YEREMIA 21
21
Tabpa Yerusalim Badén
1Raca' Sedekia nengecuk Pasur Malkia idi Sepania Masia, lun imam, amé' matun ni Yeremia idi nemutuh, kebala didueh, 2#2 Rac 25.1–11; 2 In 36.17–21 “Do' iko mutuh Tuhan kuan kai, ngaceku Nebukadnesar, raca' Babil munu' nekai. Kian, Tuhan miak nganau' aceh tanu' luk melalud kuan kai lek, idi ngecuk Nebukadnesar buro.”
3Idi Tuhan nepebala ni Yeremia, idi Yeremia nepebala inan lun luk icuk iné' papu' neneh, 4“Do' mada' ni Sedekia ratnan luk bila Tuhan Allah lun Israil, ‘Ui miak masut amung lun pebunu' luk pikai Sedekia pad ideh munu' Raca' Babil idi bawehneh luk ngelibut libung bawang. Idi Ui miak muun pelapetdeh uned bawang ineh. 5Idi Ui miak munu' nemuyuh dengan amung tuehKu, usehKu, idi gatehKu. 6Ui miak ngaté amung-amung lemulun luk tudo bang bawang ini. Lemulun idi pung pana' miak maté ku ét luk pelaba bura'. 7Idi Sedekia, raca' Yahuda, amung lun rayehneh idi amung lemulun luk na maté bang bunu', ku lau, idi ku ét ineh, siménKu kamen Raca' Nebukadnesar idi bunu'deh luk pian ngaté nedeh. Nebukadnesar miak ngaté amung-amungdeh ineh dengan na méi' inan seburur pana'. Seburur pana' nateh miak tacin. Ui ini Tuhan pangeh nepebala.”
8Idi Tuhan nengecuk ni Yeremia pebala inan pupu ineh, “Ninger muyuh! Ui ini Tuhan nima' nemuyuh mili' arang dueh dalan ini — aceh dalan luk macing inan ulun, idi aceh dalan luk macing inan até. 9Idé-idé luk tudo bang bawang ini miak pitayen bang bunu', kian maté ku lau idi ku ét lek. Iamo' idé-idé luk remuat idi amé' matun nelun Babil luk uned ngerieng bawang, idi mutuh éi' na miak pitayen. Idi ieh simén mulun. 10Ui lutep terawé na sikal méi' inan bawang ini, iamo' sikal ngusag neneh. Ieh miak barén kuan raca' Babil, idi ieh miak ngeseb neneh. Ui ini Tuhan pangeh nepebala.
Ukum Kuan Inul Raca' Yahuda
11-12“O Yeremia, do' ngecuk inul raca' Yahuda, ieh ineh inul Raca' Daud, ninger luk bilaKu ini, luk mangun ku Tuhandeh. ‘Do' mutut ukum luk mesiri anid-anid aco. Matar lemulun luk uen naluk, ratnan lemulun luk naluk neneh. Kudeng na, kekamen muyuh luk dat miak ngegio usehKu, pad ieh mulun kudeng apui luk na miak uen ngilep. 13Iko, Yerusalim meluun dita' ratnan amung ruan, mepad kudeng aceh pegkung batu luk uned raked. Iamo' Ui ini Tuhan miak munu' namu. Iko pebala, seburur pana' nateh luk miak munu' namu idi ngelaya' namu. 14Iamo' Ui ini Tuhan miak ngukum nemuyuh, ngaceku amung luk inau' muyuh Ui miak ngeseb ruma' muyuh. Idi apui ineh miak ngeseb amung-amung luk libut-libutneh. Ui ini Tuhan pangeh nepebala.’ ”
Currently Selected:
YEREMIA 21: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
