Azáya 53
53
1Banet ba-faa ba/fu,
yeě o/mû o/chi o-bángê [ńkyí byimu byi-sét ng kántîk.]
Yeě o/mû o/chi o-ri bubwô ḿbú Óburúkpâbí ké ńkyín.
2Óburúkpâbí nké o/bángê o/fu,
ḿgbán emen okán wǎ osu-kyichí
ńkyí nkyi kyi-kán n ké kyikit ńkyí omu o*fí*.
O*fí ne ofê ne bunong
ḿbyí byida bě echi byi-tî ǎ achi ké byiko*.
Chwǒm ńkyí kyinong kyi*fí ǎ ké byiko*.
Chwǒm kyi*fí ǎ ńkyí kyida bě echi byi-fárâng ǎ*.
3Be byi/ciring ǎ, byi-né ǎ.
Nyǐ o/ri busông, o-jwo bubân.
Onet o*fí mú o/tún ǎ nang achi ké byiko*.
Be byi/né ǎ wǎ o*da/byí chwǒm*.
4Nké nyǐ o/ri busông ḿbú bu/mû bu/chi bu-kyú ḿbú eten,
ne bubân ḿbú be byi/mû byi/chi byi-jwo.
Be byi/mû byi-kabe ng byi/fu,
Osówo mu o-kyâ ǎ busông ké byibî emen,
5tongfwán ba/mín ǎ ba-némê ǎ ké bubwô-byibî eten.
Be bii/nyange ké bubwô-busông ḿbú nyǐ o/ri,
byi-firi kanong ké byimirî ḿbyí ba/mín ǎ.
6Be ashí amúmú byi/mû wǎ etám-ebû nyí e/mû ee/tánê,
onet ne onet ké kiǐfáng ńkyí emen.
Nké Óburúkpâbí o/chi ǎ nyǐ o-ri busông
ḿbú bu/mû bu/já bě ashí amúmú.
7Ba/tî ǎ ké bukwóp ḿbú boo*nwa*
nké nyǐ o/cíp dyityém o-ryí ofit,
nang ojá o*da/faa*.
Nang ojá o*da/tigi o-faa*
wǎ etám-ebû nyí ba-kú ba-bâ eju kányí,
ne nyí ba-kú ba-bâ epwát kányí eríp ké byiko.
8Ba/kám ǎ, ba-két mpan o-bên ǎ,
ba-yip ǎ edaju,
nang onet obónge mú o/kabe kyi-kim ne dyikpen emen o*fí*.
Ba/ju ǎ ké bubwô-byibî ḿbyí banet eten.
9Ba/fé ǎ ké dyikun ne byibî-banet,
ba-ryii ǎ ne banfang-banet,
nang ké nang kabónge o*da/chi kyibî*
o-sét nang kyisédéng*.
10Óburúkpâbí o/raa o/fu,
me nké n/fu, ori busông.
Bukyû emen bu/mû kyifen ńkyí ndapwoo banet byibî.
Ne ké bubwô ámbu, nyǐ o/chi o-ri bwǎn ḿbé bwǎn emen.
O/chi o-kpen chwóó,
ne okabe ejí o/chi o-cen ké bubwô emen ne o-byí dyishí.
11Ké nkéré oo/ri busông chwóó,
o/chi o-chîbwa ké bunyîn-dyityém.
Nyǐ o/chi o-nyît o/fu,
nyǐ o*da/ri afaníkong dyikáá*.
Ḿgbán ejí mú o/chi kanong o/chi o-ri busông ké dyishí ńdyí banet chwóó,
ne ké bubwô emen, n/chi m-pwoo kámbé.
12Ne ké bubwô ámbu, n/chi n-kye ǎ kiǐtí-ofê ké burwám-biǐtí-banet.
Ké nǎ, nyǐ o/bángê o-kye dyikpen emen,
o-koo edángé nyí byibî-banet badakoo.
Nyǐ o/ri busông ké dyishí-banchi byibî chwóó,
[o-fé nshwam o/fu,
kyi/bát Osówo opwoo kámbé ké byibî ebe.]
Currently Selected:
Azáya 53: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
