Azáya 40
40
Okabe etî
1Osówo eten o/fu,
fé banet ejí dyityém.
Fé kámbé dyityém.
2Fé banet ḿbé Jerúsélem busa.
Sét kámbé a/fu,
baa/ri afaníkong a-kwárê,
ne mm/pwoo kámbé ké byibî ebe kángkáng.
Nn/kye kámbé busông ḿbú bu/kwárê kerededet ne byibî ebe.
3Onet obónge o/wonge o/fu,
chi n̂g bukwóp ké kyikim-dyikán ba-tî Óburúkpâbí.
Tyém m̂ kiǐfáng ké kyikim-dyikán ba-tî Osówo eten.
4Tim m̂ owo nang orá,
ba-tare kángkáng eku.
Eku e/chi e-firi kyikit-ndege ńdege,
ne kyikit ńkyí nkyi ne abíng kyi/chi kyi-firi taretare.
5Óburúkpâbí kâng o/chi o-tông busan emen ḿbú ragerage,
ne kángkáng banet ba/chi ba-ri kámbú.
Óburúkpâbí oyén nké o/ryí ocím mún.
6Onet obónge o/chîwonge o/fu,
Azáya, sét banet kyitwóm.
Me m-bí n/fu,
ebóng kyitwóm ńkyí ndasét.
O-sét mě o/fu, sét a/fu,
kángkáng banet mbe wǎ biǐbyâa.
Mbé baa*rí ba-shwôm ekong-byichí*.
7Biǐbyâa byi-kpú u,
ekong-byichí e-kpú u omu,
ké nkéré Óburúkpâbí oo/twóm bufú bu-tugi ké mbyí.
Banet ba-rí i ba-shwôm biǐbyâa.
8Ké ntûntû, biǐbyâa byi-kpú u,
ekong-byichí e-kpú u omu.
Nké ejá nyí Osówo eten e-waa ng ne banyá.
[ 9Oshê mú Jerúsélem,
yú kyíbóng-kaku ńké ka/nyâam a-sét banet bǎmpém ḿbé banong.]
Kó, ǎ Záyon, ne ejá kyíbóng kyíbóng,
a-sét bǎmpém ḿbé banong.
Raa, *dachi a-shî*.
Sét eshê nyí Júda a/fu,
Osówo ebe o-kú o-bâ.
10Óburúkpâbí mú mu Otu Kyítá mu o-bâ ebatún banet emen ne busa,
o-bâ ne [banet ḿbé nyǐ oo/nyii kámbé] o-koo.
11O/chi o-kûtún banet emen wǎ mbâm ebû.
O/chi o-kpaa boǒbwán-ebû o-tî kyikit kyibónge,
o-yip kámbú o-fé ké abwô,
o-kpî bané ebe degere o-fyi ne mbé.
Osówo mú Ézerel mú o*fí ne Nkan*
12Onet mu kô mú odaman ekan omu mú mu ké ejíí ké omu ekpé ké abwô dí,
ne mú odaman eyip abwô o-kan bubóng dí.
Onet mu kô mú odaman efé ecing nyí nyi ké ejíí emúmú ké mmîk dí,
nang mú odaman eyip ecím-buku o-kan ké órúmá dí.
13Onet mu kô mú odaman esét Óburúkpâbí ńkyí odachi dí.
Yeě oda ǎ eman etángê,
o-kye ǎ nang bacê.
14Osówo mu o-cibi ng ne yeě ne o-nyît chwǒm ne eringe nyí kyi/byí,
ne o-nyît to eringe nyí badachi byěm.
15Ké bushú ḿbú Óburúkpâbí,
kángkáng ejíí e*da/byí chwǒm*
e*da/rêe e-shwôm dyibán-omu*.
Esí nyí baya ḿbé baryên ba/wáp kányí ba-fé ké kafâ
e*fí e-ró ng e-shwôm ndú-ecing*.
