Azáya 42
42
Ḿgbán mú Óburúkpâbí
1Óburúkpâbí o/raa o/fu,
nyín ḿgbán ejí mú n/chi ǎ o-shwane,
mú me n/cá,
mú nkyi kyi-nyîn n mě ne nyǐ.
Nn/fé ǎ busa ḿbú Busun ejí ké byiko,
ne o/chi o-pan oshê nang orá mpan mú oo*ryí acît*.
2Nyǐ oo*ba/chi o-wonge*
o-yip nang ejá emen kyíbóng*
o-pem nang bǎmpém ḿbé ejá kyíbóng ké byiká-oshê*.
3Oo*ba/chi o-bún kiǐbyâa ńkyí kii/nep*
o-rîp nang otyuryíkáng mú o*fí o-mang ng kanong*.
Nyǐ o/chi o-pan nang yeě mpan mú ne banyá,
mú oo*ryí acît*.
4Nyǐ oo*ba/chi o-zú dyityém*
o-jwâa nang asa*.
O/chi o-bâ ne ntûntû ké ejíí.
Eshê nyí tíbítíbí nyi e-bám m e/fu,
oda-tángê kámbé.
5Osówo nké o/chi byěm ḿbyí mbyi ké bubóng ne o-kyii kámbyí.
Nyǐ nké o/chi ejíí ne kángkáng byěm ḿbyí mbyi ké nyǐ.
Nyǐ nké o/kye banet ḿbé ké ejíí dyikpen
ne kiǐnjáng ńkyí mbe ba-shû ng.
Ne kántîk Osówo Óburúkpâbí mu o-sét ng ḿgbán emen o/fu,
6me Óburúkpâbí nn/kó ǒ,
n-kye ǒ busa ḿbú adari a/fu,
banet bakûkét mpan ké ejíí mú baa*ryí acît*.
Ocím mú me n/chi n-ryí ne kángkáng banet o/chi o-cen ké abwô eyên o-kâm kámbé,
ne kiinwángé ńkyí n/chi n-kye eshê nyí ké ejíí kyi/chi kyi-cen ké abwô eyên.
7Wo a/chi a-bâa achi nyí bansêe achi,
a-fîm banet ba-byí ké mgbokobá mú kyifip.
8Me kǎnchí nké mu Osówo Óburúkpâbí eyên.
Osówo okíri o*fí mú odakyú ne busan ejí ḿbú ragerage*.
Mm*ba/chi m-bángê erím-bakye e-kyú ne abwô ké akpee nyí mbe ba-kyâ mě*.
9Byěm ḿbyí m/mû n/sét n/fu,
byi/chi byi-chi bii/chi kántîk.
Kántîk, n/chi n-sét ǒ byěm ḿbyí byifyîfî,
ne byi-kpet echi.
Okwan-Akpee
10Kwán n̂ okwan mú ofyîfî ba-kye Óburúkpâbí.
Ejíí emúmú ekwán ekwan-akpee emen.
Ben banet ḿbé bamu ba-cen n ké baya ḿbé baryên, kpee n̂g ǎ.
Kángkáng byěm ḿbyí mbyi ké baya ḿbé baryên, byikpee ǎ.
Ben mú bamu ba-kyú u ké esí nyí tíbítíbí, kwán n̂ ekwan.
11Eshê nyí nyi ké kyikim-dyikán ekpee Osówo.
Banet ḿbé Kéda bakpee ǎ.
Banet ḿbé mbe ba-kyú u ké oshê mú Séla bakyú kyíbóng-eku
ba-wonge ké bunyîn-dyityém
ba-sét kyi-kim ne busa emen.
12Banet ḿbé mbe ba-kyú u ké esí nyí tíbítíbí bakpee Óburúkpâbí.
13Óburúkpâbí mu o-câ o-da ng enwa byití wǎ nkân byití.
Byití byi-nyîn n ǎ
ne oo/kpá byiko ké mbyí.
