém*.
N/chi m-bwât kyikû-ekpe-byise eyên m-bi
ne aká nyí adashwane kasî.
12N/chi m-bi biǐnyáám-byikit-mbâm eyên
ne aká nyí adakaa,
n-fé afyi eyên ké aká nyí adasan wǎ okwâ,
m-bi ekpe nyí e/chi e-wáp ǒ e-fé ké kafâ
ké aká nyí adajang enwa.
13Me oyén n/chi n-tángê banet eyên
n-kye kámbé byěm ḿbyí byinong ne bunyîn-dyityém.
14Acît nyí aa*ryí* ne kanong echi byi/chi byi-chi ǒ a-shwane.
Ocît ne bushî bii*ba/chi byi-ta ǒ*.
15Â onet o/kye ǒ bunwa,
ányi o*da/koo busa ne me ne o-kye ǒ*.
Nang yeě nké o/nwa ne wo o/chi o-róng.
16Me nké n/chi nree bure mú mu o-wóngê e okwâ,
o-chi byiyám-byití.
Me to nké n/chi súja mú mu o-yip ng byiyám ámbyi o-ju ng banet.
17Nké kyiyám kyi*fí ńkyí kyi/chi kyi-némê ǒ*.
Wo a/chi a-já ejá nyí adafaa kángkáng banet ḿbé mbe ba-bât ng ǒ byiraa.
Me n/chi m-bwom bǎmgbán ejí ké esim,
n-chi kámbé ba-kpógê.
Óburúkpâbí nké o/raa.
Currently Selected:
Azáya 54: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
