1 Tyímótyi 6
6
1Kángkáng banet ḿbé mbe básóng bakúng banchí ebe ne ofê ké kángkáng akwóp, eringe onet nang obónge oo*ba/chi o-raa byibî-byiraa kyi-kim ne dyizîn ńdyí Osówo* ne kyi-kim ne byěm ḿbyí byimu byi-tángê e*. 2Básóng ḿbé banchí ebe mbe banet ḿbé ba/bángê ké Karâs ba*dachi ba-kye kámbé edángé*. Ké ebóng, banchí ebe ámbe ba-chi i bwǎn-bané ebe ké bubwô-dyityém efé ne Karâs. Nké babwa ba-kûbángê kámbé byitwóm kanong kanong ba-shwôm. Ké nǎ, banet ḿbé mbe ba-já ng chwǒm ké bǎmkpóngé ebe ba-chi i banet ḿbé ba/bángê ké Karâs, ḿbé mbe ba-jê ng kámbé.
Byěm etángê kyi-kim ne Osówo ḿbyí byi*fí ké Kafâ* ne Efang nyí Ntûntû
Wo a-man a-tángê, a-pem banet byěm ḿbyín. 3Nang yeě nké mu o-tángê e byěm ḿbyí byi/yángê ne ḿbyín, ne o*fí o-bángê e ké ejá nyí ntûntû nyí Jisos Karâs, Otu Kyítá eten* ne ké byěm ḿbyí ékwâbashi eten nyí Karâs nyi e-tángê e* 4onet ámu oo/sú ne byiko etông, ne o*fí o-nyît ng chwǒm nang kyibónge*. Onet ámu o-kyú u ne kyibî-okabe ńkyí odakán ké dyishí ne ashwôn eshwôn kyi-kim ne byiraa, ne ńkyín kyi-cen n ne orêm ne byibî-ashwôn ne edángé ne byibî-okabe kyi-kim ne banet 5ne okân ké dyishí kángkáng nkéré mú mu o-fím m ne banet ḿbé atyém ebe aa/bên, ne ba*fí to ne ntûntû*. Mbé mbe ba-kabe ng ba/fu, ékwâbashi, ányi bukwóp ḿbú adafiri nfang-onet.
6Ékwâbashi nyí Karâs e-chi i onet o-firi nfang-onet, â onet ámu mu o-nyît ng o/fu, byěm ḿbyí nyǐ mu ne mbyí byi/kwárê ǎ. 7Ebóng chwǒm ńkyí be byi/bê ne nkyí ké ejíí. Chwǒm nang kyibónge kyi*fí*. Ebóng chwǒm ńkyí be byidaman eyip ké ejíí byi-dim ne nkyí. Chwǒm nang kyibónge kyi*fí*. 8Ké bubwô ámbu kâng, â be byimu ne byiryíng ne byídí, ḿbyí ányi byi/kwárê bě. 9Nké banet ḿbé mbe ba-ryuu ng ba/fu, mbé ba-fang ng, ba-róng ng ké okan ne ké abwô nyí byibî ne enyam-ekabe nyí nyi e-tín n banet e-fâ ké bukyû ne busông ḿbú ne banyá. 10Ké nǎ, ké kyijé ńkyí akpuga nké kángkáng byibî-byěm mbyi byi-fím m. Banet bakíri baa/tánê ké dyityém ebe ńdyí ba/fé ne Osówo, ne bafip baa/bên atyém ebe, ké nǎ, mbé mbe ba-jang ng eryuu ba/fu, mbé bajá akpuga.
Byiraa ḿbyí byi/fím ne Me Oyén
11Nké wo mú amu onet mú Osówo, né kángkáng byěm ḿbyín. Kan eringe nyí adakoo kanong ńké Osówo ne Osówo enyît ne dyityém efé ne Karâs ne kyijé ne ofit eryí ne budegere. 12Kan byiko a-zóngê kanong ké ochéé mú dyityém efé ne Karâs, eringe adakoo dyikpen ńdyí ne banyá a-kye byiko eyên. Ké nǎ, kyi/mû ké dyikpen ńdyín nké Osówo o/kó ǒ ké nkéré a/sét kanong kanong ké bushú-banet chwóó kyi-kim ne dyityém eyên ńdyí a/fé ne Karâs. 13Me mu n-kyâ ǒ busa ké bushú ḿbú Osówo mú mu o-kyâ kángkáng byěm dyikpen ne ké ḿbú Jisos Karâs mú o/sét wááng kanong kanong ké bushú-Póntyos Pálet, n/fu, 14chi ńkyí kyije ńkyí Karâs kyi/sét, a-tî kánkyí kpárám, ébîn ee*kyú* tata Dyicí ńdyí Jisos Karâs, Otu Kyítá eten, Osówo o/chi o-chi ǎ o-byí kyíjí wááng. 15Osówo mú bada ǎ ekye akpee, mú nyǐ kǎnchí mu Otu, ne mú Otu mú barî-batu, ne Otu Kyítá mú barî-batu kyítá. 16Nyǐ kǎnchí nké oo*kpú*. Nyǐ mu o-kyú u ké kiinwángé ńkyí onet nang obónge oo*man efárâng kánkyí*. Onet o*fí nang obónge mú oo/ri ǎ*. Onet o*fí nang obónge mú oda ǎ eman eri*. Ofê ne busa ḿbú ne banyá byikyú ne nyǐ. Kyi/bát kyikyú éné.
17Sét banet ké busa ḿbé mbe banfang-banet ké byěm ḿbyí ké ejíí ńnyín a/fu, ba*dakûtông byiko* ne bakûtî atyém ebe ké Osówo mú mu o-kyâ bě kángkáng byěm dyikáá ḿbyí byidakyú ké bunyîn-dyityém, *chí ké efang* nyí ee*kyú*. 18Sét kámbé ké busa a/fu, bakûchi kanong, ba-kyú banfang-banet ké bǎmkpóngé ḿbé banong, ba-cángê dyityém, ne bakpá byiko ḿbyí badakûkyii byěm ne barî-banet. 19Ké bukwóp ḿbún, mbé ba/chi ba-nap esang ba-tî byiko ebe nyí e/chi e-kyú kiimkpet kyikû ńkyí shwaneshwane ké nkéré mú mu o-bâ. Ne mbé ba/chi ba-man ekoo ochíchí-dyikpen.
20Nang ebóng ńkyí ba/kye ǒ ba/fu, wo akûtún, ǎ Tyímótyi, tî kánkyí kanong. Tî byiko eyên cát ké byibî-byiraa ne enyam-okân ké dyishí kyi-kim ne byinyídíng wǎ eringe banet bakíri mbe ba-kó ng kámbyí ké bukwóp ḿbú bu*fí ké kafâ*. 21Ké nǎ, banet bakíri baa/sét ba/fu, mbé mbe ne mbyí, ne ké bubwô ámbu, baa/tánê ké kiǐfáng ebe ńkyí dyityém efé ne Karâs.
Ochwâp mú Osówo okyú ne ben kángkáng.
Currently Selected:
1 Tyímótyi 6: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
