Azáya 41
41
Osówo o/ryí Ézerel Ocím
1Osówo o/raa o/fu,
ben eshê nyí nyi tíbítíbí,
cíbî n̂g pyêp, ba-fwôo atông ba-jwo mě.
Kpá n̂g byiko ḿbyí badapan mpan enen ké esuk.
Ba/chi ba-kye běn nkéré mú badasét.
Bâ n̂g byi-kyú kyikit kyibónge byi-ri onet mú mpan oda ǎ enwa.
2Yeě o/mû o/bê ne onet mú o/kpógê byití
ké kyicê ńkyí esû nyi e-byí i,
ne o-chi ǎ o-kûkpógê nang nyá nang nyá nké o/ce.
Yeě o/chi ǎ o-kpógê eshê.
Kashwám emen nke ka-cere ng kámbé ka-pwó ng kyísí
wǎ ba-chi i édúkǎndú.
Abán emen nyi a-pwó ng kámbé byiryibyiryi
wǎ biǐbyâa ḿbyí afú nyi a-kúng ng kámbyí.
3O-nwa ng o-câ ne mbé ké kyikû
nang chwǒm kii*chi ǎ*.
O-zóngê e o-câ ochéé óchee a/fu,
o*fí o-ta ng byiká kyísí*.
4Yeě o/cen ne ńkyín kyi-chi.
Yeě o/tî bukwóp ḿbú byěm ḿbyín mbyi byi-chi i.
Me Óburúkpâbí m/mû ányi ké kiimkpet kyikû,
ne me Óburúkpâbí n/chi n-kyú ányi to ké nkuli kyikû.
5Banet ḿbé mbe ba-kyú u ké eshê nyí tíbítíbí baa/ri ńkyí me n/chi.
Ba-kú ba-shî ng ba-tím m banê.
Ké bubwô ámbu, mbé ashí amúmú ba/cibi ba-bâ.
6Banchi bampwô ba-chwáp ng barî,
ba-fâ barî busa.
7Kápyínta o-kó ng nree bure agafwó.
Onet mú mu o-chi i orím-bukye o-firi gogégogé o-fâ onet mú mu o-yip ng byipang emen o-cibi ng kyikit kyibónge busa.
Ba-raa ng ba/fu, bǎmkpóngé ba/nwa,
ne ba-yip orím-bukye ámu ba-mán ké émúrúsún eringe nyí oo*nwa eyip*.
8Nké ben banet-Ézerel bamu bǎmgbán ejí,
ben nké bamu banet ḿbé me nn/cá kámbé,
ḿbé bwǎn ḿbé Ébarahâm mú ocín ejí.
9Me n/kúng běn ké bukô-ejíí m-bâ ne ben.
Me n/kó běn ké bakô emen ḿbé ba/jang etíbî ne n-sét běn n/fu, ben ba-chi i ḿgbán ejí.
Me n*da běn ené* nké n/cá běn.
10*Da n̂g echi ba-shî* me mu ne ben.
Me n-chi i Osówo enen.
*Da n̂g echi ba-shî nang chwǒm kyibónge*.
Me n/chi n-chi běn ba-shwane, n-nyángê běn.
Me n/chi n-ku běn ké afaníkong, n-nyii běn.
11Banet ḿbé kafâ nke ka-sa ng kámbé ne ben ba/chi ba-nyît éshwân nyí dyikpóge.
Banet ḿbé mbe ba-nwa ng bunwa ne ben ba/chi ba-kpú,
12ne ba/chi ba-rím ké ejíí.
13Me n-chi i Osówo Óburúkpâbí enen.
Me mu n-fâ běn busa,
n-sét ng běn n/fu, *da n̂g eshî*.
Me n/chi n-chwáp běn.
14Óburúkpâbí o/raa o/fu, Ézerel,
nang ké ba*da/jê* ne bamu kyeekyee,
*da n̂g echi ba-shî*.
Me n/chi n-chwáp běn.
Me Osówo mú onong mú Ézerel nké mu n-nyii ng běn.
15Me n/chi n-chi běn wǎ kiimbuu byěm
ne asháng nyí afyîfî, nyí adanen.
Ba/chi ba-bú eku ba-bên kányí.
Eku e/chi e-sêe rugirugi,
e-bírî édúkǎndú.
16Ba/chi ba-yip kányí ba-twóp kyíbóng,
ne bufú bu/chi bu-kúng kányí bu-dim ne nyǐ bu-pwó kányí byiryibyiryi.
