YEREMIA 22
22
Bala Yeremia Kuan Inul Raca' Yahuda
1-2Tuhan nengecuk negku amé' ruma' raca' Yahuda, luk inul Raca' Daud, pad ui ngecuk raca', amung lun rayehneh, idi amung pupu Yerusalim ninger luk belén Tuhan. 3“KebalaKu, Ui ini Tuhan mada' nemuyuh ratnan luk matu idi luk mesiri. Matar lemulun luk uen naluk ratnan lemulun luk naluk neneh. Aleg ngesusa' idi ngedereh nelun sakai, anak maté, idi decur tinula'. Idi aleg ngaté lemulun luk na mesala' bang bawang luk meligan ini. 4Kudeng matu-matu muyuh maya' luk icukKu, idi inul Daud lutep mangun ku raca'. Idi ideh, dengan amung lun rayehdeh idi anak itindeh megéi' lemaba tanga' ruma' ini, maya' keréta idi kudadeh. 5Iamo' kudeng muyuh na maya' balaKu, idi Ui sebuleng mulung nemuyuh, idi ruma' muyuh ini miak metabpa. Ui ini Tuhan pangeh nepebala.
6“Ruma' raca' Yahuda pelaba do' taga sirenKu, mepad kudeng tana' Giliad idi Pegkung Lebanon. Iamo' Ui miak ngisu' neneh mangun ku su luk ali-ali, pad na lemulun tudo su ineh. 7Ui miak ngecuk lemulun ngusag neneh. Ideh miak nguit uai, pad ideh nebpeng diri kayuh tumuh bang ruma' ineh idi talan bang apui.
8“Muci mula' lun sakai miak lemaba idi ngitun seburur dengan seburur, ‘Ngudeh Tuhan nenganau' luk kudeng ini kuan bawang luk rayeh ini?’ 9Idi ideh miak pebala, ‘Ngaceku ideh pangeh nenecan pejani' Tuhan Allahdeh, idi ideh nesembayang maya' allah baken.’ ”
Bala Yeremia Ratnan Yoahas
10O Lun Yahuda, aleg nangi' ni Raca' Yosia,
aleg temido ku aténeh.
Iamo' do' nangi' ni Yoahas, luk anakneh,
ieh tebanendeh, idi na ieh miak lemubed
nier tana' luk inanneh tinganak.
11 #
2 Rac 23.31–34; 2 In 36.1–4 Kebala Tuhan ratnan Yoahas Yosia, luk nengelibal tamanneh mangun ku raca' Yahuda, “Ieh pangeh nenalan rat ieni idi na miak lemubed teh. 12Ieh miak maté bang bawang su luk inanneh tebanendeh. Idi na ieh miak nier bawang ini teh.”
Bala Yeremia Ratnan Yoyakim
13Mesusa' kuan lemulun luk mudut ruma' idi parungneh
maya' dalan luk tekilu' idi mebalih;
luk ngecuk nelun denganneh ngakem idi na ieh mayar tabpardeh.
14Mesusa' kuan lemulun luk pebala,
“Ui pian mudut aceh ruma' luk rayeh dengan parungneh luk rayeh teh.”
Idi ieh nganau' tabuk bang ruma'neh
dengan alad luk ratnan kayuh tumuh,
idi uen naat mesia'.
15Miakké iko mangun ku raca',
ngaceku iko inan ruma' ratnan kayuh tumuh
luk meluun do' ratnan ruma' dulun?
Do' ngerawé tamanmu. Ieh nekuman idi nengirup,
idi nenganau' luk matu idi luk mesiri,
idi ieh do' udeng peh.
16Ieh nemutut ukum luk mesiri kuan lun masi',
idi ieh inan peruan.
Ini dalan lemulun luk miti Tuhan.
17Iamo' iko ngerawé bururmu sebuleng mo'.
Iko ngaté lemulun luk na mesala'
idi ngedereh anak itinmu.
Tuhan pangeh nepebala.
18 #
2 Rac 23.36—24.6; 2 In 36.5–7 Idi kebala Tuhan ratnan Yoyakim Yosia, raca' Yahuda,
“Seburur pana' nateh luk temido aténeh idi pebala,
‘Bulé, Bulé, lun rurumku!’
Seburur pana' nateh luk nangi' neneh, idi ngitang,
‘O Ama'! O raca'ku!’
19Maya' dalan nanem keladai,
butungneh miak berikaden
idi talan bal déi' tanga' Yerusalim.”
Bala Yeremia Ratnan Luk Mangun Kuan Yerusalim
20O Lun Yerusalim amé' déi' Pegkung Lebanon idi ngitang,
amé' tana' Basan idi nangi'.
Ngitang rat pegkung-pegkung Moab,
ngaceku amung bawang luk inan muyuh perurum pangeh linaya'.
21Tuhan nepebala nemuyuh kareb muyuh do' udeng,
iamo' muyuh ara' ninger.
Kudeng ini ulun muyuh rat kareb muyuh anak.
na tu-tu muyuh sikal maya' Tuhan.
22Lun rayeh muyuh miak mepalid ku bui,
amung rurum muyuh miak tebanen,
idi bawang muyuh miak uen ngigu',
ngaceku amung kekamen muyuh luk dat.
23Muyuh tudo arang kayuh tumuh luk inuit rat Lebanon.
Iamo' muyuh pelaba susa' kareb dereh macing nemuyuh,
idi ét muyuh mepad kudeng ét decur luk mét nenganak.
Ukum Allah Kuan Yoyakin
24 #
2 Rac 24.8–15; 2 In 36.9–10 Kebala Tuhan kuan Yoyakin Yoyakim, raca' Yahuda, “Ui pebulung ku ngadanKu, Allah luk mulun. Sagan tu pana' iko susing luun bua' ticu'Ku pa tinueh Ui miak ngelengu namu, 25pad iko miak barén nelun luk sikal ngaté namu, ieh ineh lemulun luk inanmu matot. Ui miak maré namu kuan Nebukadnesar, raca' Babil idi bawehneh. 26Ui miak masut namu idi tinanmu amé' inan bawang baken, su luk na inan medueh tinganak, idi déi' medueh miak maté'. 27Na medueh miak lemubed amé' inan bawang luk pian siren medueh.”
28Kebala Yeremia, “Matuké Raca' Yoyakin mepad kudeng aceh kuden luk nebila' idi luk pangeh tila' idi luk na pian lun? Ngudehké ieh idi anakneh tiban idi tila' bang aceh bawang luk na nekali' deh?”
29O tana', O tana', O tana'!
Ninger luk pangeh bila Tuhan:
30“Lemulun ini kumin na miak inan anak,
idi na miak ngalap luk pianneh.
Na ieh miak inan inul
luk mangun ku raca' mepad kudeng Daud,
idi ngimet bawang Yahuda.
Ui ini Tuhan pangeh nepebala.”
Currently Selected:
YEREMIA 22: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
