2 Koríntyan 4
4
Ntûntû mú Osówo mú byidasét
1Osówo, ké bafip emen ḿbé mu o-ri ng bě, oo/kye bě bǎmkpóngé ḿbén, ne ké bubwô ámbu kâng, byi*dachi byi-jwâa asa*. 2Be byi/né echi kángkáng byěm ḿbyí onet odarôo ké bubwô-éshwân. Be byi*da/chi byi/fu, byi-nîm m onet* byi-bwa byi-sét nang kyisédéng kyi-kim ne Byiraa-Osówo*. Nké ké ochíchí-kiinwángé ńkyí ntûntû, be byimu byi-kyú u ké kyikit ńkyí Osówo oda bě eri, ne byimu byi-kan n byi/fu, byi-chi i atyém nyí kángkáng banet a-nyît ntûntû ámu. 3Ké ebóng, â Bǎmpém ḿbé Banong ḿbé byimu byi-sét ng mbe ké kadip, mbe ké kadip ké burwám-banet ḿbé mbe ba-tánê e ba-câ nké nke. 4Mbé ba*fí ba-bángê e* ké ebóng, kyibî-osówo ńkyí ejíí ńnyín kii/yip atyém ebe kyi-tî ké kyifip. Kyibî-osówo ánkyi nkyi kyi-ku ng kámbé kyi/fu, ba*dachi ba-ri kiinwángé ńkyí nkyi kyi-san n kámbé ké byiko*. Kiinwángé ńkyí nkyi kyi-fím m ké Bǎmpém ḿbé Banong kyi-kim ne busan ḿbú ragerage ḿbú Karâs mú mu kerededet wǎ Osówo. 5Ké ebóng, be byi*fí byi-sét ng kyi-kim ne byiko eten*. Nké byimu byi-sét ng kyi-kim ne Jisos Karâs wǎ Otu Kyítá, ne be bayén wǎ bǎmgbán enen ké bubwô ḿbú Jisos. 6Osówo mú o/sét o/fu, kiinwángé kyisan ké kafâ-kyifip, nké mu Osówo ámu obónge mú o/chi kiinwángé emen kyi-san ké atyém eten, eringe nyí o/chi o-kye bě kiinwángé ńkyí byidanyît busan emen ḿbú ragerage, ḿbú mbu bu-san n ké bushú ḿbú Karâs.
7Nké be mú byimu ne ntûntû mún mú o/fím ne Osówo, byimu wǎ butí-ecing, eringe nyí kyidatông kyi/fu, busa ḿbú kiǐtí bu/já Osówo, bu*da bě ejá be*. 8Be byi-fwam m ekyú ké afaníkong, nké a*da bě eku*. Ntáng okíri, atyém eten a-kyú u bě yógeyóge, nké byi*fí byi-zú ng dyityém*. 9Banet-bushwôn ba/jê chwóó, nké be byi*fí byi-kaa ng bucín*. Nang ké mbe ba-némê e bě kanong kanong ké ntáng okíri, ba*fí ba-ju ng bě*. 10Kángkáng nkéré, byimu byi-ri ng busông wǎ bukyû ḿbú Jisos ké enyam-byiko eten nyí edakpú, eringe banet ba/chi ba-ri to dyikpen emen ké enyam-byiko eten. 11Ké akpen eten, be kángkáng nkéré byimu ké afaníkong nyí bukyû, ké bubwô-Jisos, eringe nyí banet ba/chi ba-ri dyikpen emen ké enyam-byiko eten ńnyín nyí edakpú. 12Ńkyín kyi/byí něen kyi/fu, bukyû mbu bu-chi i bě bǎmkpóngé ké byiko, nké dyikpen ndyi dyi-chi i běn ben bǎmkpóngé ké byiko.
13Ejá-Osówo nyí ba/sáng kyísí e/sét e/fu, me n/sét, ké nǎ, me m/bángê. Ké dyizong-dyityém ándyi dyibónge, be to byimu byi-raa ng, ké nǎ, be byi/bángê. 14Be byimu byi-nyît ng byi/fu, Osówo mú o/jwóbê Jisos, Otu Kyítá o-bwa ké dyikpen, o/chi o-jwóbê bě to burwám ne Jisos, o-bâ ne be cibicibi ne ben, byi-ba-bwom ké bushú emen. 15Kángkáng ḿbyín mbyi ké bubwô enen, ne eringe nyí ochwâp mú Osówo mu o-ta ng banet o-câ chwóó, banet ba/chi ba-fé banshwam-asǎma ekó ba-jê ba-shwôm ké akpee nyí Osówo.
Dyikpen ekyú ké Dyityém efé
16Ké bubwô ḿbún, be bii*ba/chi byi-jwâa asa*. Nang ké enyam-byiko eten nyi e-kâa ng e-câ, nké Osówo mu o-bwât ng atyém eten a-bwa nyí afyîfî kángkáng dyicí. 17Ne kaǎnyín-afaníkong ńkén ńké kaa*bwon* ńké byimu byi-ri ng ka/chi ka-bâ bě ne kiǐtí-akpee nyí ne banyá, nyí a/rêe a-shwôm afaníkong ányi. 18Ké ebóng, be byimu byi-tî ng achi eten, *chí ké byěm ḿbyí banet mbe ba-ri ng* nké ké ḿbyí banet ba*fí ba-ri ng*. Ńkyí banet badaman eri kyi-kyú u ké kaǎnyín-nkéré, nké ńkyí baa*man eri* kyi-waa ng ne banyá.
Currently Selected:
2 Koríntyan 4: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
