YEREMIA 23
23
Rapet Kuan Muci Aco
1Pelaba rayeh ukum Tuhan kuan raca'-raca' luk nima' anak itinneh pitayen idi uen ngatad. 2Ini bala Tuhan Allah lun Israil ratnan raca'-raca' luk pinili' mangun ku lun matar pupuNeh, “Muyuh pangeh nengatad pupuKu idi nengusu nedeh. Idi na muyuh nematar nedeh. Nekini Ui sikal ngukum nemuyuh ngaceku amung-amung dat luk inau' muyuh. 3Ui miak ngamung pupuKu luk ketecan rat bawang-bawang luk inanKu nengatad nedeh, idi Ui miak nguit nedeh muli'. Idi ideh miak inan mula' anak idi amé'-amé' mula'. 4Ui miak maré kuandeh raca'-raca' luk miak matar nedeh, pad ideh na matot, idi seburur pana' nateh luk miak metutu'. Ui ini Tuhan pangeh nepebala.”
5 #
Yer 33.14–16
Kebala Tuhan, “Kali' rungen muci Ui miak mili' aceh inul Daud luk matu mangun ku raca'. Raca' ineh mileh ngimet idi miak nganau' luk mesiri idi luk matu aput-aput tana'. 6Kareb Ieh mangun ku raca', pupu Yahuda miak do' udeng idi lun Israil na inan bunu'. Ideh miak neten raca' ineh ‘Tuhan Pangeh Nengulun Netau.’
7“Idi muci,” kebala Tuhan, “lemulun na megéi' pebala, ‘Allah luk mulun nenguit nelun Israil remuat rat bang bawang Masir.’ 8Iamo' ideh miak pebala, ‘Allah luk mulun pangeh nenguit nelun Israil remuat rat bang bawang luk pa tinueh busat aco, idi rat bang amung bawang luk baken luk inan Tuhan nengatad nedeh. Idi ideh miak tudo bang bawangdeh sebuleng teh.’ ”
Bala Yeremia Ratnan Nabi-Nabi
9Kebala Yeremia ratnan nabi-nabi,
“Niatku melaso idi teh ui megegker.
Ngaceku Tuhan idi balaNeh luk meligan,
ui mepad kudeng lemulun luk mabuk,
luk nengirup pelaba ula' abpa' anggur.
10Bawang ini mepanu' ku lemulun luk na maya' Tuhan.
Idi ideh nganau' luk dat, idi na mutut luk mesiri.
Idi ngaceku ukum Tuhan amung tana' tekedamut;
idi laman-laman tekering.”
11Kebala Tuhan,
“Amung nabi idi imam na ngerawé Allah,
Ui nenier nedeh nganau' luk dat bang Ruma' Allah pana'.
12Amung dalan luk béndeh mesalud idi medacem.
Idi Ui miak nganau' nedeh metebaceng idi mebpeh.
Ui miak ngacing dereh kuandeh,
ukumdeh lélé macing.
Ui ini Tuhan pangeh nepebala.
13Ui pangeh nenier sala' nabi-nabi Samaria.
Ideh nepebala dengan ngadan Baal,
idi nengeraruh pupuKu lun Israil.
14 #
Pud 18.20
Iamo' Ui pangeh nenier nabi-nabi Yerusalim
nganau' luk meluun dat.
Ideh pasét idi mebalih,
idi nguyut lemulun nganau' luk dat,
pad seburur pana' nateh luk pian ugka' nganau' luk dat.
SirenKu, ideh mepad dat,
kudeng lun Sodom idi Lun Gemora.
15“Ngaceku ineh, Ui ini Tuhan luk Melalud pebala ratnan nabi-nabi Yerusalim:
Ui miak maré tibu luk mepét kenendeh,
idi abpa' luk megalih rupendeh,
ngaceku ideh na manu idi nengeperuit luk dat aput-aput tana'.”
16Kebala Tuhan luk Melalud kuan pupu Yerusalim, “Aleg ninger bala nabi-nabi, ngaceku ideh nguit nemuyuh merapet inan bala luk mo'-mo'. Ideh mada' nemuyuh ratnan luk pangeh tirawédeh sebuleng, idi baken luk bilaKu. 17Ideh megéi' ngubuk lemulun luk ara' ninger balaKu, kebaladeh, ‘Amung-amung luk do' miak mangun kuan muyuh.’ Idi ideh mada' lemulun luk metueh niat, kebaladeh, ‘Na tu-tu susa' miak macing nemuyuh.’ ”
18Kebala Yeremia, “Seburur pana' rat arang nabi-nabi ini nateh luk pangeh nekali' terawé Tuhan luk inalum. Seburur pana' rat arangdeh nateh luk pangeh neninger balaNeh idi kali' ilungneh. Na tu-tu ideh neninger idi nemaya' luk bila Tuhan. 19Useh Allah mepad kudeng barui, idi kudeng libuleh luk macing luun uluh lemulun luk dat. 20Ieh na miak ugka' pad Ieh nganau' amung-amung luk pian ruenNeh. Muci aco pupuNeh miak kali' ilungneh dengan megala'.”
