Azáya 52
52
Osówo o/chi o-nyii Jerúsélem
1Jerúsélem, chîkyú kiǐtí ne shwaneshwane.
Oshê mú onong mú o/já Osówo,
cít byiko eyên ne bunong.
Banet ḿbé ba/bángê ké bakye esháng baa*ba/chi ba-chînung ké afyi eyên*.
2Pâ byiko eyên, ǎ Jerúsélem.
Bûu ké édúkǎndú a-kyú ké kakyúng-butu eyên.
Ben banet ḿbé Záyon ḿbé ba/kám běn,
két n̂g bamgbokobá ḿbé ba/fé běn.
3Óburúkpâbí o/sét banet emen o/fu, onet o*fí mú o/kye akpuga ké dyishí enen* ké nkéré ba/firi básóng*. Ké bukwóp ámbu bubónge, chwǒm kyi*fí ńkyí ba/chi ba-kye ne ba-zú běn abwô*. 4Ké nkéré ben ba/dim ba/fu, ba-da ng ekyú ké Éjip wǎ bacinbánet, ben ba/dim ké byiko enen. Banet ḿbé Asyírya kâng ba/kám běn ké busa, nang chwǒm ba*da/kye ké dyishí enen*. 5Kántîk, dyizong-chwǒm ándyi nké dii/chîchi ké Bábyílon. Ben ba/firi básóng, nang chwǒm ké dyishí enen ba*da/kye*. Banet ḿbé bamu ké abwô ebe mbe ba-tông ng byiko, ba-kyâ mě edángé kángkáng nkéré. 6Ké nkéré mú mu o-bâ, ben ba/chi ba-nyît ba/fu, me n-chi i Osówo ne nn/sét běn byěm.
7Kyi-chi i chwǒm-bunyîn-dyityém ńkyí adari onet-kyitwóm
ké mu o-nyáng ng eku o-bâ,
o-bâ ne bǎmpém ḿbé banong, bǎmpém ḿbé bunyîn-dyityém.
Onet-kyitwóm ámu mu o-sét ng dyikpóge ńdyí baa/kpógê.
O-sét ng Záyon o/fu, Osówo enen o-chi i Otu.
8Banet ḿbé mbe ba-bám m oshê mbe ba-wonge e,
ba-wonge e ne barî ké bunyîn-dyityém.
Mbé ba-man n ekúng achi ebe ba-ri
eringe nyí Óburúkpâbí oo/bwa esim o-kâm Záyon.
9Ben biǐbwô-byise ḿbyí Jerúsélem,
kû n̂g ewonge dyiwonge ńdyí bunyîn-dyityém.
Óburúkpâbí o/chi o-nyii oshê emen o-koo,
o-fé banet emen dyityém.
10Óburúkpâbí o/chi o-tông busa emen ḿbú bunong.
O/chi o-nyii banet emen,
ne ejíí emúmú e/chi e-ri.
11Ben kángkáng ḿbé bamu ba-níbî ng byěm
ḿbyí kiǐtí-kyise-kyifen-Osówo echi,
dim m̂ ké Bábyílon.
*Da n̂g echi ba-ta chwǒm-ociring nang kyibónge*.
Tî n̂g byiko enen kpárám, ba-dim.
12Mpéne mún, baa*ba/chi ba-chîdim ké ochéé*.
Baa*kan ba/fu, ba-chêe ng ochéng*.
Óburúkpâbí mú mu Osówo eyên o/chi o-tông běn kiǐfáng,
o-ku běn byicê byimúmú ké afaníkong.
Ḿgbán mú mu o-ri ng Busông
13Óburúkpâbí o/raa o/fu,
ḿgbán ejí o/chi o-chi bǎmkpóngé emen ba-man.
[Ba/chi ba-kye ǎ kiǐtí-ofê.]
14Kyi/chi bujê-banet chwǒm-byiko eziri
ké nkéré mú ba/ri ǎ.
Enyam-byiko emen e/mû ee/yángê,
e*fí to wǎ nyí onet*.
15Nké kántîk, kyi/chi kyi-chi eshê chwóó wǎ chwǒm-akat kyi-kim ne nyǐ.
Ne batu ba/chi ba-waa ocím ké dyishí fúú baa*man to efaa ojá*.
Ba/chi ba-ri, ba-nyît chwǒm ńkyí mbé ba/mû ba*da/nyît ne*.
Currently Selected:
Azáya 52: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
