Azáya 50
50
1Óburúkpâbí o/raa o/fu,
ben bamu ba-kabe ng ba/fu,
me n/ró banet ejí wǎ onyinchéng mú odaman dyibé ne onyi emen dí.
Banwet ḿbé byi/chi byi/fu,
dyibé dii/man mbe nyá kâng.
Ben bamu ba-kabe ng ba/fu,
me n/yip běn n-shee kyíjí
wǎ onyinchéng mú odayip bwǎn o-shee ba-bírî básóng dí.
Aa*wááng*. Ben ba/kám běn ba-dim ne ben ké bubwô-byibî enen.
Ba/ró běn ké bubwô-byibî-byěm ḿbyí ba/chi.
2Ebóng banet ejí ba/né ebángê ne me
ké nkéré n/dim n-kâm kámbé n/fu, n-nyii ng kámbé.
Ebóng mbé ba*da/bángê ké nkéré n/kó kámbé*.
Me n/jang ejap kyeekyee mú mm*man enyii kámbé*?
Me m-man n enyán baya ḿbé baryên ba-núng,
n-chi buce bu-firi kyikim-dyikán,
ekworê nyí e/mû ké mbú e-kpú kyijé-omu.
3Me m-man n echi bubóng bu-jîi
wǎ mbu bu-ta ng dyikán ńdyí onet o/kpú.
Byitwóm ebángê ḿbyí Ḿgbán mú Óburúkpâbí.
4Óburúkpâbí mú mu Otu Kyítá oo/tángê mě ńkyí ndasét
eringe nyí ndachi banet ḿbé mbe kyeekyee ba-firi ne busa.
Kángkáng dyicófóróng o-chi i mě n-firi ne bunyîn-dyityém
ḿbú ndajwo ńkyí mu o-bâ mě etángê.
5Óburúkpâbí mú mu Otu Kyítá oo/kye mě byinyídíng,
ne me n*da/né* m-bírî ǎ esim*.
6Me n/nyîim esim ejí n-tî banet ḿbé mbe ba-mín n mě.
N*da/fu kámbé n/fu, bamîng*
ké nkéré mbe ba-kyâ mě edángé*
nang ké nkéré mbe ba-zú ng mě kyiti*
ba-shú u mě akorong ké bushú*.
7Nké edángé ebe ee*chi mě chwǒm*
ké nǎ, Óburúkpâbí mú mu Otu Kyítá mu o-chwáp ng mě.
Me mu n-níbî ng byiko ejí n-koo edángé ányi.
Me mu n-nyît ng baa*ba/chi ba-fé mě éshwân*.
8Ké nǎ, Osówo mu jwángjwáng,
ne o/chi o-tông o/fu,
me n*da/chi kyibî*.
Onet mu kô mú oda mě eman ebât byiraa dí.
Byidim kâng esuk burwám ne onet ámu,
o-da-sét ńkyí me n/chi.
9Óburúkpâbí oyén mú mu Otu Kyítá mu mě ké esim.
Yeě kâng odaman etông o/fu,
me n/chi kyibî.
Kángkáng banet ḿbé mbe ba-bât ng mě byiraa ba/chi ba-rím.
Ba/chi ba-rím wǎ byídí ḿbyí ebá edaryí.
10Ben kángkáng mú bamu ba-kyâ Óburúkpâbí ofê,
ba-chi i byěm ḿbyí ḿgbán emen mu o-sét ng běn,
kiǐfáng ńkyí bamu ba-cen n kyi-man n ekyú kyifip kyífip,
nké fé n̂g dyityém ne Óburúkpâbí,
jêem m̂ esim ne Osówo enen.
11Ben kángkáng mú bamu ba-nam m ba/fu,
ben ba-ju ng banet bakíri,
dyinam enen ńdyí bamu ba-nam m dyi/chi dyi-ju běn.
Óburúkpâbí oyén o/chi o-chi ńkyín kyi-chi.
Ben ba/chi ba-ri afaníkong nyí aa*nwa eri*.
Currently Selected:
Azáya 50: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
