2 Koríntyan 5
5
1Ké ebóng, be byimu byi-nyît ng byi/fu, ké nkéré baa/bú mpyep mún mú byimu byi-kyú u ké mǔ, ányi enyam-byiko eten ńnyín nyí ké ejíí, Osówo o-kyú u ne kyise kyíbóng ńkyí be byidakyú. Kyise ńkyí nyǐ oyén o/bi, ńkyí kyi/chi kyi-waa ne banyá. 2Nké kántîk, byimu byi-byâ. Okabe eten mú byimu byi-ryuu ng byi/fu, Osówo obi kyise eten ńkyí nkyi kyíbóng o-fé bě, o/jê kanong kanong. 3Â byi/nung ké nkyí, bii*ba/chi byi-chîkyú enyam-byiko dyikáá*. 4Eringe nyí byimu byi-kyú u ké kafâ-mpyep mún mú ké ejíí, be byimu byi-byâ ne okabe mú baa/tû bě atû nyí aryên. Kyi*fí wǎ be byimu byi-ryuu ng byi/fu, byi-twóp ng enyam-byiko eten nyí ké ejíí* nké byimu byi-ryuu ng byi/fu, Osówo ocít bě ne enyam-byiko eten nyí kyíbóng, eringe nyí enyam-byiko eten nyí edakpú, edatánê. 5Osówo nké oo/nap bě o-tî ké oyánge mún, ne nyǐ o/kye bě Busun emen wǎ mbwôp kashú-eyáré nyí ké kángkáng byěm ḿbyí nyǐ o/tî bě.
6Ké bubwô ámbu kâng, be kángkáng nkéré, dyityém ndyi bě ne busa. Be byimu byi-nyît ng byi/fu, â be byi/waa ké byise ne enyam-byiko ńnyín, be byi*fí ké kyise ńkyí Otu Kyítá*. 7Ké ebóng, dyikpen eten dyi/bwom ké dyityém efé, *chí ké byěm eri*. 8Atyém eten aa/sú bě ne busa, ne kyi-nyîn n bě kyi-shwôm ńkyí byidamîng byise eten ké enyam-byiko ńnyín byi-kyú ké kyise ne Otu Kyítá. 9Nké ńkyí kyi/rêe kyi-shwôm kâng, be byimu byi-ryuu ng byi/fu, byi-chi i ńkyí kyida ǎ enyîn dyityém, nang ké byise eten ḿbyín, nang ké ḿbyí áku. 10Ké ebóng, be ashí kángkáng byi-man byi-bwom ké bushú ḿbú Karâs, o-pan bě mpan, eringe nyí nang yeě nang yeě odakoo ńkyí kyi/kwárê ne nyǐ kyi-kim ne ńkyí onet ámu oo/chi, nang kyinong, nang kyibî, ké dyikpen emen wǎ onet.
Bucín eryí ne Osówo ké Bubwô ḿbú Karâs
11Be byimu byi-nyît ng eringe nyí kyi/byí, â onet mu o-shî ng Otu Kyítá, ne ké bubwô ámbu, be byimu byi-kan n byi/fu, byi-tírîng ng banet. Osówo mu o-nyît ng bě kerededet, ne me mu n-kabe ng n/fu, ké atyém enen, ben bamu ba-nyît ng mě to. 12Be byi*fí byi-chî ng běn esét kyi-kim ne byiko eten* nké byimu byi-kan n byi/fu, byi-kyâ běn bukwóp ḿbú bunong ḿbú badakûtông byiko ké bubwô eten, eringe nyí ben badaman efaa ejá ba-kye banet ḿbé mbe ba-tông ng byiko kyi-kim ne kiintaa-enyam-byiko ńkyí kyíjí, ba-mîng etông kyi-kim ne kafâ-dyityém. 13Be byimu byi-fún n ké ntûntû dí*. Nkyi ké bubwô ḿbú Osówo. Aa be byimu ne bubong eten dí. Nkyi ké bubwô enen. 14Ké ebóng, kyijé ńkyí Karâs mu ne be nké nkyi kyi-níbî ng bě, kántîk mú byi-kú byi-nyît ng byi/fu, onet obónge o/kpú ké dyishí ńdyí kángkáng banet, ńkyí kyi/tông kyi/fu, kángkáng banet ba/kpú ne nyǐ. 15Nyǐ o/kpú ké dyishí ńdyí kángkáng banet, eringe nyí banet ḿbé mbe bakpó ba*dachi ba-chîkpen ba-kye byiko ebe* nké ba-kû ng ekpen ké bubwô ḿbú nyǐ mú o/kpú, ne Osówo o-jwóbê ǎ o-bwa ké dyikpen ké bubwô ebe.
16Be byi*fí to byi-pan n kâng banet mpan ké édúú nyí banet*. Â nang byi/mû byi/pan Karâs mpan ké édúú nyí banet, ké nkéré obónge, byi*fí to byi-chi i éné*. 17Â nang yeě nké Osówo oo/cibi ǎ ne Karâs, onet ámu o/firi ne dyikpen ńdyí dyifyîfî. Dyikpen ńdyí okúri dii/man, ńdyí dyifyîfî dii/bê. 18Kángkáng ḿbyín, Osówo nké o/chi. Nyǐ mú ké bubwô ḿbú Karâs, o/yángê bě be banet-bushwôn emen, byi-firi bacín emen. Ne nyǐ o/kye bě bǎmkpóngé o/fu, be byikûchi banet bakíri ba-firi to bacín emen. 19Kyitwóm eten nkyi něen, Osówo oo/chi bucín ne kángkáng banet ké bubwô ḿbú Karâs. Osówo o*da/sáng o-tî kyísí kyi-kim ne byibî ebe*. Ne nyǐ oo/kye bě kyitwóm ńkyín o/fu, be byisét kyi-kim ne eringe nyí nyǐ mu o-chi i kámbé ne ba-firi bacín emen.
20Be byimu byi-sét ng běn kâng ké bubwô ḿbú Karâs wǎ Osówo oyén nké mu o-sét ng ké bubwô eten. Ké bubwô ḿbú Karâs, be byi/tîm běn arông byi/fu, mîng n̂g Osówo o-yángê běn ben banet-bushwôn emen, ba-firi bacín emen. 21Karâs o/mû o*fí ne kyibî* nké ké bubwô eten, Osówo o/chi ǎ o-nung to ké byibî eten, eringe nyí be, ké ocibi eten to ne Karâs, byidanung ké kanong ńké Osówo.
Currently Selected:
2 Koríntyan 5: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