16Kángkáng enyam nyí nyi ké byizinge ḿbyí Lebánon e*da/kwárê nyí badachi kyifen ba-kye Osówo eten*.
Nang byichí to ḿbyí mbyi ké mbyí byi*da/kwárê* ḿbyí badacibi okwâ mú kyifen-Osówo echi*.
17Kángkáng ejíí e*da ǎ ebyí chwǒm nang kaǎnyín*.
18Ba-yip ng yeě ba-kan ne Osówo.
Wo a-cen n nǎ ne a-sét eringe nyí nyǐ mu.
[ 19Nyǐ o*fí wǎ orím-bukye mú banet mbe ba-sím m*
mú banree bure mbe ba-mwane e kámú gûl*
ba-fé kyikû ńkyí ba/chi ké syílyíba*.
20Onet mú oo*man eré gûl ne syílyíba*]
mu o-cá ng kyichí ńkyí kii*fwoo*
o-kye onet-mpwô o-sím ǎ orím-bukye mú oo*myii kyísí*.
21Ben ba*fí ba-nyît ng*?
Ba*da běn esét ké nkéré mú o/shwôm ké esim*?
Ben ba*da/jwo ne eringe nyí ejíí e/kpet*?
22Nyǐ mú mu o-kyú u ké kakyúng-butu emen ńké nke kyíbóng-bubóng nké o/chi kányí.
Banet ḿbé mbe kyísí ba/sîi wǎ ejujware.
Nyǐ o/paam bubóng wǎ ékpígí,
wǎ mpyep mú onet odakyú.
23Mu o-shû ng batu ḿbé mbe ne busa ké butu ebe o-tî kyísí,
o-chi kámbé baa*byí to chwǒm*.
24Mbé mbe wǎ esu-byichí nyí e/byí abeabe,
eriri e*da/kám ne kyísí*.
 Óburúkpâbí o/twóm afú,
ba-jwóm m, afú ányi a-tugi kámbé a-pwó wǎ biǐbyâa.
25Ba-yip ng yeě kâng ba-kan ne Osówo mú onong.
Osówo okíri mu wǎ nyǐ dí.
26Bírî n̂g achi kyíbóng.
Yeě o/chi ékpére nyí bamu ba-ri ng.
Nyǐ mú mu o-tông ng kányí kiǐfáng wǎ basúja,
mu o-nyît ng ne ocím ebe,
ne o/kye ókpére nang orá dyizîn.
Busa emen bu/jê kanong kanong
ḿbú ókpére nang obónge o*fí o-tánê e*.
27Banet ḿbé Ézerel, ebóng kâng ńkyí ben bamu ba-sét ng ba/fu,
Óburúkpâbí o*fí o-nyît ng afaníkong enen*
ba/fu to, o*fí o-kérê ng*
â ba/pan běn kyibî-mpan*.
28Ben ba*fí ba-nyît ng*?
Ba*da/jwo ne*?
Óburúkpâbí mu Osówo mú ne banyá.
Nyǐ nké o/chi ejíí emúmú.
Nyǐ oo*kyee* o-jwâa nang asa*.
Onet o*fí mú odanyît ńkyí nyǐ mu o-kabe ng*.
29Nyǐ mu o-chi i banet ḿbé ba*fí ne busa*
ne ḿbé baa/kyee ba-firi ne busa.
30Nang banet ḿbé ba/tôong bwǎsíng ba-kyee ng,
baa*chi to ne busa*.
Byisat to byi-kyee ng byi-myii.
31Nké banet ḿbé ba/fé dyityém ne Óburúkpâbí ba/fu,
ochwáp kámbé, ba/chi ba-koo busa ebe ḿbú bu/mû boo/man.
Ba/chi ba-byí ké abyibabang wǎ biinkwa.
Ba-zóngê ochéé baa*kyee*
nang ba-cen bucen baa*jwâa ké bukwóp*.
Currently Selected:
Azáya 40: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
