Azáya 51
51
Byiraa ḿbyí byidafé Jerúsélem Dyityém
1Óburúkpâbí o/fu, fwôo n̂g atông ba-jwo mě,
ben mú bamu ba-ryuu ng ba/fu, me nnyii běn,
ben mú bamu ba-bâ ba-kâm m mě ba/fu,
me nchwáp běn.
Kabe n̂g kyi-kim ne buká ḿbú ben ba/fím ké mbú,
kyi-kim ne kyikit-aká ńkyí ba/sím běn ba-fîm.
2Kabe n̂g kyi-kim ne Ébarahâm
mú bonchí enen mú kpákpá
ne kyi-kim ne Sirá mú o/fwon běn kángkáng.
Ké nkéré mú me n/kó Ébarahâm,
nyǐ o/mû o*fí ne wǎn*
nké me n/jware ǎ, n-kye ǎ bwǎn.
Me n/chi kyikû-banet enen kyi-jê.
3Me n/chi n-ri Jerúsélem ne kángkáng banet ḿbé mbe ba-kyú u ké biǐbwô-byise emen bafip.
Nang ké esí nyí Jerúsélem nyi kyikim-dyikán,
me n/chi n-chi kányí e-firi kyifát,
wǎ kyifát ńkyí n/chi ké Édin.
Bunyîn-dyityém bu/chi bu-kyú ányi,
ne banet ba/chi ba-kwán ekwan-akpee
ne asǎma ekó ba-kye mě.
4Banet ejí, fwôo n̂g atông ba-jwo mě.
Fwôo n̂g atông ba-jwo ńkyí me mu n-sét ng.
Me n-tángê e banet byiraa ejí.
Byije ejí byi/chi byi-bâ kámbé ne kiinwángé.
5Me n/chi m-bâ babap m-ba-nyii kámbé.
Nkéré mú me n/chi m-kpógê oo/fárâng.
Me oyén n/chi n-kyú Otu mú ejíí emúmú.
Eshê nyí tíbítíbí nyi e-bám m mě e/fu, me mbâ.
Nyi e-bám m ne okabe e/fu, me mba-nyii kámbé.
6Tún n̂ achi kyíbóng,
ba-tún to kyísí.
Bubóng bu/chi bu-rím wǎ arúkwâ.
Ejíí e/chi e-kâa wǎ okâa-kyídí,
ne kángkáng banet emen ba/chi ba-kpú wǎ ecincing.
Nké onyii-banet mú me n/chi m-bâ ne mǔ o/chi o-waa ne banyá.
Dyikpóge ńdyí me n/chi m-kpógê dyi/chi dyi-kyú nkuli kyikû.
7Ben mú bamu ba-nyît ng ńkyí nkyi kanong,
fwôo n̂g atông ba-jwo mě,
mú baa/kúng byiraa ejí ḿbyí n/tángê běn ba-fé ké atyém.
*Da n̂g echi ba-shî*
â banet ba-kú ba-jwó ng běn*
ba-kyâ běn edángé*.
8Mbé ba/chi ba-rím wǎ byídí ḿbyí ebá edaryí.
Nké onyii-banet mú me n/chi m-bâ ne mǔ o-waa ng ne banyá.
Dyikpóge ejí ńdyí me n/chi m-kpógê dyi/chi dyi-waa kángkáng nkéré.
9Óburúkpâbí, bûu a-chwáp bě.
Yip busa eyên a-nyii bě.
Yip kámbú a-chi byěm
wǎ eringe nyí a/chi ké bankéré ḿbé ba/shwôm ké esim chwóó.
Wo nké a/két kiǐnyám-baya ńkyí badakó Ráhap boǒkím boǒkím.
10Wo to nké a/chi baya ḿbé baryên ba-núng,
a-chi kiǐfáng kyi-nyáng baya ámbe,
eringe nyí banet ḿbé wo amu a-nyii ng kámbé badaman enyáng.
11Banet ḿbé wo aa/nyii kámbé ba/chi ba-ribi Jerúsélem ne bunyîn-dyityém,
ba-kûjêe ba-wonge e ba-kwán n ekwan.
Ba/chi ba-kyú ké bunyîn-dyityém ne banyá,
ba-fem to ké bafip ne afaníkong ne banyá.
12Óburúkpâbí o/raa o/fu,
me nké mu n-fâ běn busa.
Ebóng ben bamu ba-shî ng onet mú odakpú,
mú o*fí o-rí i o-shwôm biǐbyâa*.
13Ben baa/ráp Óburúkpâbí mú o/chi běn?
Mú o/paam bubóng,
o-sím byikwap ḿbyí byidaníbî ejíí o-fé kyísí?
Ebóng bamu ba-kyú u kángkáng nkéré ké bushî
ḿbú busa-dyityém ḿbú banet ḿbé mbe ba-cít ng běn,
ne ḿbú banet ḿbé baa/kpá byiko ba/fu,
mbé ba-ju ng běn.
Busa-dyityém ebe boo*ta běn to*.
14Kaa*rí to ne ba-fîm banet ḿbé mbe ké mgbokobá*.
Mbé ba/chi ba-kpen ba-tíbî,
ne ba/chi ba-já kángkáng byiryíng ḿbyí mbe ba-ryuu ng.
15Me n-chi i Óburúkpâbí mú mu Osówo enen.
Me nké mu m-buu ng baya ḿbé baryên,
n-chi kámbé ba-kûrime.
Me m-bángê e Óburúkpâbí mú o/rêe o-shwôm.
16Me nké [m/paam] bubóng,
n-sím byikwap ḿbyí byidaníbî ejíí n-fé kyísí.
Me mu n-sét ng Jerúsélem n/fu,
ben ba-chi i banet ejí.
Me nn/tángê běn byiraa ejí,
ne mu n-yip ng bubwô ejí n-ku ng běn ké afaníkong.
Busông eri ḿbú Jerúsélem bu/man.
17Jerúsélem, bûu nensang.
Ninge byiko eyên a-bûu nensang.
Wo aa/jwáp mmîk-busông mú Óburúkpâbí o/kúng ké kafâ esa emen o-kye ǒ a-jwáp.
Wo a/jwáp kámú,
ne o/chi ǒ a-kpet ecíng.
18Onet o*fí mú oda ǒ etông bukwóp*.
Onet o*fí ké burwám-banet eyên mú oda ǒ eníbî ké bubwô*.
19Afaníkong afee aa/róng ǒ.
Byití bii/bên esí eyên,
ne banet eyên baa/waa esong.
Onet o*fí mú oda ǒ eri bafip*.
20Ké akam-kyiká-oshê nang ará,
banet eyên ba-kú ba-myii ng kyeekyee.
Mbé ba/firi wǎ enyam nyí kaǎtám kaa/kám kányí.
Mbé baa/jwo busa ḿbú kafâ esa ńké Osówo.
21Ben banet ḿbé Jerúsélem ḿbé bamu ba-ri ng afaníkong,
ben mú bamu ba-cíng ng wǎ bamu ba-bwóm m bato,
22Óburúkpâbí mú mu Osówo enen
mu o-ku ng běn ké afaníkong, o/fu,
n-kú n-kúng ng mmîk mú n/kye běn ké nkéré mú kafâ nke ka-sa ng mě.
Ben baa*jwáp to bato ḿbé mbe ba-chi i běn ba-cíng*.
23Me n/chi n-yip kámbé n-kye banet ḿbé ba/cít běn,
n-kye banet ḿbé ba/chi běn ba-rí ké byiká-oshê,
ba-cím běn wǎ ben ba-chi i ecing.
Currently Selected:
Azáya 51: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
