Popular Bible Verses from Azáya 40

Share

Nyǐ mu o-chi i banet ḿbé ba*fí ne busa* ne ḿbé baa/kyee ba-firi ne busa.

Nang banet ḿbé ba/tôong bwǎsíng ba-kyee ng, baa*chi to ne busa*. Byisat to byi-kyee ng byi-myii. Nké banet ḿbé ba/fé dyityém ne Óburúkpâbí ba/fu, ochwáp kámbé, ba/chi ba-koo busa ebe ḿbú bu/mû boo/man. Ba/chi ba-byí ké abyibabang wǎ biinkwa. Ba-zóngê ochéé baa*kyee* nang ba-cen bucen baa*jwâa ké bukwóp*.

Ben ba*fí ba-nyît ng*? Ba*da/jwo ne*? Óburúkpâbí mu Osówo mú ne banyá. Nyǐ nké o/chi ejíí emúmú. Nyǐ oo*kyee* o-jwâa nang asa*. Onet o*fí mú odanyît ńkyí nyǐ mu o-kabe ng*.

Onet obónge o/wonge o/fu, chi n̂g bukwóp ké kyikim-dyikán ba-tî Óburúkpâbí. Tyém m̂ kiǐfáng ké kyikim-dyikán ba-tî Osówo eten.

Ké ntûntû, biǐbyâa byi-kpú u, ekong-byichí e-kpú u omu. Nké ejá nyí Osówo eten e-waa ng ne banyá. [

Óburúkpâbí kâng o/chi o-tông busan emen ḿbú ragerage, ne kángkáng banet ba/chi ba-ri kámbú. Óburúkpâbí oyén nké o/ryí ocím mún.

Tim m̂ owo nang orá, ba-tare kángkáng eku. Eku e/chi e-firi kyikit-ndege ńdege, ne kyikit ńkyí nkyi ne abíng kyi/chi kyi-firi taretare.

O/chi o-kûtún banet emen wǎ mbâm ebû. O/chi o-kpaa boǒbwán-ebû o-tî kyikit kyibónge, o-yip kámbú o-fé ké abwô, o-kpî bané ebe degere o-fyi ne mbé.

Bírî n̂g achi kyíbóng. Yeě o/chi ékpére nyí bamu ba-ri ng. Nyǐ mú mu o-tông ng kányí kiǐfáng wǎ basúja, mu o-nyît ng ne ocím ebe, ne o/kye ókpére nang orá dyizîn. Busa emen bu/jê kanong kanong ḿbú ókpére nang obónge o*fí o-tánê e*.

Nyǐ mú mu o-kyú u ké kakyúng-butu emen ńké nke kyíbóng-bubóng nké o/chi kányí. Banet ḿbé mbe kyísí ba/sîi wǎ ejujware. Nyǐ o/paam bubóng wǎ ékpígí, wǎ mpyep mú onet odakyú.

Fé banet ḿbé Jerúsélem busa. Sét kámbé a/fu, baa/ri afaníkong a-kwárê, ne mm/pwoo kámbé ké byibî ebe kángkáng. Nn/kye kámbé busông ḿbú bu/kwárê kerededet ne byibî ebe.

Onet obónge o/chîwonge o/fu, Azáya, sét banet kyitwóm. Me m-bí n/fu, ebóng kyitwóm ńkyí ndasét. O-sét mě o/fu, sét a/fu, kángkáng banet mbe wǎ biǐbyâa. Mbé baa*rí ba-shwôm ekong-byichí*. Biǐbyâa byi-kpú u, ekong-byichí e-kpú u omu, ké nkéré Óburúkpâbí oo/twóm bufú bu-tugi ké mbyí. Banet ba-rí i ba-shwôm biǐbyâa.

Óburúkpâbí mú mu Otu Kyítá mu o-bâ ebatún banet emen ne busa, o-bâ ne [banet ḿbé nyǐ oo/nyii kámbé] o-koo.

Osówo eten o/fu, fé banet ejí dyityém. Fé kámbé dyityém.

Onet mu kô mú odaman ekan omu mú mu ké ejíí ké omu ekpé ké abwô dí, ne mú odaman eyip abwô o-kan bubóng dí. Onet mu kô mú odaman efé ecing nyí nyi ké ejíí emúmú ké mmîk dí, nang mú odaman eyip ecím-buku o-kan ké órúmá dí. Onet mu kô mú odaman esét Óburúkpâbí ńkyí odachi dí. Yeě oda ǎ eman etángê, o-kye ǎ nang bacê. Osówo mu o-cibi ng ne yeě ne o-nyît chwǒm ne eringe nyí kyi/byí, ne o-nyît to eringe nyí badachi byěm.