Ne ben kâng ba/chi ba-kyú ké bunyîn-dyityém,
ké nǎ, me n-chi i Osówo enen.
Ben ba/chi ba-kpee mě me Osówo mú onong mú Ézerel.
17Me Óburúkpâbí kâng n/chi n-jwo nshwam mú banet ejí
ké nkéré ba/firi ké bukaa ḿbú omu,
ké nkéré mú omu oo/jê kámbé,
emiríng ebe e-jwóm.
Me Osówo mú Ézerel mm*ba/chi m-mîng kámbé ne banyá*.
18Me n/chi n-chi buce bu-sen ké biǐjínjwóm-eku, ne ké ewo.
N/chi m-bírî kiǐyíyé-kyikim-dyikán kyi-firi baya,
ne esí nyí ee/jwóm e-firi ne buce ḿbú budasen.
19Me n/chi n-chi byichí ké azong ké azong byi-byí
ké kyikit ńkyí byichí byi/mû byi*fí*.
Kyizinge-byichí byiryên kyi/chi kyi-firi
ké kyikit ńkyí byichí byi/mû byi*fí*.
20Banet ba/chi ba-ri ńkyín ba-nyît ba/fu,
me Óburúkpâbí nké n/chi kánkyí.
Ba/chi ba-nyît ba/fu,
Osówo mú onong mú Ézerel nké o/cen ne nkyí ne kyi-chi.
Óburúkpâbí o/kó Esówo nyí e*fí ké Kafâ* o/fu, ekan Busa Ebe
21Óburúkpâbí mú mu Otu mú Ézerel o/raa ńkyín o/fu,
ben esówo nyí ké ejíí,
bâ n̂g ne mpan enen.
Bâ n̂g ne byiraa ḿbyí ben ba/kabe ba/fu,
â ba/sét kyi/chi kyi-nwa kyi-kye běn.
22Bâ n̂g nyín ba-ba-sét ńkyí kyi/chi kyi-chi ké nkéré mú ké kashú,
eringe nyí byi/chi byi-nyît kánkyí ké nkéré mú kii/chi.
Sét n̂g esuk byěm ḿbyí bii/chi ké esim,
ne ba-sét bě to eringe nyí kyikû ebe kyi/byí.
23Sét n̂g bě ńkyí kyi/chi kyi-chi ké nkéré mú mu o-bâ ké kashú,
ne byi/chi byi-nyît kâng byi/fu,
ben ba-chi i esówo ké ntûntû.
Chi n̂g chwǒm ńkyí kyinong nang ńkyí kyibî.
Chi n̂g bě byi-firi ne bushî,
byi-waa ocím ké dyishí fúú.
24Ben ne kángkáng byěm ḿbyí bamu ba-chi i ba*da/byí chwǒm*.
Banet ḿbé mbe ba-fâ běn mbe ba-nut ng.
25Me nn/cá onet mú mu o-kyú u ké kyicê ńkyí esû nyi e-byí i.
N/chi m-bâ ne nyǐ o-kpet ne bunwa ké kyicê ńkyí bushûyû.
Mu o-cím m batu wǎ mu o-cím m biǐntóng,
wǎ eringe nyí nchi butí odanwat bumee.
26Yeě ké burwám enen mú o/sét o/fu,
ńkyín kyi/chi kyi-chi,
eringe nyí byidaman esét byi/fu,
wo a/sét ntûntû.
Onet o*fí ké burwám enen mú o/faa nang ojá kyi-kim ne nkyí*.
Onet o*fí mú o/jwo běn ba-raa nang kaǎchwóm*.
[ 27Me Óburúkpâbí nké m/bwóp kashú n-sét Záyon bǎmpém ḿbén.
Me n/twóm onet-kyitwóm ké Jerúsélem n/fu,
osét o/fu, banet enen mbe ba-bâ.
Ba-kú ba-bâ dyijê.]
28Ké nkéré m/bírî achi n-tún esówo ányi,
osówo o*fí mú o/mû ne chwǒm ńkyí odasét*.
Nang obónge o*da/man efaa bǎmbím ḿbé m/bí*.
29Kángkáng esówo ńnyín e*da/byí chwǒm*.
Ee*man echi nang kaǎchwóm*.
Erím-bakye ńnyín nyi kyeekyee,
busa bu*fí kányí*.
Currently Selected:
Azáya 41: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