Nyǐ mu o-wonge e dyiwonge-byití o-yip ng busa emen o-kpógê ng banet-bushwôn emen.
Osówo o/ryí Ocím o/fu, Nyǐ o-chwáp ng Banet Emen
14Osówo o/raa o/fu, ké nkéré chwóó,
me m/mû n*fí n-faa ng ojá*.
N*da/faa banet ejí ojá*.
Nké kántîk, nkéré mú ndachi chwǒm oo/fyi.
N-kú n-tii ng wǎ onyinyi mú bufwon mbu bu-nwa ng ǎ.
15Me n/chi m-bên eku nyí kyísí kyísí ne nyí e/nyâam,
n-chi byichí ne biǐbyâa byi-jwóm.
N/chi n-chi buce ne biǐdé-omu byi-núng,
byi-bírî [ecing nyí yéyé.]
16N/chi n-tông bansêe achi-banet ejí kiǐfáng
ké akwóp nyí mbé ba/mû ba*da/cen ne nang kabónge*.
N/chi m-bírî kyifip ebe kyi-firi kiinwángé,
n-chi akwóp a-firi gogégogé nyí badacen.
Nyín byěm ḿbyí me nn/ryí ocím.
M-man n-tî ocím ejí, n-chi kámbyí.
17Kángkáng banet ḿbé ba/fé dyityém ké erím-bakye,
ba-kó ng kányí esówo ebe,
n/chi m-bwa ne mbé kyísí kyísí,
n-wuri kámbé éshwân.
Banet ḿbé Ézerel ba/né Byěm ekwâa
18Óburúkpâbí o/raa o/fu,
fwôo n̂g atông ba-jwo,
ben banet ḿbé baa*jwo atông*.
Ben banet ḿbé baa*rángê*
tún n̂ achi kanong kanong.
19Onet mu kô mú o/sêe achi o-shwôm ḿgbán ejí dí,
ne mu kô to mú o/tim atông o-shwôm onet-kyitwóm ejí?
20Banet ḿbé Ézerel, ben baa/ri byěm chwóó,
nké kyi/byí běn ebóng.
Ben bamu ne atông nyí badajwo byěm,
nké ké ntûntû, ben baa/jwo ebóng.
21Óburúkpâbí mu Osówo mú nkyi kyi-nyîn n ǎ o/fu,
nyǐ o-nyii ng banet.
Ké bubwô ámbu, o/zígî byije emen ne byěm emen ḿbyí mu o-tángê e,
ne o/mû mu o-ryuu ng banet emen o/fu,
bakye kámbyí ofê.
22Nké kántîk, ba/wuri banet emen byěm.
Baa/fín kámbé ké boose-mgbokobá,
ba-rôo kámbé ké bamgbokobá.
Ba-jii kámbé kajii, ba-wuri kámbé byěm,
ne onet o*fí mú o/bê o/fu, nyǐ o-nyii ng kámbé*.
23Onet mu kô ké burwám enen mú odafwôo atông o-jwo ńkyín dí.
Kyi-fím kántîk kyi-ca kashú,
ben ba/chi ba-fwôo atông kanong kanong ba-jwo dí.
24Yeě o/yip Ézerel o-kye banwuri banet byěm.
Óburúkpâbí oyén mú be byi/chi kyibî byi-bât ǎ nké o/yip o-kye.
Be byi*da/kyú wǎ eringe nyí o/mû o/ryuu bě o/fu, byikyú*
nang byěm ḿbyí o/tángê bě byi*da/chi kámbyí*.
25Ké bubwô ámbu nké o/chi bě byi-nyît eringe nyí kafâ esa emen ka/jê,
byi-ri busông ḿbú byití.
Kafâ esa emen ka/shí Ézerel emúmú wǎ okwâ.
Nké be byi/mû byi*da/nyît ńkyí kyi/mû nkyi kyi-chi i*.
Be byi*da/já dyishí kyi-kim ne nkyí nang kaǎnyín*.
Currently Selected:
Azáya 42: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