21Kebala Tuhan, “Na Ui nengecuk nabi ini, iamo' ideh iné'. Na Ui nemaré balaKu nedeh, iamo' ideh nepebala dengan ngadanKu. 22Kudeng ideh pangeh nekali' terawéKu luk inalum, idi ideh miak mada' balaKu kuan pupuKu, idi ngecuk nedeh uren ratnan ulundeh idi kekamendeh luk dat.
23“Ui ini Allah luk idi iapeh-iapeh pana', idi baken bang sebuleng luk inan mo'. Ui ini Tuhan pangeh nepebala. 24Seburur pana' nateh luk miak sigapung su luk na kali'Ku. Naké muyuh kali' Ui idi iapeh-iapeh bang langit idi luun tana' pana'? 25Ui kali' luk bila nabi-nabi ineh luk mebalih dengan ngadanKu idi luk pebala, ‘Tuhan pangeh nemaré balaNeh nekai bang nupi kai.’ 26Tuda' ioké nabi-nabi ini miak ngeraruh pupuKu dengan balih luk pangeh tirawédeh? 27Ideh ngerawé pupuKu miak mekelupan Negku ngaceku nupi-nupi luk badéndeh, mepad kudeng tepundeh nekelupan Negku idi nelumi inan Baal. 28Do' nabi luk pangeh nenginupi pebala, ‘Ui pangeh nenginupi mo',’ iamo' do' nabi luk pangeh neninger balaKu mada' bala ineh dengan luk matu. Lipang padé na miak uen maad dengan bera. 29BalaKu mepad kudeng apui idi mepad kudeng tuno luk mila' batu. 30Ui megateh inan nabi luk mano balaKu ratnan nabi luk baken, pad ideh sebuleng miak mada' bala ineh. 31Ui megateh inan nabi luk mada' baladeh sebuleng idi pebala, ‘Kudeng ini bala Tuhan.’ 32Do' ninger balaKu, ieh ineh bala Tuhan. Ui megateh inan nabi luk mada' nupideh dengan mebalih. Ideh mada' nupideh idi ngeraruh pupuKu dengan balih idi dita' niatdeh. Na Ui nengecuk nedeh, idi na tu-tu ideh ngedengan pupuKu. Ui ini Tuhan pangeh nepebala.
Babeh Tuhan
33“O Yeremia, kareb seburur rat arang pupuKu, idi nabi idi imam pana' ngitun namu, kebaladeh, ‘Anunké bala Tuhan?’ do' mada' nedeh, kebalamu, ‘Bala Tuhan, ieh ineh aceh babeh, idi ieh miak nala' nemuyuh.’ 34Idi kudeng seburur nabi, idi imam, idi seburur rat arang pupu ini pana' pebala, ‘Bala Tuhan, ieh ineh aceh babeh,’ idi Ui miak ngukum neneh dengan amung uang tetek ruma'neh pana'. 35Iamo' petulu ieh ngitun nelun rurumneh idi pupuneh, kebalaneh, ‘Kudeng apehké Tuhan nengor bala muyuh? Anunké luk bilaNeh?’ 36Idi na ideh miak pebala, ‘Bala Tuhan, ieh ineh aceh babeh,’ ngaceku kudeng inan seburur lemulun luk pebala kudeng ineh, idi Ui miak nganau' balaKu mangun ku aceh babeh kuanneh. Lemulun ini pangeh nengisu' bala Allahdeh, ieh ineh Allah luk mulun, Tuhan luk Melalud. 37O Yeremia, do' ngitun nelun nabi, kebalamu, ‘Kudeng apehké Tuhan nengor bala muyuh? Idi anunké luk bila Tuhan?’ 38-39Idi kudeng ideh pebala, ‘Bala Tuhan, ieh ineh aceh babeh,’ idi kali' rungen Ui miak ngakem nedeh idi nala' nedeh mado rat Negku, do' ideh idi bawang luk biréKu nedeh idi inan tepundeh pana'. Ngaceku ideh nengeruat bala luk bibpengKu ineh. 40Ui miak ngacing kuandeh igu' luk meruked, luk na miak mekelupan.”
Currently Selected:
YEREMIA 23: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
