2 Koríntyan 3
3
Bǎmgbán ḿbé Ocím mú Ofyîfî mú Osówo o/ryí
1Ńkyín nkyi kyi-tông ng kyi/fu, be byi/tôong byi-tông ng byiko kyi-kim ne byiko eten dí. Be byimu byi-ryuu ng baléta, wǎ banet bakíri, ḿbé ben badakúng ba-nyît kyi-kim ne be, nang ḿbé be byidakúng byi-nyît kyi-kim ne ben dí. 2Ben bayén ba-chi i léta mú be byimu ne mǔ, mú ba/sáng ké atyém eten ba/fu, nang yeě nang yeě onyît, o-kó. 3Kyi/tông wááng kyi/fu, Karâs oyén nké o/sáng léta mún ne o-twóm kámú ké bubwô eten. Ba*da/kúng omu-nwet ne ba-sáng kámú ké aká-nwet* nké ba/yip Busun ḿbú Osówo mú mu okpó ne ba-sáng kámú ké atyém-banet.
4Be byimu byi-raa ng ńkyín, ké ebóng, be byi/tî dyityém ké Osówo ké bubwô-Karâs. 5Be byi*fí ne chwǒm ké byiko eten* ńkyí kyida bě ebángê byi-sét byi/fu, be byi-man n echi bǎmkpóngé ḿbén*. Busa ḿbú be byimu ne mbú mbu bu-fím m ne Osówo. 6Nyǐ nké o/chi bě byi-kwárê mú byidakyú bǎmgbán ḿbé ocím mú ofyîfî mú nyǐ o/ryí o-sem byiko emen, mú o/kim ne Busun emen, *chí ne byije ḿbyí ba/sáng kyísí*. Byije ḿbyí ba/sáng kyísí mbyi byi-cen n ne bukyû, nké Busun-Osówo mbu bu-kyâ dyikpen.
7Osówo o/mû o/sáng byije emen ké aká-nwet, ne busan-Osówo ḿbú ragerage bu/byí kyíjí ké nkéré mú o/kye byije ámbyi. Nang ké busan ḿbú bu/mû ké bushú ḿbú Músis bu/man, busan ámbu bu/mû bu-san n kanong kanong ḿbú bu/chi banet-Ézerel ba*da/man etún Músis achi ké bushú ka-bwon*. Â Byije-Músis ḿbyí bǎmkpóngé emen ba/mû ḿbé badacen ne bukyû, byi/bê ne dyizong-busan ámbu ḿbú ragerage, 8busan ḿbú ragerage ḿbú bu/já bǎmkpóngé ḿbé Busun-Osówo kâng boo*nwa eri*. 9Bǎmkpóngé ḿbé Osówo mu o-kúng ng o-két mpan o-bên banet ba/mû ba-san n ragerage, busan ḿbú bǎmkpóngé ḿbé Osówo mu o-kúng ng o-két mpan o-nwa banet kâng boo*nwa eri*. 10Ké ńkyín, be byi-man n esét byi/fu, ké ebóng, busan ḿbú ragerage ḿbú kántîk mbu bu-san n bu-shwôm busan ḿbú ragerage ḿbú bu/jang esan ké nkéré mú o/shwôm ké esim bu*fí to*. 11Ké ebóng, â busan ḿbú ragerage bu/mû ké chwǒm ńkyí kyidakyú ké kaǎnyín-nkéré, busan ḿbú ragerage ḿbú budakyú ké chwǒm ńkyí kyidawaa ne banyá kâng boo*nwa eri*.
12Ké ebóng, be byimu ne achi ńnyín etî, be byi*fí byi-shî ng achi-onet nang kaǎnyín*. 13Be byi*fí wǎ Músis* mú o/yip kaǎsém o-cít bushú emen* eringe nyí banet ḿbé Ézerel baa*ba/chi ba-ri eringe nyí busan ḿbú bu/mû ké bushú emen mbu bu-man n*. 14Atyém ebe a/mû cítcít ké ntûntû, ne tete dyicí ńdyí kurún, atyém ebe a/tôong ne boǒsém ámbu cítcít ké nkéré ba-kú ba-kó ng banwet ḿbé ocím mú kpákpá mú Osówo o/ryí o-sem byiko emen. Kaǎsém ka-bâa ng onet ké dyityém ké nkéré Busun-Osówo boo/yip ǎ o-cibi ne Karâs. 15Nang kurún, nang nkéré orá nké mbe ba-kó ng Nwet-Byije-Músis, kaǎsém ánke ka/tôong ka-cít ng atyém ebe. 16Nké Busun-Osówo bu-bâa ng kaǎsém ánke, wǎ eringe nyí ejá-Osówo nyí ba/sáng kyísí e/sét e/fu, Músis o/bâa kaǎsém emen ké nkéré mú o/bwa esim o-chîkâm Otu Kyítá. 17Otu Kyítá, ké kyikit-nwet ńkyín, ányi Busun-Osówo, ne ké kyikit ńkyí Busun ḿbú Otu Kyítá mbu, banet ba-kyú u ké byiko ebe. 18Be ashí kángkáng kâng byimu byi-tông ng busan ḿbú ragerage ḿbú Otu Kyítá ne bashú eten kyíjí gbúúl. Ne busan ámbu bubónge ḿbú ragerage, ḿbú mbu bu-fím m ne Otu Kyítá mú mu Busun-Osówo mbu bu-yángê e bě byi-firi wǎ nyǐ ké kiǐtí-busan ḿbú ragerage ḿbú mbu bu-jê ng bu-câ kashú.
Currently Selected:
2 Koríntyan 3: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
